Halantino Mootumma Daramaasinete Aliidi Komishiine (UNHSIR) maakisanyote barra fushshitino xawishshinni kumunni kiirranni Ertiru daramaasine hajo yaachishinota ikkitinotanna hudeno gawajjitanni noota egensiisino.
Komishiine xawissanni, Tigirayete Qoqqowi giddo noo Mayi Ayininna Adii Harushi yinanniwa daramaasinete minna giddo 24 kume ikkitanno Ertiru daramaano no; Kuri daramaano qoqqowu giddo noo qodhaasinenni gawaajonna wajjishiisha iillitanni noo yiino.
Qodhaasine Ertiru daramaano galtannowanna caa`litanno minna giddonna qooxeessaho no qarqarira heedhe xiyyiite tokkosanni noota egensiissinoti Komishiine, konni korkaatinni daramaanote aana jaddo iillitanni nootanna sagalenna addi addi kaa`lo afidhanni nooikkita egensiisino.
Baxinohunni, Mayi Ayiii yinanni daramaanote minna qooxeessa daramaano reytinota halalaancho mashalaqqe iillitinonsata kultinoti Komishiine, qodhaasine kalqete seera ayirrisaranna daramaanote keere agartara hasiissano yee woshshatto assino.
Daramaanote minna giddo noo komishiinete loosaasine ledono xaadooshshu muraminota komishiine xawissino.
Gallanni minna giddo tenne yannara sagalenna xalalu anganni way hattono xaggichu shiqqo nooikkita xawissinoti Komishiine, hudeno daramaanote aana jawa gede yaachishinota ikkitinota kulino.
Konni ledo amadame, sa`u lamalara Daramaanotenna Dartotenni Wirro Qoltanno Ajense, Juntu qodhaasine daramaano galtanno minna qooxeessa eansa harunse ajanna 6 daramaano shinoonnita xawinsoonniti qangannite.
Ajense suffe, kalqete dagoomita mannihimmate qooso sa`e Juntu qodhaasine daramaano galtanno minna qooxeessi giddo jajjabba olu uduunne wortinota, tokkossinota, daramaanote owaante uytara qixxesinoonnitanna uurrinsoonnita Fayyimmate uurinshubbanna Ambulaansete kaameella qoleno safote latishuwa olu loosira calla hosanno gede assa, Konni korkaatinni ajanna lamu daramaano xagisira hoogge reytinotano, amuwuno gawajjote reqecci yite iltanni noota xawinsoonnit qaangannite.
Konni ledo amadaminohunni, Ameerikuuti Gobbaydi Hajo Afuu saaysaanchi Jeliina Porteri uyno xawishshi garinni egensiisinonte gede, Ertiru daramaano Juntu qodhaasine shitanninna waajjishiishanni noota Ameeriku Mootummara halaalaancho mashalaqqe iilitinonsata qaagisitino.
Kuni daramaanote aana iillitanni noo rewonna gawajjo hattono waajjishiishshu rahotenni uurranno gede xa`minohu Afuu saaysanchi, Tigirayete qoqqowira noo qodhaasine Ertiru daramaano aana iillishanni noo jaddo uurrisanno gede xa`mitinoti qaangannite.
Abrahaam Saamueel
Maaja 22 , 2013 M.D
