Itophiyu qixxeessonni harinsanni hee`noonni kalqete wedellu xawu Teenisete heewora, Itophiyu Teenisete heewisamaano dancha millimmo assitanni no. Heewote 24 kalqete deerrinni fultinori 45 ale ikkitannori dironsa 13 kayisse 18 geeshsha noo heewisamaano beeqqaano ikkitanni afantanno.
Lame doychonni jeefisamannohu “International Junior (“J-30) Addis Ababaho” yinanni xawu wedellu Teenisete heewo harinsanni afammanni. Labbanno heewo Itophiyaho qixxaabbinohu sase hige ikkanna; wedellu mereero qixxeessinoonnihu layinki doychoot.
Umi doycho heewo Bocaasu 15/2016M.D hanafe Addis Ababaho Teenisete kilawera harinsanni hee`noonniha ikkanna; barrubbate albaanni jeefino. Laynki doycho heewono harinsanni hee`noonni. Bocaasa 30/2016M.D jeefisamannota kulloonni.
Heewo Itophiyu teenisete Federeshiine Kalqete Teenisete Federeshiine uytino kaayyo horoonsidhe Addisi Ababu Teenisete kilawe ledo halamatenni ikkinota qummeessinoonni.
Tenne heewo 500 kayise 1 kumi kalqete Teenisete deerri noo wedelli beeqqaano ikkitanni no. Konni deerrinni woroonni higgino heewisamaano heewo beeqqa dandiitannokkiha ikkanna; heewo beeqqate mitte mittenti bixxille waaga afidhino.
Lamunku koo/teenni harinsanni hee`noonni Itophiyu 5 seenninna 5 labballinni xaphoomunni 10 heewisamaanonni riqiwante hexxo assinanni millimmo assitanni noota Itophiyu Teenisete Federeshiine egensiissino.
Itophiyu heewisamaano konni albaanni noo heewonni woyyaawino heewo leellishanni afantanno.
24 gobbuwanni filloonniri kiironsa 45 ale ikkitinori doorantinorinna dhaggete aamamooshshu noonsari 13- 18 diriri qacale ooso heewisantanno heewo Itophiyu heewisamaano guma abba hooggurono jawaata heewo harissanni noota xawinsoonni. Konni albaanni noo heewonni 2 seenninna 2 labballi heewonni xaphoomunni 4 Itophiyu heewisamaanonni kalqete deerra afi`ra dandiitino. Jeeffino umi doycho heewora, lamunku koo/ tenni layinki doychora sa`inoha nafa ikkiro hakkiini sa`e ha`ra kayinni didandiitino.
Kalqete Teenisete Federeeshiine, heewo harisate hasiisanno woxu irko assitannokkita Federeeshiine xawissino. Heewisamaano borreessanna heewote isilanchimma qorqoratenni haammata looso loossino. Federeeshiine umisenni woxu fulo assite heewo amaalannoha gobbayidinni abbatenni heewo harissanni noota egensiisino. Heewo Ispoonserete afi`nanni woxinni harinsanni hee`noonnitanna kalqete uurrinsha ogimmate irko assitanni noota qummeessino.
Wedellu heewo aana woxu baraarsha fajjinanniha ikkinokki daafira, heewotenni qeelantanno heewisamaano 30 bixxille afidhannoha ikkanno. Qeeltino hewisamaano afidhannohu bixxille konni albaanni noonsa bixxille aana lendanniha ikkanno. Kalqete aana noo deerransa ledanno. Heewisamaano kalqete aana noonsahu deerru hiittenne kalqerano qixxeessinanni heewora balaxxe heewisantanno gede kaayo aannonsaha ikkinohura kaajjado heewo heedhanno.
Jeefamanni noo Faranjete diri geeshsha bixxille afi`ra dandiinohu mittu Itophiyu heewisamaanchi nookkita xawinsoonni. Itophiyu tenne heewo qixxeessatenni calla heewisamaano bixxlille afi`ra dandiitino. Konninni afi`noonni bixxille kalqete deerri giddora ea dandiitino daafira Itophiyu su`mi kalqete Teenisete deerrinni borreessantino gobbuwa ledo mitto ikkinokkita qummeessino. Tenne heewonni umi doychora guma afi`ra hooggurono, leellishino millimmo layinki doychora agarranni gede assitinonsa.
Itophiyu Teenisete Federeeshiine Loosu Gumulsiisaanchi Kalaa Mikaaeeli Nugusehu, Itophiyu heewo ganye qixxeessasi Itophiyaho noo heewisamaano woxu fulo gatisannonsata huwachishino. Ispoortenyootu dancha ikkitino tekiniikete ikkadimma noonsaha nafa ikkirono, heewo afidhannokkiha ikkannohura hakkone qarra tirate umonsa ammana dandiitanno gede irkisannonsata xawisino. Kalqete deerri heewo haammata kiironni heeowote hasiisannoha safote latishsha wonshitanno gede assanno. Ispoortete gaammanni bajeette boode ikkitinohuranna gobbate giddo heewo hala`litinokkihura togoo kalqete deerrinni qixxaabbanno heewo kalaqama gobbate giddo noo heewo kakkayisatenna Ispoorte lossate jawa horo noosi.
Ledoteno, Itophiyu wedelli assanni noo millimmo hexxo aannoho. Albillicho noo heewo quqquxamatenni agarrannita assinota coyi`rino.
Heewo aleenni hee`re massagannohu woy gashshannohu Kalqete Teenisete Federeeshiine, Teenisete heewo lossannori giddo mittu wedellu heewooti. Konninni, Itophiyu Teenisete Federeeshiine irkisatenna hattono Ispoorte lossate togoo heewo qixxeessatenni fajjo uynanni. Mitte hanaffanni noo gobbara mitto diro qixxeessate kaayyo lame hinge calla fajjinanni. Itophiyu konni albaanni qixxaabbino heewo danchu garinni qixxeessitinohura, sayikki doychora kaayyo afi`ra dandiitinota qummeessino.
Abrahaam Saamueel
Bakkalcho Bocaasa 27, 2016 M.D
