Loome babbaxxitino fayyimmate horo noose laalote gumaati:-
1. Kaansere gargartanno:- loome bisinke giddo noota asiidete bikka taashshatenni woy biddi assatenni keeraabbino mundeete munyuuqqa lopho heedhanno gede assitanno.
2. Hadhaabbino coyibba hunate amanyoote ollakkanno:- loome horonsira bisinke saga`lineemmo sagale giddo noota hadhaabbino coyibba hunate harunsanno amanyoote ollahate ledotenni hunate hasiissanno hormoonna xe`anno yannarano riqiwate qeecha fultanno.
3. Buqqeenke baqqi yitinota ikkitanno gede kaa`litanno:- buqqeenke baqqi yitinota ikkitanno gedenna barru giddo loosa hasiissannose looso gumultanno gede magnizhiyemenna potaashiyeme yaamantanno shiilubba hasiissanno. Shiilubba loomete giddo afantannota ikkasenni buqqeete amanyooti garunni gumulamanno gede assatenni buqqeenke xabbinota ikkitanno gede assitanno.
4. Mulu amanyoote biddi assitanno:- mulinke amanyooti aana qarru xaadiro barru baala soodo loome gamuutino wayinni karsiinse aga bisinkeha mulu amanyoote sarraaqanno hadhaabbino shiilubba hunanno du`namaanchi burqanno gede assitanno.
5. Foo`linanni bisubba keeraabbinota ikkitanno gede assitanno:- loome bisinketa foo`linanni bisubba keeraabbinota ikkite suffanno gede kaa`litannota vaytaamiin C yinanni shiilo amaddinote. Konninni ledotenni foo`lineemmo bisi xiwamanno woyte rakkino hurre afi`neemmo doogono ikkite owaattanno.
6. Biddi yino bisi heerannonke gede kaa`litanno:- bisinke giddo afantannota hasiissannokki qiwaatubba giiratenni hattono sagalete daahama amanyoote lifixisatenni bisinke biddi yino uurrinshi heerannosi gede assitanno.
7. Baqqi yinoommore ikkineemmo gede assitanno:- loomete giddo afantannoti vaytaamiin C cee`manna daafuro ajishatenni baqqi yinoommore ikkineemmo gede assitanno.
8. Giddoydi xisso huntanno:- bisinkera hasiissannokitanna hadhaabbino shiilubba huntanno yannara bisinke aana iibbabbo, bodira, umu damuume sa`e sa`e bisinke aana kalaqantanno alarjikubbanna darshe xaaddankera dandiitanno. Loome aye woyte horonsira aleenni xawinsoommota bisinkera hasiissannokki shiilubba hunate amanyoote lifixisatenni xisso ajishate qeecha fultanno.
9. Afale loosose garunni gumultanno gede kaa`litanno:- loome afalete giddonni burqitanno dombophicho garunni burqitanno gede assatenni sagalete daahama amanyooti lifixinoha ikkanno gede assitanno.
10. Biifadu bisu gogi heerannonke gede assitanno:- loome gogu aana kalaqantannoti babbaxxitino infekishinubba kalaqantannokki gede assate dhuki noose. Loome horonsiratenni bisinke aana fulanno finniissa kolishshidhino malaatta hattono busha caangete danubbanni gargara dandiitanno.
11. Bisinketa asiidenna beeze biddi assitanno:- loome asiidete akati noose yinirono giddose beezete akatino noota handaaru ogeeyye xawissanno. Kini akatise bisinke giddo taaltino asiidenna beeze heedhenno gede assanno.
12. Ganshu xisso gargaranno:- loomete giddo afi`nannihu asiidete dani gansho gargarate kaa`lanno.
13. Hinkote keeraanchimma agartanno:- loome afiinke giddo su`naadu/danchu fooli hee`ranno gede assatenni gobbaannino hinkonke co`ittenna keeraanchimmase agarantinota ikkitanno gede assitanno.
Aleenni xawinsoonnita loomete horubba afirate goxanotenni ka`inanni woyte boco loome mitte birciqqo way giddo karsiisatenni aga umi looso`ne ikko.
Bue:- ispiriit sayins:- layiv sayins, orgaaniik faakt
Abbebech Maatewoos
Bakkalcho Bocaasa 6, 2016 M.D
