Baalunku manni kaayyote daafira babbaxxino laooshshenna tiro aara dandaanno. Mitu manni kaayyo garunni xawisara dandaanno; wolu qole sodhino doogonni tire huwachishshara wo`naalanno.
Hiikku coyino kaayyotenni ninkewa daa hoogiro maa assano ikko gumula didandiineemmo yine heda kaayyote daafira noonketa sodhino tiro leellishanno.
Togoo laooshshi noosi manchi wolootu seyoonna danchumma la”e hakkuri mannooti kaayyaataamma ikkitinota, isi kayinni kaayyiweelo ikkino gede asse hedanno. Konni laooshshinni kainohunni mitto widoonni “kaayyaataamo ikkoommokkihura diro’ya wo’ma konni garinniiti sayiseemmohunna xiiweemmohu” yaatenni yaade heeshshi yee ofollanno.
Togoo manchi heeshsho kaayyaatamunnitanna kaayyiweelu xawo ikkitino gede hedannohura umosino kaayyiweelu gede asse kiiratenni mannu woriidiha ikke hexxo mudhe hee’ranno.
Wole widoonnino mito mito woyte isi daafurinokki coyibba xaaddannosi woyteno qixxaawa ayimmanna laooshshu noosikkihura tunceessuwasi baala kaayyote widira soorrate dhuki dihee’rannosi.
Hiikkonne coyeno afi’rate isiwinni agaramanno coye assa noosita huwatatenni millisanna loosa kayinni kaayyote daafira gari tirooti.
Tenne labbino lao noosi manchi wolootu gummaamimmanna seyoonsa doogo la”e kuni manni maricho asseeti konne deerra iillinohu yee xiinxallatenninna lawishshimmansa safo assi’re horoonsi’ratenni kaajjenna jawaate loosi’ranno. Ayee coyinni hinko ga’mire sharramanno ikkinninna badhe dihiganno.
Kuni manchi loosisinna daafurisi guma afi’ranno. Ledoteno mite mite isi daafurinokki coyibba xaaddusiro giddoydi kaajjillinna qixxaambe noosihura tunceessuwa baala kaayyote widira soorranno.
“Kaayyo yaa tunceessuwanna meessi qixxaawo xaadduro” yaate yinannihu konniraati.
Konni daafira umo’ne danchu tii”u dhukira qixxeesse! umo’ne mite mite hayyubbanni qixxeesse! meessaneeto’ne danchu akatoominni qixxeesse! togo assitiniro addintanni ki’ne kaayyaattammaho.
Haaqe`ne wonshate, doogo`ne ha`rate, kalqete ledo hettisamate, loossine woyyaawate hiittenne kaayyono horoonsi`ra hasiissanno. alba`ne noo kaayyo baala qineessitinenna suwissine horoonsi`ra hoogginiro heeshsho`ne gufisanno coyi batirara dandaanno.
Tenne kalqera hee’noommori haammatu manni “uminke umonke xagarreemmoreeti. Mitto xaadinonke tunceessa dancha kaayyo widira soorrate yawo noonketa diwodanchineemmo. Konninni kainohunni umonke qorichinshanni leellineemmo yanna no.
Konni daafira umo’ne danchu tii”u dhukira qixxeesse! umo’ne mite mite hayyubbara qixxeesse! meessaneeto’ne danchu akatoominni qixxeesse! togo assitiniro addintanni ki’ne kaayyaattammaho. Xaano ikkiro kaayyo gumu widira soorra dandiinanni. Dancha barra ikko`ne!
Abbebech Maatewoos
Bakkalcho Badheessa 25, 2017 M.D
