Gobba gobboomittete ayirrinye guggu`litannohu qansootise hedonniiti. Mittu mittunku qansichi giddosi noo hedo gobba gatamarate woy laafisatenna saeno diigate wolqa jawate. Dancha coye hedatenni noosi dhukinni baraasanno qansichi noose gobba keeriseno, duuchu handaarinni lophoseno qansootise danchummate hedonninna loosu bikkinni buuxamanno.
Wole widoonni gobbasi daafira ikkikkinnimeessisinna gaamote horo calla heddannoti, heedhannotinna sharrantannoti hallanyu gambooshshuwa noo gobba giddo gobba gobbimmate ayirrinyise hallanyootu horonna hasatto bikkinni keerise booraawanni harasi, lophoseno goshooshamase; saeno tii“ise xa`mote giddora e“asi digattannote.
Konni ragaanni qole fullahaanonna uurrinshubba gobbate keerino, duuchu handaari lophono adda ikkitanno gede kaa`late ragaanni noonsa qeechi lowo geeshsha luphi yinoho. Fullahaanchunniti hedosi calla ikkitukkinni egennosino gobbate lowo geeshsha hasiissanno. Uurrinshano uurrinshimmate dhukisenni, hattono sokkosenni gobbate ayirrinyira suwashsho ikkino qeechi noose.
Fullahaanono ikkito uurrinshubba qole gobbate jironni gatamarantinote; gobbateno baca baraarsitanno gede agarrannireeti.
Lawishshaho, Itophiyu noosehu aaninni xe“isse rosiissinoti; egensiissinoti; lophotenna jireenyisera loossanno gede egennote hurbaate hurbaaxxinohu; hasidhannonsa yannara buqqeensa egenno qarraho mala ikkanno garinni qineessite shiqishshanno gede agartannonsa oosooti.
Tini fullahaano gobba rosiissinota calla ikkitukkinni; egensiissinonsa egennote hurbaatinni qarrise yannara qoteho uurra hasiissannonsa. Korkaatuno tini fullahaano gobbate jironni rossinote; gobba insawiinni bacare agartanno. Insawiinni agartannohu qole keeru doogo leellishsharaati; suwashsho hedo uyitaraati; lophotenna ayirrinyise gawalo egennonsanni iillitaraati.
Konni gobbaanni gobba fullahaanosewiinni agartanno hajo diheedhanno. Rosansa keeru daafira hedo burqisa ikka hoogguronna, wole widoonnino canconna gibbo wixxannoha ikkiro; konne gobbate baantanni waaga deamate. Latishshunna lophote daafira malante woyyitino doogo kalaqa hoogguronna wole widoonni latishshunna lophote doogo shokkishshannore ikkituro; kuni gobbannita luphu yitino maganye ita ikkitanno.
Ikkinohurano fullahaano gibbotenni roore hasaawu doogo leellisha; cancunni roore araaru hedo luphi assite xawisa; hunotenni roore latishshunna lophote doogo dagate garunni egennonsanni burqisse beeha noonsa.
Fullahaanote gobbaanni gobba gatamartino uurrinshubba tenne labbino yawo fula hasiissannonsa albisaano bissaati. Tini uurrinshubba gobba qansootisewiinni gamba assitanno e“onni galtannote; ikka hoogirono noosehunni xe“isse baattanno liqoote woxinni irkisantannote. Gobba qole konne assitannohu uurrinshubba uurritino illachinninna uyinoonnise sokko garinni keerisera; latishshiserano cophi yaanno coye baraarsitaraati.
Konni gobbaanni tini uurrinshubba mannu wolqa amadde; baajeete heedheennansa; biifino ijaarshi aana loossanni leellantanni nooha calla ikkiro; uurritino illacha deamansa; uyinoonninsa sokkono fula dandiitannokkire ikkansa digattannote.
Konni ragaanni baxxinohunni luphiima rosu uurrinshubbanna woloottano gobbate ikkitannota mannu wolqa kalaqatenni qoteho; qarra tirtanno hedubbanna buuxote gumma burqisatenni gobbateno dagateno ikkanno coye baraarsa noonsa.
Ikkinohurano gobba gobbate gede keerise buuxaminota; latishshunna lophoseno rakkinota ikkitanno gede; mootimma mootimmate gede; dagano dagate gede assitanno wo`naalshinni qoteho; luphi yino gobbate asali noonsa fullahaanonna uurrinshubba konnira ikkanno garinni qeechansa fula hasiissannonsa.
Amaalammete komishiine duucha beeqqisiissino bare gutunnita kalaqqe hasaawisate xa feeffatte afantanno. Duuchunku qoqqowira yinanni deerrinni daga baalante kifillanni riqibbannore filte guddinota buunxoonni. Sai dirira aliye oli korkaatinni hasaawinsoonnikki Tigirayete dagano beeqqaancho ikkitanno gede komishiine qoqqowu yannate geeshshi pirezidaantichi kalaa Geetaacho Raddihunni ledo malte maahoyyaancho dawaro afidhinota kultino.
Duuchanka beeqqisiissanno yine hendoonni gobboomitte amaalammete bare duucha beeqqisiisate assitanni afantanno harinsho naandannite. Konnira gobbate geerri,amma’note annuwi,meyaati labbaahu,bisu xe’ne noonsari,aju akkali, addi addi poletiku paartuwa riqibbino hettisamaano baalunku gobba sufissanno yine sommoonni komishiine widoonni gobboomu amaalamme sumberanna jeefo gantara beeqqaancho ikka hasiissanno.
Bakkalcho Birra 29, 2016 M.D
