Hawaasa:- Rosu minna deerra woyyeessatenna rosu isilanchimmanna rosaanote gumi woyyaawanno gede illacha tunge loonsanni hee`noonnita Hawaasi Quchumi Rosu Biddishshi xawisi.
Hawaasi Quchumi Rosu Biddishshi Sooreessi Birhaanu Dessaalenyi (Dr.) Bakkalcho Gaazeexira xawisino garinni; rosu minna dagate jiro ikkansanni rosu minna woyyeessatenna rosaanote gumi soorramanno gede assate rosu isilanchimma aana illachiinshe loonsanni hee`noonni.
Quchumu gashshooti giddo noo rosaanote maatenna mootimmate bissa ledo qinaawatenni quchumu giddo noota haammata rosu minna deerra woyyeessate loonsanni hee`noonni yiino.
Rosu minna deerra woyyeessatenni rosaanote injiinohanna hagiriissannore rosu minna kalaqate widoonni quchumu gashshooti 752 miliyoone birri baajeette gaamme quchumu giddo noo rosu minna deerra woyyeessate loonsanni hee`noonnita Birhaanu (Dr.) qummeessino.
Biddishshu sooreessi Birhaanu (Dr), rosu minna bashsho noowiinni woyyeessine sayikki dirimi woy fooqe geeshsha assine ijaarranni hee`noonnita xawise; gama baajeettete anjenni badhera higgurono wirro kontiraakterootu ledo sheemaate e`ne wiinamunni jeefisate loonsanni hee`noonnita qummeessino.
Rosu minna deerra woyyeessate dagoomu woxunni hasiisanno uduunnunninna wolqatenni jawa irkono assinota sooreessu lede xawisino.
Rosu minna deerra woyyeessate loosi umihu rosu hiiqqamme sissate ikkanna, rosaano galtanni rossanno minna loonsanni hee`noonni; konni ka`a Sidaaami giddo heewisamaano rosaano kalaqate hixamanyine loonsanni hee`noonnita egensiisino sooreessu.
Quchumu giddo rosu deerri woffi yaanno gede assinohu mittu qaru coy, rosaanotenna rosu kifilla waaxo taala hooga ikkanna; konne qarra tirate rosu minna halashshanna kifillate waaxo taashshate loonsanni hee’noonni yiino.
Hallanyu rosi minna kiiro xaphoomunni balaxote rosi minna ledo la`niro 242 ikkanna; xaphoomunni mootimmannitinna hallanya rosu minna lendiro 300 iillitino.
Kuri rosi minna hundaanni tenne yannara rossanni noo rosaano xaphoomunni 149 kume 579 ikkitannota kulinohu Biddishshu Sooreessi; rosu kaalendere garinni rosaano borreessineenna rossanni no; rosaano rosu minnara dagge yannatenni borreessamate widoonni mommodda kalaqanturono, mixotenni xibbuunni 90% ale rosaano maareekka dandiinoonnita coyi’rino.
Sai diro gobboomu deerrinni 12ki kifile fonqolantino mootimmatenna hallanya rosaano giddonni 776 ikkitanno rosaano calla Yuniversite eessanno guma maareekkissinota kule; mootimmate rosi minna 2%, hallanyu rosi minna 31.48% calla sayissinota egensiisino.
Quchumu deerrinni 1-5 geeshsha fultinori hallanyu rosi minna ikkitanna; Kombooni 187 rosaano giddo 94.1 saysino; gobbate deerrinnino 20 rosi minna giddo eino. SOS ikkanna 79.26 saysino. Furra Modele 60.43 xibbuunni ikkitanno rosaano sayisino. Shoolkinna Onti deerra amaddinori “BNB” na “Maont Olive” rosi minna ikkitinota Dr Birhaanu xawisino.
Abrahaam Saamueel
Bakkalcho Bocaasa 20, 2016 M.D
