Maxari shiima suuqesira muli xeertora noo barcimi aana ofollino; sigaara qubbesi mereero rarraasi’re mitte hige huuwiro wiliile sa’’anni higanno ayyaani gede doyichosira doyitanno gede assatenni suumesinni seedise goshooshe tunnuqqi assanno.
Umisi gaacheeni macciishamaasi gede assannosihu gede asse hedatenni sigaara wiliishsha hanafinohu lemiikki dirisinniiti. Mittu sigaarchi rosichu widira soorrami; hakkiinnino wiliishshikkinni mitto barra qaafa didandiino. Galtesi Seekkitu, oosonsa daafiranna mitteenni massagganno heeshshonsa daafira qaagatenni aguranno gede huuccidhinosinkanni. Isi kayinni uurrisate yanna noosita umisi giddora qole coyi’ratenni balaanka woyte ise amaalenna seejjo balalsenna mulaagise agura roorsi.
Barrunni mitto barra Seekkitu minaamasi beettise Maassamo ledo suuqete waalchira kice amaxxite qu’mutti yite ofoltinowa suuqete giddonni lolloqqite fultannota seeda wiliile la’e haxo wirri yitanno woyte beettise Maassamo hashaashatenni ‘’haxo ta’’annohe geeshsha qiqqishantanni la’’ate shetattahu marichi haaru coyi hee’reennaati, ama? sigaaru wiliile bashshonni diafoottantella; hakko iso rosiisaanchinke ispoorte loosiisanni macca’ne amaddine kawa ka’a wirrijjamme yaannonkehu gede kicekki aaninni angakki kaysitakkinni wirri yii yee ayi hajajeennaheeti?’’ yee oso’linohu gede ikke xa’mise.
Seekkitu sano uddidhino darbatinni amaxxite ‘’ane baitta; qaaqqo’ya baxe ikkoommate! techoti sigaaru wiliile bashshotenni eewanni baxxitinote- fengo giiranteenna fultannota labbanno; hakko iso techo sigaari fooli bashshonni baxxe shilqinohuraati, bowateronna xiniinatero su’niissi’rihu afona.’’ yite giddosera qolte ‘’Magano qaaqqikkira yite tenne shshetto daggino qoli’’ yitu.
Hakkiinni harunse Maassamo ‘’eewanni ani xaalla hegerse su’niissoommo; wonankunni sigaaru wiliilenna foole ikkase agurranna hiittootero dibadoommonkanni; techoti mayra baxxitinoro afoommo; anni’ya techo wolu dani sigaara wiliishshanni no yaate. Dihattootikka, ama? isi konne badooshshe bade afinokka?’’
Seekkitu qolte ‘’eewanni, yaatto gedeentinna ane maala’lisannoehu ninke isinni roore wiliishshinanni hee’noommo yaate’’ yitu.
Maassamono ‘’wonana hattootiwe; hakko iso ninke isinni roorrummokkinni diganteemmo; mayra yiittaro sigaaru foole rosicho assi’ratenni sa’ne hiitte wiliile hiikko sigaaritero badate ogimmanni maassammoommore lambeemmo yaa dandiinanni.’’
Xaate ontayina ontikki dirosiiti; yanna hadhanni noonkanni. Dokiterootu qaalla xaano maccasi giddo raartannilla no; ‘’shombikki lowontanni gawajjamino, xa sigaara uurrisa hoogittoro, jawa yanna hooggahera dandiitanno.’’ Uurritannokki buusano, foolu hara’ma, daafuru-baalunkurichi xa tiro afi’rinoho. Anga amadino sigaara lai; giira shotu garinni xabbanna, bisisi giiramara sharramanna.
Maa’nu qaaqqisi Maassamo balallaqa illesi co’immatenni wo’miteenna isiwa hige dodi. ‘’Anna, duucha woyte mayra wiliishshatto?’’ yee sanosi huuncanni xa’misi. Maxari wodanisi hundaanni hunaanchimmate macciishshamme ruxxeessitannasi ofollinowa heere goowa gotti asse laisi. Rosichu oososi hiisse kisannoro hede diegenninonkanni. Maassamo anniweele lophinohu gede, galtesi callichose sharrantanna, oososira seekkeennansa la’’ate hexosi bubbete wiliile gede shididiixitanna hedi.
‘’Kuni goofimarchi’yaho’’ yaanni Maassamora qolantenni umisinkura hashaashe coyi’ri.
Maassamono qaalu tiro afikkinni muushshi yii. ‘’Danchate! ama wiliishsha bushate yitanno. Ikkollana atino duucha woyte buussanni nootto’’ yaanni coommadu afiisinni qasisi.
Maxarino lawisiisate geeshshira muushshi yii. Angasi fane Maassamo gulichisi widira goshooshe, qaaqqimmasi bisi iibbilli gagasisi aana macciishshamannasi.
Maassamono hanqafinosiwa hee’renni ‘’Anna‘’ yiisi marro. ‘’Anna lophummoro woxe hiisse afi’reemmoro rosiisattoe?’’ yiisi. Xa’mosi hedeweelcho ikkiteennasi maala’lanni ‘’eewa’’ yii masillaancho huuronni; xaanni isi giddo albillichote yannasi la’’ino. Soorro abba hoogiro xa anfoonnikki dirranni miteekkeno agannate giddo murantannota diafinonkanni. Maassamora annisi dawaronni albisi xawi. Umosi annisi qoti aana irkisi.
Maxarino umisira qaale ei. Maassamo hixamanye hexxo uytusi. Marro heera hasiissannositano ammani. Reyoo Maassamo daafira yee waajji. Murancho sigaara lame qubbuwasinni amade hashshsi beeddakko la’’anni jeefoteno baattote aanira qole tuge lekkasinni kakkade cancani. Heeshshosirano umikki yanna hagiirri macciishshamisi.
Demmellaash Demmeqe
Bakkalcho Badheessa 4, 2017 M.D
