2017M.D layinki doyicho Itophiyu xarapheezu teenise federeeshiine kilabbate champiyoona Itophiyu Ispoortete Akkadaamera harinsanni hee’noonni.
Champiyoonu tenne lamala hanafote barrinni hanafi woyte Itophiyu xarapheezu teenise aantaanchu pirezidaantichi Injiiner Sisay Yohaannis heewote eora xawisino garinni; tini heewo lamunku koo/teenni jajjabbanna qacale heewisiisatenni aanino Onkoleessu agani 2017 M.D Maadagaskaarira assinanni Soojjaati Afriki jajjabbu champiyoonira beeqqitannonna Maaju agani 2017 M.D Nayjeeriyu owaantishshinni harinsanni Afriku qacalete champiyoona Itophiya riqibbe beeqqitanno gobboomu gaamo miilla badateeti.
‘’Itophiyu xarapheezu teenisera noose beeqqo luphiimu deerrinni leellishshanni no’’ yiinohu Injiiner Sisay; Itophiyu 45 dirra gedensoonni umi yannara Onkoleessu agnira Kuwataari Doha harinsanni kalqete champiyoonira beeqqitannore shoole seennenne mitto labballu godo’laano gobboomu gaamora doorsiisa dandaase lawishsha asse qummeessino.
Itophiyu Ispoortuwate Federeeshiine Borro mini Sooreessi Kalaa Qelbeessa Eeba isi widoonni; kuni baajeettete dirinni layinki doyicho amuraate ikkasi qaagiissatenni kilabbate mereero fayyaaleette ispoortete heewo heedhanno gede kilabba insa insawa rosicho soorridhanno gede assate qoleno ispoorte baqqi assate champiyoonu qeecha afi’rinota coyi’rino. Ledeno, champiyoonu kilawubba qajeelshinsa gumanna godo’laanote dhuka keenate kaa’lanno yiino. Gobbate deerrinnino jajjabbunna qacale ispoortenyooti dirinsa bikkinni xuma ispoortenyoota badate dandiisanno yiino.
Konni kilabbate champiyooninni tonne kilabba heewisantannoha ikkanna; Tigirayete qoqqowi teenisete gaamo koyisamaancho wosinchimmanni beeqqitanni leeltannota Budunna Ispoortete Ministeerewiinni afi’noonni mashalaqqe leellishshanno. Heewo lamunku koo/teenni hojjichunninna gaamotenni jajjabbunna qacalootu dirinsa dume garinni heewisiisatenni techo gooffannota fulino amuraatinni afa dandiinoonni.
2017 M.D Itophiyu xarapheezu teenise federeeshiine umi doyicho kilabbate champiyooni sai Arfaasi hanafora harisamase qaangannita ikkitanna; honse kilabba Itophiyu ispoortete akkaadaamera heewisiissinotenkanni.
Umi doyicho champiyooni Tuniiziyu Afriku champiyoonira beeqqitanno kilawe doorate, kilabba insa insawa rosichu soorro adhitanno gede assate, dancha riqiwaano ispoortenyoota badate hattono ispoorte noo deerra keenate mixo assidhinotenkanni. Sase diru taqqanni beehante lamunku koo/ teenni Arfaasa 2-5 geeshsha harisamino champiyooninni Itophiyu ispoortete akkadaame, Wowokima, Oromiyu Polise, Itophiyu Daddalu Baanke, Itiyo Elektiriki, Piingi Pongi, Feeniksi, Federaalete Polisenna sinu quchumi kilabba beeqqaanotenkanni.
Duucha illacha uynannansa leeltannokki ispoortubba mereerinni mitte ikkitinoti Itophiyu xarapheezu teenise Afrikahonna woloota kalqoomu heewote barubbara jawaachishshanno millimmo assinannise. Tennennino kalqoomu federeeshiine konni dirinni faranjete “May” aganira fushshitino kalqete gobbuwa xarapheezu teenise deerri garinni Itophiyu labballu gaamotenni kalqete 42kinna lAfrikunni kayinni 6ki aana leeltanno. Hakko garinni seennu gaamote deerri kalqete 50ki Afrikunni kayinni 9ki deerrira leeltanno.
Demmellaash Demmeqe
Bakkalcho Dotteessa 30, 2017 M.D
