
Haanju harumi amuraati hanafami dirira Itophiyu sette dirra giddo ontaa miliyoone chigginye kaasate mixidhe loosu giddora e`ino. Sa`u lee dirrarano shoollaawo biliyoone chigginye kaassino. Lamalki diro amadanno tayxe haanju harumi amuraatinnino lamala bixxille onte biliyoone chigginye kaasatenni konni alba kaansoonni chigginye ledo xaphooma shoollayina lamala biliyoone ale iillishshanno.
Gobbatenni sae luphiima kalqoomu adhamooshshe afirinohu Itophiyu haanju harumi amuraati diru tuqa sajjoo miliyoone ikkitanno daga beeqqitanno pirojekiteeti. Hala`lado dagate beeqqonni gumullannihu kuni haanju harumi amuraati kaansanni chigginyubba batinyi diru dirunnino babbaxxitino ayirrinyu deerra iillanni tayxe amuraati aana iillino. Tayxeno “kaasatenni lopha” yaanno adawarshinni lamalki yannara hala`lado dagate beeqqonni gumullanni.
Haanju harumi amuraati hanfi dirinni kayse kaasantino chigginyubbanni gobbate gede haammata gumma leeltino. Gobbate dubbu diwishshi lemiina sase anga xibbuunni iillasinnino aleenni diilallote gadi geinohanna gibrinnu loosirano injiinoha ikkino.
Haanju harumi miinjaho. Babbaxxitino laalchubba laalchimma ledatenni sagaletenni meessaneete dandaatenni sae gobba afidhanno doolaare luphiimu deerrinni lexxitanno gede assino. Itophiyu gumultanni noohu chigginye kaashshi amuraati gobba haanjunni uddisiisatenni sae chigginye kaashsho gibrinnu ledo qineessatenni harisanna laalote gumma Avokaado labbinore lede babbaxxitino chigginyubba kaasantanno gede dandiisinonna boode dirra giddono sagalimmate hossannoreeti. Kunino Itophiyu sagaletenni umose dandiitanno gedenna kaa`lamaanchimmatenni fultanno gede assate ragaanni qeechisi luphi yinoho.
Gobbate gobbaydi soorro luphiimu garinni diwannohu bununo laalchimmasi lexxitino. Boode dirrara albaanni lamala xibbe miliyoone doolaare ikkitinoti gobbaydi eo lame biliyoone doolaare ale iillitara dandiitino. Haanju haruminni kaasantino chigginyubba giddonni luphiima kiiro amaddinoti bunu chigginyubba ikkansannino Itophiyu bunu laalchi bikkisenni Biraazilenna Vetinaametenni aanchite sayikki deerra amaddanno gede dandiisinose. Haanju harumi dirrate hoshooshamanni olluu gobbuwa widira ha`ranno bushsha ajisha dandaasi mitte seyooti. Diru tuqa mitte bixxille honse toone ikkanno bushshi olluu gobbuwa widira ha`ranni keeshshino.
Ikkollana haanju harumi gobbate gede gumulama hanafi yannanni kayse abbay layyo giddo luphiima kiiro noose chigginye kaansanni hee`noonnihura sannate olluu gobbuwara elto ikkitanni keeshshitinota bushshu jironke agaranna qoqqowa dandiisannonke. Diru tuqa mitte hekitaare baatto aana hoshooshamatenni hafanfarannoha mitto xibbe sajjoo toone bushsha shoyilliina lame toone heeshshi yaanno gede assano dandiinoonni.
Xaphooma diilallote gadi soorro korkaatinni bushshu hoshooshama, baci lubbuwate goofonna lolahu jifanna keeshshitino gobbankera dancha mala ikkinota buunxoonni.
Haanju harumi miinju horosinni sae dagoomitte xaadooshshenna mittimma kaajjishanno. Haanju harumi dagate beeqqonni dumullanniho. Rosaano, baatto loosidhe galtinori, quchumu teessaano, mootimmate loosaasine, ga`labbote bissa wkl beeqqitannohonna gutu beeqqonni gobbansa jiroonsitanno yannaati. Kuni qole mittimma jawaachishannonna gutunni gobbate lophora uurra kaajjishannoho.
Kuri baalu haanju harumi gumma mitteenni waaxantanni woyte Itophiyu lophanno gede assitanno; jireenyu safono tuggannoreeti. Aantino ilamarano woyyaabbino gobba ragisiisate dandiisannoha ikkasinni baalunku qansichi tayxe haanju harumi amuraati aana baqqeenyunni beeqqa hasiissanno!!
Bakkalcho Ella 26, 2017 M.D