Hawaasa:– Itophiyu gobba, giddoydinna gobbaydinni addi addi diini qassanno woyte gobbanniti gargartote olanto calla ikkitukkinni badhensaanni kaa`lonna irko ikkite qeelletenni higganno gede assitannoti jawa dagate wolqa noota afa hasiissanno. Tini wolqa olantote hasiissannore shiqishatenni kayse basete geeshsha lelle waaga baatatenni qoteho uurre olanto bareendete olansa suffanno gede qeechansa fultanno.
Itophiyu aana ka’anno kiphonna gaance gargarranni yannara badheenni heedhe jawa irko assitannori amuwahonna seenneho yiniro batirannoha di-ikkanno. Konnira, xa tenne yannara gobbate giddoydinna gobbaydinni xaadino qarranna kiso badhera qolate jawa qeechansa fultanni noori giddo Sidaamu amuwinna seennu kullannireeti.
Xa tenne yannara gobboomu deerrinni gargartote olantora assinanni hee`nonni irko giddo mitte intanni sinqe qixxeessate. Konnira, Sidaamu qoqqowi Meentu, Qaaqquullunna Wedellu Biiro wolootu roduuwu qoqqowubba meentinna seenninsa gede konne looso loossanni leellitanno.
Meentu, Qaaqquullunna Wedellu Biiro Sooreette Baabba Faantaye Kabbaditi baxxinohunni Qoqqowu Mootimmate Kominikeeshine Hajubba Biirora uytino xawishshinni; Tigrayete qoqqowira Juntu HWHT gaamo fantino oli aana, gobba diinu diiggannokki gede agarte noo olantora saga`late ikkitanno sinqe woy doogo intanni sagale qoqqowu deerrinni qixxeessinanni hee`noonnita xawissino.
Qoqqowu meenti gargartote olantora woxe kiisensanni fushshe gamba assanno yine hendannihu 1 bixxille 5 miiliyoone birri giddonni xaa geeshsha fushshinonnihu 900 kume ali birra ikkannota qummi assitinoti Faantaye; suffino yannara wedellu meenti mundeensa aatenni hattono deerru deerrunkunni noori gashshootu tantano addi addi kaa`lonni beeqqaano ikkitannota xawissino.
Gargartote Olantora addi addi uduunni irkono assinanni, basete geeshshano ha`ne olamatenna Itophiya gatisate qoqqowu meenti qixxaawe noota Baabba Faantaye egensiissino.
Abrahaam Saamueel
