Kalqete Atileetikse goofanni noo heewote diri giddo luphiima gumanna ikkadimma leellishshino atileetoota heewisiisse lamalate gedenoonni baraarsha uytanno. Konne ayirrinye atileetiksete maatenni hattono ispoorte massaganno aliidi massagaano doorshi aana kaima assine uynanniha ikkinohura jawa baycho afi`rino. Ikkinohura, doorshu giddora ea hattono jeefote doorshi giddo karsamate woyyaawino guma abba hasiisanno.
Sa`u lamalara dagoomu tuqi aana huuro uynanni keeshshinoonni atileetooti giddonni jawa huuro afidhinore onte atileetoota Kalqete Atileetikse egensiissino. Ontu atileetooti addi addi gobbanni fultinorinna babbaxino xeertinyinni xawu heewo aana beeqqano ikktinori, lamu kayinni Afirika riqibbe Itophiyunninna Keeniyunni shiqqino. Lamu doorshaho shiqqino atileetooti nooseti Itophiyu gobba isewidoonni, mittu atileetichinni jeefote geeshsha heewisantannota buuxissino. Daanno Faranjete agani bocira Monaako harinsanni amuraatira dirunniha doorantino atileetoota faajje assina geeshsha jawa gede quqquxanni no.
Jeefote doorshira filantanni noo atileetooti giddo maraatoonete bareeda ontu atileetooti giddo dirunniha doorantino atileeticho ikkate kaayyo hala`litanni dagginose. Korkaatuno, atileetootu shotu garinni dodde, heewisante qeelate nafa hexxo assidhe eate waajjitanno heewora tini bareeda erote qeelle borreessiissino daafiraati.
Saiha Wocawaaru aganira harinsoonni Berliinete Maraatoone seennu kalqete riikoorde ikkitinota hiiqqite qeeltinoti Atileeticho Tigst Aseffiti, jeefote doorshaho shiqqino atileetooti giddo umikita ikkitinota albi ooyimbarra Kalqete Atileetikse faajje assitno. Tigisti heewisante hiiqqitino maaraatonete dodanshonni aleenni, dhaggenniti albi heeshshose kalqete daga illacha tugganno gede assase maala`linannite. Kalqete baalaho noo atileetoota baxxinohunni seenne jawaachishatenna kakkaayisate ikkitanno atileeticho ikkasenni ispoortete maatenni uynoonnise huuro aana Kalqete Atileetikse ogeeyyeno maayye yiteenna dirrate Itophiunni xeertire noo ayirrinyi tenne atileetichonni higanno yine agarranni.
400 na 800 meetire atileetiksenni hanaffinoti Tigsti; gobbase riqibbe meedaaliya borreesiisa dandiitino atileetichooti. Albase maaraatonete widira qoltu kawa kayinni Awuropu kiironni 2014 kayisse lekkate xisso korkaatinni kaajjado wo`naalsha assitanni keeshshitino. Tini xissose kaajjitanni daggu gedensaanni fayyimmate ogeeyye dodanshote heewo agurtanno gede kultuserono; mittu diri gedensaanni wirro heewote widira higginonka. Xissotenni wo`munni wo`ma hurtinokkihura, Awuropu kiironni 2019 Vaalenshiyu bocu maraatoone jeeffissu gedensaanni mannu irkiseennase fayyimmate uurrinsha geeshsha iillitino. Hattenne yannara, kiranchetenni irkisidhanni xagisidhara hadhinoti Awuropu gobbuwano fayyimmate mereershino dodanshote heewo agurtanno gede amaaltinose. Ikkollana, jawaantesenni woleho lawishsha ikka dandiitinoti Atileeticho Tigisti kayinni, xissotenni hurte albi jawaantesewa higge cee`mitukkinni loosse xawu dodansho heewonni atileetiksete widira higa dandiitino.
Seeda yannara xisso xagisidhanni keeshshitu gedensaanni hurte, umi maraatoone Saudi Arebiyaho heewisantinoti atileeticho, hattenne yannara borreessiissinohu 2:34:01 ikkitanno saateeti. Sai diro qole konne Berliinete Maratoonera 2:15:37 ikkitino yannanni dodde heewote riikeerdenna kalqennita sayikkita doorantino wiinamu saate borreesiisa dandiitino. Atileeticho e`ino saate alba nooseha 19 xiqqeessa woyyeessa dandiitino daafira xeertinyunni nooseha albillichote hexxo warri asse caakkeessinoho. Diru gedensaanni qole heewisantinohu Berliinete Maraatoonerano noose saate giddo 4 xiqqeessa woyeessatenni 2:11:53 ikkino saatenni kalqete riikoorde angasera eessidhino.
Atileetichote jawaante luphi asse leellishannohu xeertinyunni balanxe amandoonni riikoorde 3 xeqqeessinni balaxxe eatenni ikkanna, labballu gede wiinamu saate borreessa dandiinannikki seennu maraatoonera 2 saatenna 10 xiqqeessi woroonni ikkitino saatenni ea dandiinanni yaannoha leellishshino. Ikkinohura, Atileetichote dhagge soorritanno qeelle hattono shotu garinni dodate mixi`nannikki maaraatonete heewo aana Kalqete umi atileeticho ikkatinohura doorshu giddono umita ikkite fultanno yine agarranni.
Wole widoonni Kalqete Atileetikse Shampiyoonira 10 kumi meetire xeertinyira Culqu meedaaliya goowaho wodhitinoti hattono 5 kumi meetire riikoordete ama Atileeeticho Gudaafi Tseggayeti konni doorshi aana doorshaho karsanturono, afidhino huuro kayinni jeefote ontu atileetooti mereero ikkitanno gede didandiisiisinose.
Abrahaam Saamueel
Bakkalcho Bocaasa 6, 2016 M.D
