Mitto barra mittu manchira bisisi kifilla giddonni anga, lekka, illenna godowu giwantino yinanni. Gibbonsa kaimi kayinni loosoho harate yannara rakke qaaffannoti lekka loosose kultanni ani lekka marrannikkiwa maranni, fullannikkiwa fulanni kinnanna guffa gantanae haranni mare iille abbummaha ati ledo’ya daafuritokkinni saalfatattokki ogori kuni xaphilla assatto yitanni godowa xonte morkite sammi yitanno.
Layinki ikkiteno anga loosose kultanni “ani anga intayire hasanna reeqqu, utu, billawu, qottonna wenennu baalu xaranni maala’ya haaranna loose fushshoommaha baala daafurittokkinni agarte gamballa assatto qafichchu kuni yitanni iseno godowa xonte agurte morkitanno.
Aanteteno ille loosose kultanni “ani ille baalankare laeenna anfe abbiniha roore anga ani afira heedheennae ati mittu callu xaphi assattori maati” yitanni godowa bushiishshu. Tini sasenti bisu kifillano gamba yite hasaabbannoti xaa yannanni hananfe loosonke uurrinseenna godowuno loose abbe itona yite sumuu yitanno.
Manchuno albi gede laweennasi qaafara hedanno woyte lekka uurra, anga amada hattono ille la”a gibbusi. Manchuno galagale kainowa qole dolli yee hee`rennanni barri sagale yanna sa”anno.
Godowuno bashsho rosino yannara sagale agadhe hoogita godooda hanafi. Tenne macciishitino baarigaarrasi iilli’noommohena yitanni mimmitu ledo hasaabbanno. Godowaho giddo noori goofita angano lekkano daafurtanno, wolqansa ajjanni daggu; illeno ximbi’litinowiinni fa’na hooggu. Tenne yannara baalanko bushshanni dagginota affuti surre halaale farcidhanno gede anga, lekkanna ille amaalante surrete affini massitu. Umisenkura waajjitino surreno affino haadhe maahoyye yite araarsitanni godowu baalanka roore ikkinota farcidheenna baalunku reyotenni gatte albinte gede xaa geeshsha baalunku godowu ledo sumuu yite heedhanno yinanni. mittu hee`ra woleho jawaantetenna irkote!
Bue:- Tuqu xaadooshshinni
Abbebech Maatewoos
Bakkalcho Badheessa 11, 2017 M.D
