2016 M.D Itophiyu Seennu Piriimeere liigenna Aliidi liige heewo hanaffanno barra faajje assinoonni; Itophiyu Seennu Pirimeere liige Hawaasi Quchumira harinsanniha ikkanna Seennu Aliidi liige heewo Baatu Quchumira harinsannita xawinsoonni.
Itophiyu Lekkate Kowaase massaggannoti tini heewo umi lamala godo`le kaayyo fushshate amuraate Itophiyu Lekkate Kowaase Federeshiine Pirezidaantichi Kalaa Isaayaasi Jira, Heewote Dayrektoreeti, Seennu Latishshinna Heewote Millanna Seennu Pirimeere liige hattono Aliidi liige kilabba riqiwamaano noowa fushshinoonni.
2015 M.D heewote ripoortenna 2016 M.D heewote wodho shiqqeenna hasaawa assini gedensaanni ripoortenna wodho kaajjinshoonni. Battalate, seennu lekkate kowaasera illacha tunge loosa hasiissannotanna kilawete fajjo uynanni garanna fiziyoteraappistetenni xaginsanni hajo aana hala`lado looso loosate wo`naalsha assinannita xawinsoonni.
Seennu Aliidi Pirimeere Liige heewo qolte Bocaasa 22 hanaffe Baatu Quchumira harinsannita Federeshiinete massagaano, kilawete riqiwamaanonna woshshatto assinoonni bissa noowa harinsoonni kaayyo fushshate amuraati yannara xawinsoonni. Konninni, umi lamala heewo 11 Seennu Aliidi Liige kilabba noohura umi lamalara 6 godo`le harinse; mitte kilawe heewo assitannokkiha ikkanno. Fultino Pirogiraame garinni Nifaasi Silke Laafto Sinu Quchumi Gullelle Sinu Quchuminni ledo, Aqaaqi Qaalliti Qirqoosi Sinu Quchuminni ledo, Sheggeri kilawe Lammi Kura Sinu Quchuminni ledo, Baahir Daare Ambo Gooli (FIFA) ledonna Mojo Quchumi Faasil Quchumi ledo umi lamala heewonsa harissannoha ikkanna; Itophiyu Akkaadamete Ispoortetera fooliishshidhannoha ikkanno.
Itophiyu Lekkate Kowaase Federeshiine Pirezidaante Isaayaasi Jira pirogiraamete aana assino hasaawinni, albillichote seennu lekkate kowaase heewo aana illachiinshe loonsannita xawisino. Heewisamaanote kilawe kiiro lexxituro Itophiyu gobboomu deerrinni horaameessa ikkannota kulino. Konnira, kilabba illachiishshe loosatenni, heewisamaanote kiiro lexxitanno gede assine seennuuti lekkate kowaase albillicho mitte qaafo ledate assinanni wo`naalshira Federeeshinete looso irkisa hasiisannota qaagiissino. Federeshiine labballu kilabbara noonsaha seennu lekkate kowaase gaamo kalaqate mereero noo foonqe taashshatenni, baalanti kilabba seennu kilawe uurrissanno gede loonsannita qummeessino.
Konnirano, kilawete fajjonna borreessamanni gara 15 dirira albaanni Kalqete Lekkate Kowaase Maabari (FIFA) qajeelsha uynoha ikkirono; woyyaawinorichi nookkita xawisino. Ikkinohura, Federeshiine haaro ogeeyye qaxarte Gibitsenna Taanzaniya sokke qajeelsha uytinoha ikkanna; Itophiyu kilabbate fajjo aate biddisa qixxeessine kilabbate huwanyo aate looso loonsi gedensanni kakkaooshshu kalaqamino. Kilawete fajjo wodho yitanno gede, uullate noo halaalenna leda hasiisannoha Lekkate seenni latishshu istiraateeje kaima assine Itophiyu widira soorrine qixxeessinonnitanna loosu aana hosiisate balanxe kilabbate faajje assinannita xawisino. Ledoteno, baalanti kilabba Seennu Fiziyoteraapiste qaxara noonsatanna Federeshiine tayxe diro konne loosu aana hosiisannota egensiisino.
Heewonnita xaaddote finco lainohunni uynoonni xawishsira, finco heera horo uytannohu baalunkura ikkanna looso e“e loosate hasatto noo uurrinsha ajjinotanna hasatto leelishinokkita Federeshiine qummeessitino. Konne ikkirono, doorantino godo`le Federeshiinete Kominikeeshine Dayrektoreete ledo halamatenni xaadotenni godo`le sa`anno gede assate wo`naalannita kulloonni.
Abrahaam Saamueel
Bakkalcho Birra 29, 2016 M.D
