Hawaasa:- Sidaamu daga budillitte doogonni gibbonna gaance tirate amuraati noo dagaati. Konne amuraate, “Affini” yinanni. Konne,”Affini” amuraate Sidaamu seeda yannara mereeronsa ka`anno gaanceranna sumuu yaa hoogate qarra tirate horoonsi`ranni dagate mereero keerunna hobbaatu ikkanno gede assanni daynota Mootenna Gobbate Geerchi Kale Arraffohu coy`rino.
Moote Kale, “Sidaamu daga bire biriqiiqiini kayisse techo geeshsha mannu mereero barrubbate giddo noo xaadooshshinni kalaqantanno sumimme hoogate coyee hattono gaancenna gibbo tirate horoonsidhannohu budu amuraati Affiniiti” yiino.
Sidaamu budi giddo qaete, qarqaraho, ollahonna gosate, hattono lamunna gaamote mereero gibbo ka`uro gawajjaminohu mulesi noo mannootira “Affini” woy “macciishsitini; tenne iillitinoeta gawajjo” yee qaxxariro; mule noo manni hay yeenna gibbo qiddannota Moote xawisino.
Konnira “Affini” gedee budillicha gaance tirate amuraate muli yannara gobbate deerrinni ka`anni noo gaance tirate uurrinsoonniti Gobboomu Amaalammete Komishiine horoonsidhuro loosu qinaawora jawa horo afi`rinota Moote Kale xawisino.
Moote Kale, “Affini” budi xonannoha, waajjishiishannoha, reewannoha, hattono gosanna gosate mereero gaance kalaqannoha eemaramanno gede assanno; hegeraame dawaro dagganno gedeno budu jawa yooaanchimmate qeechasi fulanno” yiino.
Mootenna Gobbate Geerchi Kale Arraffohu, Sidaamu daga konni “Affini” amuraatinni dagate giddo ka`anno gaance tirate horoonsidhanni bude agarte ilamate saayissanni abbitinota kulino.
Moote Kale xawishshi garinni, “Affini” yaa, mittu manchi mitto mancho xoniro, woy gawajjiro Sidaamu budi garinni “Afitto” yaanno. Gosa gosa gawajjiturono gawajjo iillitino daga gattino dagara dagge “Affini” yitanno ikkinnina qaafo diadhitanno. Budu garinni mannu manna shiiro reeshsha mine worre rabbisate didondanninna “Afitto” yinanni. Lubbo roorannori dinona, Sidaamu shiire hee`re nafa gosa fushshe urde amadikkinni womaho woy qarqaru geerchira afitto yee qaxxa`ranno. Konne amuraateete affini yaai” yiino.
Affini budu amuraati, gawajjaminoha woy shiirinoha affinni yee womaho woy mootete qaxadhikkinni, rabbisara urde adhe fuliro shiire hee`re qorichishamanno; hu`ne hee`re hunaancho ikkannota Geerchu kale xawisino.
Konnira Gobboomu Amaalammete Komishiine “Affini” gedeeha budillciha bude horoonsidhuro tenne yannara gobbate mereero noo qarra tiratenna shotisate dandiisannota amaalino.
Abrahaam Saamueel
Bakkalcho Bocaasa 20, 2016 M.D
