Mittu wedellichi geerchu mittunniwa mare togo yii.”Heeshsho rosiissinohehu jawu rosichikki maati?” yaatenni xa`manno. Geerchuno shiima geeshsha hedinohu gede ikke, togo yaanno. “Ati xa’mattoe gedeere hasaawa aneno dibaxisinoe, kayinni sao xa’mireemmohe, giwise nooe” yaannosi. Beettuno qole xa’misi.”Mooticha’ya qarru nooni?” yaatenni. Geerchuno togo yee dawari.”Saa’ya foo’litanni/ kaxxantanni 20 saate aleenni keeshshitino. Qallo keeshshasenni, reyitannoe yee masoommo” yiisi.
Beettuno jawaachishanni; “Mittore assa noohe, mali”. Tenne giddo geerchuno masillaawe. “Togoo coyira egenno dinoe. Wolqiweelo geerchooti, asse afeemmori dino. Ikkollana kayiinni miteekkine manna amaa’linummoro, mararsitannota saa’ya reyotenni gatisa dandiineemmo. Gatinseemmoha dilawinohe?” yaatenni xa`mannose. Beettuno umo milli assi, geerchuno ledanni. “Hanni doogote eela higge milli yite soqqamie. Doogote mitu manni ledo xaadattona. Hanni shoolu manni geeshsha hasaawisse hedonsa gamba assattona. Reyitanni noo saa’ya daafira hedonsa maatiro afa noonke” yee soqqannosi.
Beettuno wiiname fule, mitte saate giddo hige dayi. Geerchoho togo yee kuli. “Shoolu manniwiinni xa’me amaalensa afoommo… Umi manchi, jawaatte saadate xagisaano abbite; saa dare siito haaranno gede assi. Layinkihu, saate yanna agarise kalaqamu garinni qaltona, xagisaano abba gara dikkitino. Sayikkihu, saa konni garinni callanka reyitaraatina, gorrite maala hiri. Shoolkihu, anga worte siito goshooshatenni, saate kaa’lo assite qalshiishi” yitanno.
Geerchu togo yii. “Danchatena, hattono dikkanno, duuchunku hedo lowota baxxitino. Hiittenne hayyo harunsa nooero ate hedo kulie?” yii. Beettuno shiima geeshsha hede togo yii. “Maleemmorenni hoogoommo. Duuchunku amaale babbaxxitinote.” yiisi.
Geerchuno muushshi yii. Beettoho qote angatenni baffi asse. “Heeshsho’ya rosicho xa’mittoe yaannara anino yeemmore hawoommo. Rosicho’ya kulantenni, Ati umikki heeshshote rosicho la”atto gede assoommohe. Konnirano, saa’ya kaxxantinoha ikkironna, kaa’lo hasiissusero yee hedummo. Mannu heeshshosi rosicho odeessanno yannara, meu danihu hedote badooshshi nooro afatto gede hayyo abboommohe. Heeshsho’ya diri giddo afiroommohu jawu rosichi, batinyu manni, mittunna lawanno coy aana aanno hedo lowo geeshsha xaaddannokkita ikkaseeti.
Duuchunkura coyibba la’neemmoti uminke laooshshi noonke. Wolu manni hedo ninketewiinni baxxitinohura, hatte lao kaphoho woy digaraho yaa didandiineemmo. Koffi yaano dihasiissanno, sumuu yaa hoongeemmohu, wolootu hedo ninkete ledo labbannota ikka hooggannaatilla. Hedonsanna hedonke mimmito lawa hooggurono, godowa hala’la noonke, hedonsa ayirrisa hasiissanno.
Abbebech Maatewoos
Bakkalcho Bocaasa 6, 2016 M.D
