Addis Ababa:- Cancishaanchu HWHT lekkisaano ikkitinori qubbuchunni kiirranni manni shiqishino hedo batinye Itophiyu daga xa’mo lawisatenni Ameeriku olantosi Itophiya eessanno gede xa’mi’nooninke yaatenni shiqinshoonni hedo Itophiyu keeraanchimma xiibbannota ikkase Addis Ababu yuniversitera seeru rosiisaanchi Dr Maannaye Zegeyyehu xawisi.
Dr Maannaye Ameeriku Kongiresera Afriku hajubba shiimiidi komite murritte Keeren Basi tenne lamalara Afriku mittimma ledo assitino hasaawira Tigrayete noo qarrira Ameeriku olantosi soyaanno gede gobbaydi gobbuwara heedhannori Itophiyu daga xa`mitinoe yitinota qaagiissatenni; togoo hedo Itophiyu keeraanchimma xiibbannota ikkase egensiisino.
Kongiresete miila gobbayidi gobbuwara heedhannori qubbichunni kiirranni manni cancishaanchu HWHT lekkisaano shiqishshino hedo batinye Itophiyu daga uurrinsha lawanno garinni shiqishase gara ikkinokkitano buuxissino.
Olu hedo Soojjaati Afrika cancishate mixo noosiho yinohu Dr Maannaye; qooxeessu gobbuwanni saeno babbaxxitino hasatto noonsa gobbuwa kaajjado gaance xaaddansara dandiitannota coyi`rino.
Kongiresete miilla shiqishshino hedonni Itophiyu giddoydi hajora olase mereero eessa keeraanchimmate seera xiiwanno. Batinye kalqete gobbuwa illacha ikkinoha Soojjaati Afrika hembeelsate sharreeti. Kalqoomu dagawiinni heedhasira dandiitanno dawarono ayirritannote yino.
Ameeriku Itophiyu haxo heeshshi assate Gibitse lekkisatenni haaroo`mate kofatto hajo kalqoomu ga`labbote amaale minira massatenni xaaddinosi gibbonni saalfattinota qaagiisinohu Dr Maannaye; xaano kalqoomu seera xiiwatenni Itophiyu keeraanchimma qaccera qolte aguratenni heddino olu hi`ra Soojjaati Afrika cancishate mixo noosita coyi`rino.
Ameeriku, Itophiyu mite mite giddoydi hajora anga worasi rosamino coyeeti. Ikkirono Itophiyaho soqqamaanchonna laafa mangisite biilloonsate baxxino garinni loonsanni hee`noonni sharre gawajjitannote yino. Kalaqoomu seerinni wole gobba keeraanchimma xiiwa, gibbo kaima assatenni wolu aana adhinanni qaafo woy anga worate harinsho jaddo ikkitinota egensiisino.
Kalqoomu seeri garinni olu hi`ra gadacha ikkannohu mitte gobba giddo kalaqamino qarri kalqete keeraanchimma gawajjanno yine ammanniro callaati yinohu Dr Maannaye; juntu seeraho dihirameemmo yaasi ledo amadisiisame hananfoonnihu seera agarsiisate gaado tiiu widira soorramirono hajo gobbate wolqate aleenni ikkitukkinninna hiikkano taraawinokki olira anga worate assinanni sharro hiikko seerirano adhamooshshu noosikkita huwachishino.
Ameeriku affanni uulla noo halaale kaphunni raqaxatenni odeessitanni Itophiyu giddoydi qarri roorenkanni sarraaqamanno gede assatenni techo mitiimmara assitino sharre luphima ikkinota buuxisino.
Itophiyu giddoydi qarra umise wolqanni tira hanaffanno woytenna keeraanchimmate balaxo aatenni addi addinni ola uurrisate gumultu yannara maano yitinokkitinna danchummasi leeltinosikkihu Ameeriku “Itophiyu Diyasipoori xa`minohura Itophiyaho olu hi`ra asseemmo” yaasi kalqoomu seera xiibbino mixo ikkase xawisino.
Itophiyu aana hananfoonnita tiiu ola dagate mittimma kaajjishe harisate ledo qoteho kalqoomu dagara uulla noo halaale leellishatenni Ameeriku sharre ayee woyteno xawo fushshate looso kaajjishshe sufanno gede huwachishino.
Abebech Maatewoos
Maaja 22, 2013 M.D
