Addis Ababa: – Atileeticho Letesembete Gideyiyinna Tigist Assefiti Kalqete Atileetiksete Federeeshiine qixxeessitino baraarsha Itophiyu bareedda qeelansa Kalqete Atileetikse Federeshiine faajje assitino.
Kalqete Atileetiksete Federeshiinenna Kalqete Feeri pilay (fair play) komite gutunni assitanno jeefote doorshira lamenti Itophiyu bareedda Atileetooti qeelansa xawinsoonni.
Kalqete Atileetiksete Federeshiine umo assite faajje assitinohu Atileeticho Letesembet ikkanna; Federeeshiine diru dirunku danchu akati ispoortenyoota jawaachishate harissanno heewo mereero Atileeticho Letesembete Gideyiti qeeltinota faajje assitino.
Ontunna tonnu kumi meetire xeertinyinni heewisante qeeltinoti Atileeticho Letesembet Gideyi, Kalqete Atileetikesete Shaampiyoonira leellishshino danchu akati loosisenni baraarsha qeeltino.
Tenne atileetichora konni danchu akati loosisenni dirunniha danchu akati ispoortete mancho yaannoha Kalqete Atileetiksete Federeshiine baraarsha baraadhino.
Tayxe diro Hangaari Budapesetete harinsoonni Kalqete Atileetiksete heewo aana Itophiyaho ilantinoti Atileeticho Sifaan Hasenit 10 kumi meetire xiiretinyi jeefote heewo aana doddanni uwase harunsite; Atileeticho Sifaani ubbinowiinni Letesembet kaayissinose daafira konni baraarshira dooramaancho ikkitinota xawinsoonni.
Atileticho Letesembete uynoonnise baraarshi daafira addintanni hagiidhitinota xawissanni,”Atileeticho Sifaan ubbu yannara lowo gede masoomma; uwa hiitto assite xissitannoro seekke afoomma daafira jawa gede macciishaminoe” yitino.
Wocawaaro 13 kayise 21, 2015 M.D geeshsha Hangaari Buudapestete qaru quchumira harinsanni keeshshinoonni 19ki Kalqete Atileetikse Heewo aana Itophiyu ledo 195 Kalqete gobbuwa beeqqaano ikkitino.
Layinkiti Kalqete Atileetiksete Federeshiine qixeessitinoha baraarsha qeeltinoti Itophiyu bareda Atileeticho Tigist Assefite. Atileeticho Tigist Asseffiti xawu woy istaadiyemete gobbaanni assinoonni dodanshote heewo aana beeqqite kalqete riikoorde hiiqqatenni dirunnita doorantino atileeticho ikkite qeeltino.
Atileticho Addis Ababunni boode xeerti`ranno baycho Holataho ilantinoti, 400, 800, hattono maratoonete dodansho aana heewisantanni sa`ino. Tini Atileeticho gobbase Itophiya Afiriku Shaampiyooniranna Kalqete Olompiikera riqibbinote. Tini bareeda Atileticho Tigisti Asseffiti, dhaggeeffachishannota wiinamu saate borreessiisse qoleno riikoorde hiiqqatenniiti tenne qeelle baraadhinohu.
Jarmane Berliinete, Kalqete riikoorde lamu xiqqeesiinni woyyeessa dandiitinoti Atileeticho Tigisti; Kalqete Atileetikse Federeeshiine doorantino atileticho assite baraarsha aate faajje assitino.
Konnira Atileeticho Tigist Asseffit, xawu gobbaanni assinoonni maratoonete dodanshonni dirunnita doorantino atileeticho assite Kalqete Atileetiskete Federeshiine doortinota xawissino.
Tenne Atileeticho Kalqete Atileetiksete Federeshiine Kalqete riikoorde ama ikkitinota xawisatenni baraarsha uytinose.
Sennu Maratoonera riikoordete ama ikkitinoti Atileeticho Tigist, dirunniha ontu dooramino atiletooti giddora e`e qeeltino.
Bareeda Atileeticho Tigist Asseffit, Kalqete Atileetiksete Federeshiine qixxeessitinoha baraarsha qeelasenni jawu hagiirri macciishaminoseta xawissino.
Atleeticho Tigist tayxeha Jarmane Berliinete Maratoone heewo aana 2:11:53 lipheessinni eatenni seennu maratoonenni amadante keeshshitino riikoorde angasera qo`litinoti qaangannite.
Atileeticho Tigist ledo Neezerlaandawitte Atileeticho Feemekee Bool, Jamaayikawitte Atileeticho Sheriika Jakisen, Keeniyawitte Atileeticho Feeyzi Kipyegoninna Sheenizuweelawitte Atileeticho Yuliimar Royas jeefote ontu doorshira e`ino atileetootaati.
Federeshiine diru dirunkunni ispoortete akata jawachishate hattono baxxinoha heewote aana dancha looso loossino atileetoota heewisiisse kalqete deerrinni filte doorantino atileetootira baraarsha uytannoti anfoonnite.
Abrahaam Saamueel
Bakkalcho Sadaasa 4, 2016 M.D
