Rosu minna iillo anjenni annuwinke seeda doogga hodhite rossino. Mitootuno rxeeertinyu korkaatinni rosate kaayyo hoogge gattino. Seeda yannara xa’mo ikkite keeshshitinoti xaa yannara qae qaete rosate kaayyo gobbate deerrinni wo’munni wo’ma afi’noonni yaate duuchankawa iille laoommokki daafira guuta ikka hoogummorono Sidaamu qoqqowi deerrinni laoommori kayinni Rosu iillo jawaata ikkase naqqasate gadachitannoe.
Mittu rosaanchi Onte KM ale hodhe rosa noosikkita rosu ministere xawissanna la’neemmo. Konne guutisate mootimma,rosaanote maate,dureeyye,amma’note uurrinshuwanna addi addi kaa’lote uurrinshuwa jawaatu garinni loossanni noota anfanni hee’noommo. Kuni naaxxisanno.
Dureeyye rosu iillora angansa diriirsatenni sa’e rosu mine uminsa minte uyitanna la’nanni hee’noommo.
Kayinnilla rosu isilanchimma aana may loosamiyya yiniro diru dirunkunni woffi yino gumi maareekkamasi xa’mote giddo tugganno. Rosu isilanchimma aana leeltanni noo jifo xaa yannara gobboomu deerrinni leeltinotenna bidhatto kalaqqinote yiniro iibbabbisha dikkannoe. Ragunni rosinokkihu,rosino rosinni meessaneetosi soorrinokki qansichi umisirano ikko maatesira hattono gobbate gufichohonna danqaraho.
Rosu isilanchimma ledo ka’anno qarrubbara shoole kaimu korkaatta noota rosu ogeeyye coyidhanno. Insano Rosiisaanote ikkadimma aja,handaaraho leeltanno rosu hiiqqamme,Polotiku anga woranna qachimmate ruukkado hedo ikkitinota kultanno.
Isilanchimmate xe’nenni kalaqantara dandiitanno jifo ilama ajuuja noonsakkire, hexxo mudhitinore assitara dandiitanno;gobbano gobbate gede sakaalantino jifo giddo tuggara dandiitannoreeti. Ninkera gobbate gede xa noo qarri badheenni gobboomittete rosu isilanchimma qarri qara ikkinota roorimu sumuu assitanno.
Qarra tirate Mootimmate widoonni hala’ladda loossa mixi’ne loosoho e’noonni. Rosu iillo halashshate gobbaanni deerru deerrunkunni isilancho roso aatenni qansootu uminsaranna gobbansara hexxo ikkitanno gede dandiisate Poolise quxatenni hanafe addi addi rosunni xaaddanno hajubba aana xiinxallo kaima assatenni loonsanni hee’noonni.
“Rosu Isilanchimma Wo’munku Handaari Lophora” yaanno massagote qaalinni sayikki Sidaamu qoqqowi rosu sektere gambooshshe tenne lamalara harissino. Rosu isilanchimma aana xaano ofolline torba hasiissino. Gobbate deerrinni leellino woffi yiino rosaanote gumi rosu hiiqqamme sissinanni mala mala hasiissannota hawaqisinoho.
Ku’u ko’onne kulanna rosu hiiqqamino.
Sissannohu ayetiyya yiniro duuchunku ofolle torba hasiissannote. Mitu sai gashshootu seeranna rosu poolise ashiishanna,aliidi dirimira rosiisannohu eela safote rosiisiha kulanna hiiqqamme hala’litanni daggino. Kuni heewo ikkanno. Heewisama kayinni mine fano gashshitanno. Minu fano galilo eddarammannina sissate aana qubbichunni kula agurre illacha tuga hasiissanno.
Sidaamu qoqqowira rosu hiiqqamme aana torbate Qoqqowu pirezidaanticha kalaa Desta Ledamoha lendanna deerru deerrunkunni hajo la’annonsa bissa mitte barera xaaddino. Gambooshshe hanafisiisinohu qoqqowu pirezidaantichi kalaa Desta; “ rosu sektere aana xaaddinota gumu hiiqqamme dhaawate rumuxxitino soorro abbate qoqqowu mootimma hasiissanno irko assatenni murci’raanchimmatenni loossanni afantanno” yiino. Ee;murci’raanchimma hasiissanno.
Ilama egennotenna akatoomunni ikkadda ikkitanno gede dandiisate hananfoonnita qoqqowu rosu haaroonsa kaajjishatenni dureeyye rosu massagaano loosaasine hanaffinoonni irkonni qote qoteho isilanchimmate aana hiiqqamme mamaatiro torbanna rosu iillora diriirtino anga Rosu hiiqqamme sissate huru’mitannokki gede qaagiissate hasi’reemmo.
Qoqqowoho rosu iillo kaajjishate jawa looso loonse woyyaawino guma afi’noonniha ikkirono; egennotenni, akatoomunna dandootenni ikkadda qansoota kalaqate widoonni xaano foonqe noota songote aana shiqqino hedonni buunxoonni.
Rosaanote gumi ledo amadisiisaminohunni jawa foonqe hee’rase bikkinni rosu minna rosatenna rosiisate loosira injiitinore assa xaano sa’noommokki qarraati. Konni daafira qoqqowinkera rosu sektere aana qara qarrubba ikkitino hajubba bande rumuxxitino soorro abbate murci’raanchimmatenni loonsanni hee’noonni yiino.
Rosu handaari aana xaaddino gumu anjeranna rosu hiiqqammera korkaata ikkitino hajubba bandoonnita qoqqowu layinki pirezidaantichinna Rosu biiro sooreessi qummi assinoti qaangannite. Xisso anfiro xagichu leellanno. Qarru kayinni xissonna hiiqqamme noowa bada hoogate. Hiiqqamme noowa bande anfiro sissa shotate. Qoqqowi hiiqqammete base afate assino sharro naandannite. Kayinnilla bilchaatu hiiqqammete ogeessi hasiisanno. Sissanno ogeessano qajeelsa Mootimma la’anno. Dureeyye,rosaanote maatenna kaa’laano uurrinshuwa kayinni rosu iillora kartino jirsa techono hiiqqamme sissate aana mootimmate qote uurrito.
Rosiisaanotenna murrootu hattono supervaayizerootu ikkadimma dhaabbachisha ,afuu,shallaggotenna rosu seera woyyeessate jirsa kara hasiissanno. Rosu isilanchimma hajo “Eweli loosooti;ane may eessie?” yine agurranni hajo dikkitino. Rosu looso rosu minnara,rosiisaanote,mootimmate woy maatete facci assine agura gobbate deerrinni waaga baatisiissannonke umbe abbitanno.
Yaareed Geetaachew
Bakkalcho Sadaasa 11, 2016 M.D
