Itophiyunniti Biheeraawe gaamo 2026 kalqete boowera sa“ate assitanno harinsho lamalate albaanni Seraaliyooni ledo Morokote El-Jediida quchumira afamanno El-Abdi xawira assitino godo`lenni hanaffino. Umi godo`lenni goole nookkiha mitte bixxille beeqqite jeefissinori Waaliyootu oyimbarrano layinkita filote godol`e Burkinafaaso ledo mittu xawira assite 2-0 qeelantino.
Kaajjado hekko leeltino umi goofimarchinni Waaliyootu kowaase amadde mitto goolete shiqino wo`naalsha assa hooggurono goole die`inonsa. Layinki goofimarchinni baxxinohunni, 69ki xiqqeessira Bilaatti Ture Burkinafaasote umi goole marawete aana fooliishshiishihu gedensaanni kayinni Waaliyootu waajja hanaffino. Umi goole e`inonsahuno konni albaanni baasa hinge kullanna macciishshininte gede uurritino kowaase gargarate ragaanni taashshira hooggino qarrinniitinka.
Ikkollana, Waaliyootu taalo assitannonsa goole hasiratenni kaajjite godo`late wo`naalsha assa hanaffino yannara wirro wole so’ro loosse 78ki xiqqeessira Bertiraand Tiraoore kiirsiisino qorichu kuwaasenni 2-0 massagama dandiitino. Kunino gaamote addaxxo dirrisanni ha`re wirro wole so’ronni Daango Otatira 90ki xiqqeessinni Burkinafaaso 3ki goole kiirsiissanno gede assino.
Burkinafaaso qeelase harunse bixxillese shoole iillishatenni gaamote layinki deerrira ofolla dandiitino. Waaliyootu insa widoonni mitte bixxillenni shoolki deerrira ofoltino. Aantete gaamonnita sayikkinna shoolki filote godo`lubba Giini Bisawunna Jibuuti ledo Ella agani giddo assitannoha ikkanno.
Haaru Waaliyootu qajeelshaanchi Gebremedihin Hayile dhuku noonsarenna wedella godo`laano mitteenni amaddino gaamo harancho yanna giddo qixxaawo assate wo`naalsha assirono lamente godo`lubba gambooshshinni konneeti yinanni suude leellisha didandiino. Kunino lamente godo`lubbanni borreessiisino gumi ledo mitteenni ledame Waaliyootunniti kalqete boowe hanafo hexxo leeltannokkkita assino.
Waaliyootu Abubeker Naasirinna Shimellis Beqqeleha labbino qara godo`laano gawajjote korkaatinni hoogansa noo gedeenni heedheenna Itophiyaho noo xawubba ikkado safote latishshubba diwonshidhino yaannohunni agawamansanni lame dirra ale xawinsara godo`la hoogansa borreessiissanno gumi aana umisi xiiwo gashshinota ammannanni.
Biheeraawe gaamo xawisera assa nooseta lamentanni kalqete boowe filote godo`lubba shota ikkitino gaamubba ledo gumultunte gede xawinsara godo`liteemmero hedeweelcho woyyitino bixxille gamba assate kaayyo heedhannonsata batinyu kulanno. Ikkollana, lamente filubbanni Waaliyootu gaamote gede deerri deerrinsanni noo foonqubba kalqete boowe filote harinshora hexxo assi`nannita dikkitino.
Itophiyu Biheeraawe gaamo tenne kalqete boowe filora gaamo mittetenni gaamantino. Konni gaamishshinni Itophiyu ledotenni Burkinafaaso, Jibuuti, Gibitse, Giini-Bisawunna Seraaliyooni gaamantino. Itophiyu afantanno gaamishshinni nooti Gibitse 100% qeelate harinsho aana afantanno. Ferioonootu barrubbate albaanni umi gaamishshi layinki godo`lensa Seraaliyooni ledo assatenni 2-0 ikkino guminni qeela dandiitino. Umi filonnino Jibuuti 6-0 qeeltinoha ikkanna kunino lee bixxillenni gaamo massagganno gede dandiisiisinonsa.
FIFA 2026 kalqete boowe dhaggetenni umi yannara 48 gobbuwa heewisiisanno. Beeqqaanote kiiro lexxasi harunseno Afrikunnitino kalqete boowe beeqqaano kiiro ontunni honsu widooge lophinoti anfoonnite. Konne harunseno Afriku gobbuwa haaru garinni filote godo`lubbanni beeqqitanni afantanno. Afriku gobbuwa honse gaamishshubbanni gaamante filote harinsho hanaffinoha ikkanna mitte mittente gaamo aana lee gobbuwa afantanno. Mitte mittenti gobba gaamishshunni xaphooma 12 hara higate godo`lubba gumulte gamba assitanno bixxille garinni honsunku gaamishshinni balaxaano ikkite jeefissannoti honse gobba kalqete boowe beeqqaano ikkansa buuxissanno.
Honsunku gaamishshinni layinkire ikkite jeefissanno gobbuwa qole mimmitinsa ledo assitanno godo`lenni bandihu gedensaanni qeelaancho ikkitinoti mitte gobba Fiifu (FIFA) haaro gede diriirsino Inter konfedereeshiini godo`lera beeqqaancho ikkitanno. Konninni, labbeemme doogonni wolootta gobbuwanni filotenni bandoonni gobbuwa ledo godo`lite sa“a dandiituro Afriku kalqete boowenni tonnikkita beeqqaancho gobba afirate kaayyo heedhannose.
2026 kalqete boowe Ameeriku, Kaanaadunna Mekisiko gutunni qixxeessitanno gede doorroonni. Sasenti gobbuwa 16 quchummara bayiriidi heewo harissannota buunxoonni.
Abbebech Maatewoos
Bakkalcho Bocaasa 13, 2016 M.D
