Hundinni kayse techo geeshsha mulitinna xeertote afantanno diinna gobbate giddo noo cancishaano ledo halante Itophiya diigate hara dandiitanno xeertinyi geeshsha hodhitino. Baxxinohunnino tenne yanna kalaqantinoti Itophiyu diinna saada dirrara mitteenni heedhino daga amma`notenni babbadatenni,mimmitonsa ammantannokkire assatenninna harinshotennino heedhanno kiphonni Itophiyu laaffanni hadhanno gede halchatenni hinko ga`midhe loossanni afantanno.
Itophiyu daga ayirrinyinsara yekkeerantannokkite. Sannate giddo giddoydinninna gobbaydinni xaaddannota bayirroonyenna gashshootu mittimma jiffanno assootubba jawaatte sharrante wo`mu ayirrinyinni xaa ilamara tareessitino. Xaa ilamano annuwise eeggo adhatenni gobbate bayirroonyenna gashshootu mittimma mundeesenninna miqichisenni ayirrisiissino; ayirrisiisate aanano afantanno.
Gobbaydinna giddoydi diinna mittimma halamatenni gobba laafissannorenna harinshotennino diigganno yite heddanno wolqa tantanatenni; qodhisiisatenninna qajeelshatenni dhaggete diinimmansa xawoho farcishiishidhanni heedhino.
Tini gobbaydinna giddoydi diinna sannate keeshshitinota naaxxissannota dagate balchoomma diigate dodantanni leeltanno. Dana, sircho, amma’notenna addi addi babbaxxa seesa assidhe heedhino daga mimmitonsa ammantannokki gedenna kiphantanno gede assitanno hedubba kalaqatenni gobbate giddo gibbonna cancu mootoo`manno gede jawaatte loosate aana afantanno. Umonsa poletiku manni gede kiirtannori uminsata mitte hedono amaddukkinni soqqamaanotenna cancishaanote qote uurrite mitte daga wole daga aana kakkaysatenni gobba diigate murcidhe ka`ino.
Ikkollana dagate giddonni fultinoti Itophiyu gargarooshshu olanto sharro assatenni hunote wolquwa diriirsitino sharre yanna yannatenni diigganni afantanno.
Itophiyu gargarooshshu olanto bareende xawishshaseeti, qeelle assa malaateseeti. Itophiyu gargarooshshu olanto babbakkino gadachote basera fultannokki ilaali, dirritannokki gaari, qeeltannokki diini dino. Konne halaale baxillaano agurrana diinuno farci`rannote.
Itophiyu gargarooshshu olanto dagate giddonni fultinota ikkasenni; aye woyteno dagoomittenna gobboomitte sokkubba duqqite millissanno. Gobbate bayirroonye ayirrisiisatenna qansootu keere buuxisate kakkalantanno. Dubbu giddonna balete ubbanno. Mundeese duntanno; miqichose butukkanno.
Gargarooshshu olanto qaccetenni qaccete geeshsha gobbate ayirrinyenna dagate hobbaateeti. Itophiyu gargarooshshu olanto bareendesenni baalunku mitte huuronni sumuu yitannoti, keeru yannanni latishshu janna hedeweelcho kalaqamanno qarrinni massannokki bareeda olantooti. Olanto Hiyyeeyyete gede mittimmatenni sharrantannota, Doobbiichu gede baychose kisiissannokki bareeda ikkase batinyu sumuu yitanno. Olanto qeelle kalaqqanno, reyo qeeltanno, hedeweelchu qarrinni masillaabbannokki, hasattose illachisera hosiissanno, wolaphote waaga garunni egentino, tunsicho sayisa dandiitanno wodanaammaati.
Itophiyu gargarooshshu olanto olu hoshshosenni bareendetenni olantanni ama gobbasera kakkalantino. Gobbatenna dagasera noose baxille hasaawunni ikkikkinni loosunni leellishshino.
Baxxinohunni olantonke soorrote kawa wirro haaroonsini yannanni hanafe dagitte akatooma uddi’ratenni Itophiyu daga gobbaydi horraanowiinninna giddoydi cancishaanowiinni gatissanni keeshshitino. Olantonke mundeese dunte, miqichose butukke baattino waaginni gobba diigamatenni gatisse jireenyu doogo aana hodhitanno gede assitino.
Ikkollana gobbayiditinna giddoydi diinna qinaawatenni olantote su`ma bushiishate dadantanna la`nanni. Ikkollana dagate giddonni fultinotinna bareeddate gambooshshe ikkitinoti gargarooshshu olanto kaphu mashalaqqenni diigantannota dikkitino.
Roorenkanni yanna yannatenni qeellete aana qeelle guggu`litanni dagate horonna gobbate bayirroonye agarsiisate ikkadimma hiitte yannannino aleenni kaajjite afantanno. Hawalle 116ki gargarooshshu olanto barrira keerunni iillishi’ne! Ayirrinyu Gargarooshshu Olantonkera;Keeru Gobbankera!
Bakkalcho Birra 15, 2016 M.D
