Addis Ababa: Shoolkiti gobboomu dandoote heewo gobbanke hexxo danchu jireenyino gatannokkiha ikkasi leellitinote yaanni Aantaanchu xaphoomu ministichi ba’lattonni dimokiraasete amanyooti ijaarshi halamooshshi mereershi sooreessinna jireenyu paarte aantaanchu pirezidaantichi kalaa Adem Faarah xawisi.
Kalaa Ademi Faarah shoolkiti gobboomu dandoote heewo xaphishshi amuraate harinsi yannara coyi`rino garinni; dandoote latishshinna kalaqote loosi laalchimma, heewisamaanchimmanna udumitte lopho borreessiisate luphiimu qeechi noosi.
Kalaqote loosi wolqa lossa miinju lopho abbitanno, mitiimmuwa tirtanno, dagate heeshsho woyyeessitanno yiino.
Heewote aanano leellitinoti tekinoloojete gumma Itophiyunnita dancha hexxo leellishshannonna jireenyiseno gatannokkiha ikkasi caakkishshannoreeti yiinohu Kalaa Ademi; konnira, baalanti kalaqote loosi ogeeyye hixamanyensaranna murci’raanchimmansara galatu hasiisannonsa yiino.
Kalaa Ademi Faarah xawishshi garinni; dandoote latishshi aana illachunni loosa suffinota miinju lopho abbate kaa’litanno; kalaqo lossitanno. Ledotenni, loosu hoonge ajishshanno.
Mootimmate widoonni tekiniketenna ogimmate uurrinshuwa halashshate; isilanchimma noosi qajeelsha uytanno gede assate loossa loosantanni noota buuxise; tekiniketenna ogimmate uurrinshuwa Industirete dikko wonshitanno qansoota laashshate looso loonsanni hee’noonni; jeefisantinoti dandoote heewono kalaqote wolqa lossate loonsanni hee’noonni looso leellishshannote yiino.
Dandoote latishshinna kalaqu looso lossate heewubba eelinni hananfe harisate loonsanni hee’noonnita xawise; kalaqote looso roorunni lossatenni mixi’nooniha udumicha jireenya buuxisiisate murci’raanchimmatenni loonsanni hee’noonnita coyi’rino.
Dandoote latishshinna kalaqote looso lossate handaaru loosaasinenna millisaanonna kalaqote handaarinni bobbakkinori illachunni loosa noonsa yiino.
Dandoote heewo dagoomu ogimmatenna dandoote rosi aana noosi huwanyo lossitanno gumma qajeelshaho kakkayisannota, loosantanni nooti kalaqote loossa isilanchimmanna deerra woyyeessate kaa’litannore ikkansa qummeesse; heewo wedellu aana eewaancho xiiwo lossate kaa’litannota, mimmitunniwiinni rossanno gede kaayyo kalaqqannota, dandoote deerruwa leellishatenni handaaraho loosama noonsa loossa hajo la`annonsarira caakkeessitannore ikkansa qummeessino.
Heewote qeelaano dandoote hanafonsa xawishsha ikkinnina jeefishsha di’’ikkitino. Konni ka’ira roorere agarranninsata qummeessino.
Loosunna Dandoote Ministircho Dukko Muferihati Kaamil ise widoonni; heewo baalante gobbate qooxeessubbanni fultino tekinoloojetenna dandoote loossa amaddino heewisamaano leellitinoseta ikkase xawisse; shiqqinoti tekinoloojete gumma konni albaanni noo heewubbanni mitiimma tirtannota ikkitinota coyidhino.
Ministirchote xawishshi garinni; heewo luphiima hettisammenna bareendete macciishshamme leellitinote. Luphiima rosono adhinoonnite. Danisennino isilanchimmasennino woyyaabbino heewooti.
Heewo ikkitino daafira balaxisiisa hasiissanno daafiralla ikkinnina baalanti heewisamaano surrensanna angansa horonsidhe haarore laashsha dandiitinohura qeelaanote. Yooaanchimma xawashshonna farconnita assate heewo weebisayitete qoolinni sa’anno gede assinoonni yitino.
Heewo, heewotenni ale ikkite gooffanno gede assitinorira baalaho galatu hasiisannonsa yitinoti Ministircho; qoqqowubba assitino qeechirano afansha uytino.
Suqqote maashine loosino wedellichi Demmissi Kidaane isi widoonni 500 kumi birri baraaramaancho ikkasi xawise; uynoonnisi woxi umisi looso kalaqate dandiisannosiha ikkasi coyi’rino. Konninni, baalunku pirogiraame qixxeessitino uurrinshuwanna rosiisaano galatino. Aanchineno hattoo heewubba kalaqote ogeeyye jawaachishshannota ikkasenni sufa hasiissannosetano qummeessino.
Heewo shoole mereershuwanni 22 handaarranni harinsanni keeshshinoonniha ikkanna; 70 tekinoloojuwano towaanyote shiqqino.
Qajeelaanchu, qajeelshaanchunna Interpirayzete heewisantino beeqqaanora afanshanna 300 kuminni 500 kumi geeshsha baraarsha uynoonni.
Shoolkiti gobboomu dandoote heewo Loosunna Dandoote Ministere qixeessonni aantaano lee barrubbara harisantanni keeshshite sai Qidaamete barra jeefisantino.
Demmellaash Demmeqe
Bakkalcho Onkoleessa 7, 2017 M.D
