Dirrate geeshsha murante keeshshitinoti wo’munku Itophiyi godo’luwa muli yannanni hanaffannota heewote qixxeessaancho ikkinohu Budunna Ispoortete ministere loosu mini qummeessinoti qaangannite.
Wo’munku Itophiyi godo’luwa miteekkite hee’noommo agani giddo Jimmu quchumi qixxeessonni hanaffanno yine agarranni. Babbaxxitino qoqqowubba wo’munku Itophiyi godo’luwara balaxote qixxaawora injaannonsa gede godo’luwansa harissanni afantanno.
Oromiyu qoqqowi balaxe heewo hanafinoha ikkanna Ambo quchumi qixxeessonni wo’munku Oromiyi godo’luwa harissino. Amaaru qoqqowi kayinni sa’u lamalanni hanafe 9ki wo’munku Amaari godo’luwa heewo ‘Ispoorte keereho, keeru baalunkura” yaanno massagote qaalinni Hoxe xawira harisanni afamanno.
Budunna Ispoortete ministircho Shewwit Shaanka heewote fanote amuraati aana afante sayissino sokkanni; “Isoortete godo’luwa heewotenni sa’e dagate mittimma kaajjishatenni keere, baxille, roduuwimmanna mittimma rosiissannoreeti.
Konni aleenni kalqenke aana Ispoorte addi addi dagoomittete, miinjunna dipiloomaasete loossa gumulate qara doogo ikkite owaattanni afantanno. Ispoortete heewubba quchummannita miinju millimmonna dagoomittete xaadooshshe baqqi assitanno.
Mootimma Ispoortete handaarira uyitino baxxino illachinni wo’mante gobbankera konni alba murante keeshshitinori Ispoortete heewubba hala’ladunni hadhanni afantanno” yitino.
Ministircho amadisiisse; honse dirra ale murante keeshshitinota wo’munku Itophiyi godo’le sufisiisate Ministerete loosu mini qoqqowubbatenna quchumu gashshootta ledo mixi’re hasiissannota balaxote qixxaawo assatenni loosu giddora einota xawissino. Baalanti qoqqowubbanna quchumu gashshootta wo’munku Itophiyi beeqqora uminsa heewo harissanni afantannota coyidhino.
Amaaru qoqqowi layinki pirezidaantichi Abdu Huseen (Dr) isi widoonni; Ispoorte keeru hayyo giddo harinsanni mittimma kaajjishshannote yaanni xawisino. “wo’munku Amaaru godo’luwa mannimma xawinsanni qooxeessira Dese harinsannita ikkasenni baxxitannota assannose” yiinohu aantaanchu gashshaanchi; Ispoorte wedella mannimmatenni bowirtinore miinjunni kaajjitinore, bushu amalinni keeraabbinore assitannonsa daafira kaajjite sufa hasiissannota huwachishino.
Ledotenni, Ispoorte gutunniha hidhaancho rosiishsha gobbate gede gatamaratenna gobboomimma rumuxxisate kaa’litannota ikkasenni mootimmate gede illachinshe loonsanni yiino.
Amaaru Qoqqowi Wedellunna Ispoortete Biiro Sooreessi Irziiq Isa; wo’munku Amaari heewo illachi riqiwantanno ispoortanyoota kalaqanna mimmitu xaadooshshe kaajjishatenni qoqqowu keere kaajjisha ikkinota xawise; Jimmu quchumira harinsanni wo’munku Itophiyu godo’luwara qoqqowo riqibbannore ikkadda heewisamaano badate heewo harinsanni hee’noonnita coyi’rino.
Ledotenni 6ki Benishaangul Gumuzi Ispoortete godo’luwa sa’u lamalanni hananfe harinsanni hee’noonni. Fanote amuraati aana leelte hasaawa assitinoti Budunna Ispoortete Ministere Budunna Afuu Latishshi Handaari Minister Dieeta Nefiisa Almahidi; mootimma gobboomu deerrinni Ispoortete lopho aana xaaddinose hiiqqamme dhaawatenni Ispoorte fakkanimma kaajjishshanno doogonni loossanni afantannota xawissino.
Ispoorte gobbate mootimma su’ma seekkate noose qeecha huwatatenni seeda dirrara babbaxxitino korkaattanni murante keeshshitinore Ispoortete heewubba hanaffanno gede sharro assinanni hee’noonnita Ministir Dieetitte huwachishshino.
Ledotenni, tenne Ispoortete heewo hanafo wo’mante gobbanke qoqqowubbanna quchumu gashshootta Ispoortete ogeeyye mitte basera gamba assite dandoo noonsare doorantino Ispoortanyoota filatenni Olompiketenna wo’mante Afriku godo’luwara qixxeessate illachishshinota ikkaseno huwachishshino.
Bambaasi quchumira harinsanni hee’noonniti 6ki wo’munku Benishaangul Gumuzi Ispoortete heewo 17 woraddaranna mittu quchumu gashshooti mereero 11 Ispoortete daninni Onkoleessa 14/2017M.D geeshsha keeshshitanno.
Qiddist Gezzaheny
Bakkalcho Onkoleessa 7, 2017 M.D
