Addis Ababa:- Sidaamu qoqqowira sa`i diri giddo 1100 manni HIV/AIDS Vayiresenni amadaminotanna 109 ikkitannori vayiresetenni reytinota qoqqowu fayyimmate biiro egensiissu.
Qoqqowoho HIV/AIDS gargarooshshinna qorqorshi duuchu handaari sooreettenna biirote layinki sooreette dukko Emmebeet Mekkonniniti Itophiyu pireesete uurrinshara xawissino garinni; sai dirira 16,000 ikkanno manna buuxo assinoonniha ikkanna; kuri mereerinni 1100 ikkanno manni mundeesi giddo vayrese afantino. Vayresetenni amadantannori batinyunni dirinsa 15-24 diri geeshsha noo wedella ikkansa xawise; xibbuunni 60% ale anga amaddannori qole seenne ikkansano coyidhino.
997 ikkitannori HIV/AIDS gargarooshshu xaginaate harunsitanni noota buuxissinoti sooreette; sa“i diri giddo 109 ikkanno manni vayresete korkaatinni lubbonsa hoogginota xawissino.
Taraawote bikki qoqqowubbatenna dagoomu garinni babbaxxino deerrira afamannono yitino dukko Emmebeet.
Dukko Emmebeeti xawishshi garinni; mootimmannitanna mootimmannita ikkitinokki uurrinshuwa, amma`note annuwi, siiviilete maamarranna hajo la`annonsa bissa ledo ikkatenni HIV/AIDS vayrese gargarooshshenna qorqorsha lainohunni dagoomaho babbaxxitino doogonni huwanyoote cu`mishiishate looso illachunni loonsanni hee`noonni.
Taraawotenni roorenkanni reqeccaabbinori jallaggishshanno xagga horonsidhannori, umonsa hire galanno seenni, barru loosaasine hattono loosu korkaatinni seeda yanna qooxeessinsanni xeertidhe hadhanno mannoota ikkansa coyidhinoti sooreette; tenne dagoomu kifilla aana illachishino looso loonsanni afammannitano qummeessitino.
Gobbate gede kondomete hidhonna shiqisho qarri hee`rasinni vayrese roorenkanni taraabbannokki gede baxxinohunnino umonsa hire galanno seenni bati`ranno Hoteellara shiqishate looso loonsanni yite; gobboomu deerrinnino konne qarra tirate baajeette amande hidho gumulanni hee`noonnita egensiissino.
Quchummate afantannori umonsa hire galanno seenni tenne heeshshonni fule umonsa soorranno akata kalaqate babbaxxitino qajeelshubbanna hasaawu battala qixxeessatenni huwanyoote cu`mishiishate loossa loonsanni hee`noonni yitino.
Qoqqowoho afantanno shoolente zoonnaranna woraddate bocaasa 18/2016 M.D hananfe millimillote bare harinsanni afammannita coyidhinoti sooreette; tayxe ayirrinsanni HIV/AIDS gargaratevayrese barrinni dagoomu qeecha luphi assine leellinshannitanna xaa geeshsha assitino qeechira galatatenni ayirrinsannitano egensiissino.
Ledoteno tayxe gobboomu deerrinni 36ki doychora HIV/AIDS barra ayirrinsanniha ikkanna; dagoomu mereero deama heedhannokki gede baqqi assatenninna qummeessatenni hattono vayresete korkaatinni lubbantinore qaagatenninna sufote qorophote sokka dagoomaho sayisatenni ayirrinsannita dukko Emmebeeti xawissino.
Tayxeha HIV/AIDS barra “Dagoomu massagaanchimma roortino HIV/AIDS gargarooshshira” yaanno massagote qaalinni bocaasa 22/2016 M.D Hawaasi quchumira xaphi assine ayirrinsannitano qummeessitino.
Abbebech Maatewoos
Bakkalcho Bocaasa 20, 2016 M.D
