Paarisete 2024 Olompiike balaxote qixxaawo lainohunni Itophiyu Olompiike komite IFDR Budunna Ispoortete Ministere affukkinni looso loossanni noota qummeessinoonni. Itophiyu Olompiikete komite ise widoonni mootimma affinokkki looso loossanni nookkita egensiissino.
Faransaye dhaggetenni sayikki yannara qixxeessitanno 2024 Olompiike harisate aganna calla gattinoti anfoonnite. Konne harunse Itophiyu Olompiike Komite mitto diro balaxxe babbaxxitino qixxaawo hanaffinota hattono Awuropaho noo Itophiyu qansoota gamba assate widoonni loossa loosate aana no.
Ikkollana, komite loossanni noo looso aleenni heedhe massagganni nooti Woganna Ispoortete Ministeere affinokkita xawissino. Tenne lamalara 27kita Maqalete Quchumira harinsoonni Itophiyu Atileetiksete Federeshiine qixxeessitino xaphoomu songo aana afaminohu Woganna Ispoortete Ministeere Ispoortete Handaari Minister Deetichi Ambaasadder Mesfiini Cherineti Mootimmate harinsho xawisanni; “Paarisete Olompiike balaxote qixxaawo lainohunni Komite mixo shiqishshanno gede xa`minirono ikkado dawaro qola hoogatenni sae, Itophiyu Atileetiksete Federeeshiinenna qoqqowubba calla woshshite Ministeere badde Addis Ababunni kayise Paarisete geeshsha yitanno millimmo assitanni no yiino.
Tini harinsho gara ikkitinokkitenna Ministeerete loosi qeechanna biilloonye giddo karsikkinni ga`a mootimma jiro abbi heewo beeqqineemmona yiniro dawaro uynannikki coye ikkinota huwachishino. Konni garinni sunfanniha ikkiro 2024 Olompiike sai diri Olompiike gede qarru aana ubbanno yaanni coyi`rino. Olompiike gobbuwate baandeeranna beeqqote hajo ikkinohura hiitti gobbano gobboomunni mixidhenna amaalante loossanno. Konne ikka hoogiro kayinni 2020 Olompiikete xaadino qarri wirro xaano xaadannokki gede Itophiyu Olompiikete Komite ikkito ledo loossanno bissa xaanni hajote aana xawo assite hadhanno gede qaagiissino.
Konni gobbaanni noo harinsho kayinni hiittenne doogonni adhamooshshu nookkitanna mootimma ofoshshiishino poolise gumulsiisanno Ministeere badhera qolle loosa adhamooshshu nookkita coyi`rino.
Battalate aana afaminohu Itophiyu Olompikete Komite riqiwamaanchi Kalaa Gezahanyi Wolde, IFDR Woganna Ispoortete Ministeerenni ka`ino hajo aana dawaro qolino. Konninni, komite mootimma badhera qotle woy affukkinni loossino loosi nookkita xawise, komite balaxote qixxaawo looso loossanni noohu mootimmate ledo ikkinota kulino.
2024 Olompiike mootimmano ikkito daga jawa guma agadhitannota xawise; komite loossanno looso mootimma irkissanni noota huwachishino. “Paarise 2024 Olompiike lainohunni Faransayete Embaase hasaawinsi yannara Gobbaydi Hajo Ministeere affukkinni diloonsoommo” yiinohu Kalaa Gezahanyi; Itophiyu Atileetiksete Federeeshiine ledono hasaambanni loonsanni hee`noonnitanna konni sainohunni kalaqamanno qarrano ikkiro hasaawunni tira hasiisannota huwachishino. “Daga hexxo mursiisanno hasaawi hasiisannoha dikkino” yaanni ledino.
Olompiikete balaxote qixxaawo lainohunni komitenna Federeeshiinete loosu gumulsiisaano agannate albaanni xaadde assitino hasaawira loosonsa hanaffinota xawisino. Konni kaiminni, 2020 Olompiikete kalaqamino qarra tirate mixo fushshine nirinni hanafe loonsanni hee’noonniha ikkanna; baxxinohunni Awuropaho noo Itophiyu qansoota kakkaysatenni woxunni ikko tiiunni irko assitanno gede assate looso loonsanni hee`noonnita xawisino.
Paarisete heedhanno Itophiyu qansooti ledo hasaawa assini gedensaanni assinoonni millimmonni Paarisete gobbaanni noo quchumira Olompiike harisate shiima aganna gatte heedheenna Olompiikete gaamo qixxaawo assitanno gede sumimmete iillinoonnita qummeessino.
Konni kaiminni, gaamo 42km ikkanno xeertinye millimmo assitanno xawo hattono yannicha qajeelshu baychono horaameeyye ikkitanno gede loonsoonni. Kunino, Itophiyunniha dancha su`ma bowirsate assinanni wo`naalsha ikkinota riqiwamaanchu huwachishino.
Jeefoteno, Itophiyu Atileetiksete Federeeshiine 2020 Tookiyo Olompiike gedenoonni dancha guma borreessiisirono, daga hasidhanno guma mayra gumula hooggino yaannoha keena, massagaanote xaadooshshi maa lawannoro hattono uurrinshuwate ledo noo xaadooshshi keeraancho ikkannota xawoho buunxanni Olompiike xaanni qixxaawo assitanno gede Ministeer Deetichu qaagiissino.
Abrahaam Saamueel
Bakkalcho Bocaasa 20, 2016 M.D
