Itophiyaho baalante handaarranni tekinolooje horonsira hasiissannota IFDR xaphoomu ministirchi Abiy Ahimed (Dr) xawisino.
Xaphoomu ministirchi “Tek Talk Selemooni ledo” umikki gafinni assino hasaawinni coyi’ranni; Dijitaale Itophiyi 2025 100% jeefantino mixooti. Ikkollana 2030 mixo qixxeessinanni hee’noonni. Kuni adda ikkanno ikkiro gobbankera egennotenni massagamino miinja gatamarate safo tuganno yiino.
Itophiyaho buxima, asalu, kaa’looshshe agadha, poletiku qarrubbanna wolootuno batinye sarraaqantino qarrubba no yiinohu xaphoomu minisirchi; mitto qarra calla tiratenni Itophiyu hasatto wonsha didandiinanni. Konni garinni baalanta qarrubba tirate baalante handaarranni tekinolooje horonsira hasiissanno yiino.
Lawishshu gede owaante aate harinsho aana mussinnu, owaantete gede’na, wolootuno haammata mitiimmubba hee’ransa qummeesse; Konne qarra tirateno ‘Mesoob mittu mereershi owaante’ uurrinsoonnita kayisino.
Xaphoomu ministirchi; hobbaatu uurrinshuwano dijitaale kaameeranna woloota tekinoloojubba horonsidhanni afantannota xawise; konninnino polise nookki qooxeessira kalaqantanno jaddo buuxate dhuki kalaqamino. Tekinolooje baalante handaarranni horonsirate loonsanni hee’noonniti tini loossa lawishsha ikkansa qummeessino. Xaa yannara Itophiyaho baalante handaarrara tekinolooje horonsirate rosichi lophanni dayinota xawisino.
Bakkalcho Onkoleessa 7, 2017 M.D
