Sayinseemmo yanna heeshshonke gidoo bacare rosiissannonke. Ga’a dancha heeshsho hee’ratenna halchineemmowa iillate techo hexxo mudhinummokkinni kaajjinenna jawaante wo`naala noonke.
Manchi beetti heeshshosi giddo duucha yannara hexxo mursiisannori xaadasira dandaanno. Bacu manni hexxo murtanna; woloottu kayinni qarrubbansa kaajjillunni sa’e sufino wo’naalsha assatenni hendoonnikki seyoora furduggi yitanno. Korkaatuno, wo`naalshu manchi beetti albaagge noosi ajuuja leellishshanno harinshooti.
Agadhinoonniri harancho yanna giddo seyaa hoogino daafira heeshshonke giddo umbe ganteemmohu gede assine adhanna heda dihasiissano. Umbe, ka’’atenna kaajjine sharramate kora ikkitannohura hiittenne yannarano waajja dihasiissanno.
Techo ho’ronsi’neemmota caabbichu Ampuulle kalaqe loosino manchi 999 hige wo’naale hooge 1000ki wo’naalshira xawisinote. Isino Toomaas Edisen yaamamanno.
Lowota Toomaasi anjesinni kayise maccatenni dibuuxanno. Umosi dimishannohonna hexxo dimudhannoho.
Ampuulle xawise kaihu gedensaanni togo yiino “999 hige Ampuulle xawisa hoogoommoha ikkikkinni; hiitto ikkite Ampuulle xawa gibbannoro afoommo woy rosicho adhoommo” yee coyi`rino.
Uwa kaajjishshanno; busha wo’naala agurre umboonni basewiinni ka“a hoogatellana.
Konni daafira, mittu coy xaadannonke woyte ranke hexxo mudhinoonke Wirro wirro qolle wo’naalate jawaanto ikkinnina.
Ka”a heedhunte gede uwano ledo noohura kaajjado ikka xa`manno; uwa kayinni kaajjado assite wirro rosiisse kayissanno. Uwe rosicho adhe kaino mancho shotu garinni xiimbe karre didandiinanni.
Addaho arrawu miqichiweelo ikkirono manchi beetti wodana hiiqqate, hexxo mursiisate, badhe qolate kaajjadu dhuki noosi. Ikkollana, uurrisahera dandaannohu mittu heeriro, atenna ate callaati; doogokki aana wo`ma wolqakkinni qaafi, wo`naali.
Tenne uulla aana mittu kalaqami qarru aana hee`re hexxo mudhikkinni heerannohu no. Isino ayeti yiniro Raachaho. Raachu injiitino itanno sagale diafirinoho, waa saga’le, isi giddo hee`re, isonni bulbu’le, isi giddonni gale hee`rannoho. Ha’re woloottu kalaqami gede halchinowa hose daate lekkasi laanshaabbe qarrisseenna qorra uddire hee`rannoho.
Raachaho raga baala heeshsho tunsite qarrissino kalaqamaati. Kuni qarri xaadisita hexxo mudha giwe hiikkiyya? Ka”e kubbanni hedinowa baala iilla hanafi. Koye kubbe ko`o kaxxanno. Hexxo mudhoommero konne qarra qaage, ofollinowa hee`reenna yaaddo calla shitannosinkanni. Konnira hexxo mudhinoonke wo’naalle kubbine qaafate jawaanto.
Heeshsho woyyeessi’rate millisanno manchi duucha yannara assanno sharronni xaadannosi qarranna guffa baala qeele sa“asi digattannote. Jawa ajuuja amade loosi’rannonna sharramanno manchi jeefoteno hasattosi wonshi’ranno barri xeerto dikkanno.
Manninke maammahanni “baxxu gede bushsheenna doobbiichu hayisso di`itanno yaanno. Rodoo`ya heeshsho baxxu gede injaa hooggeennaheno hexxo mudhite, bashshono anera kaayyo dinooeho yite badhera qaaffooti. Heeshshotero kakkacha rosiisaanchooti; rosiisaanchu rosiise fonqolanno heeshsho kayinni fonqolte ka`e rosiissannote. Tenne giddo agaramannohehu jawaatatella. Yannakki garunni horonsidhe techo assa hasiissannohere assite sai.
Abbebech Maatewoos
Bakkalcho Bocaasa 20, 2016 M.D
