
Abbayi kofatto xaphooma Itophiyu daga beeqqonninna mootimmate murci’raancho harunsonninna irkonni xaphoomu ijaarshu loosi xaa yannara gumulamate iillinota kulloonni.
Kofattote ijaarshi loosi gumulaminona konni gedensaanni irko dihasiissanno yaannohunni sa’u muli yanna kawa kaphunni fincinoonni duduwi kaiminni dagoomu irko ajjanni dagginota kulloonniha ikkanna; kofatto gumulate gattino boode yanna giddo dagoomu hala’lado irko assanno gede woxaratto shiqqino.
Kofatto haammata jifo giddoonni sa’e uurrinshatenna dagoomu dipilomaase qeellenni dukkisante ijaarshunna way wonshonni sa’e caabbichu wolqa burqisate deerrira iillitino.
Itophiyu qansootinna ilama pirojektete loosi faajje ikki yannanni hanaffe hexxo murtukkinni sa’u seeda dirrara babbaxxitino doogganni irko assitanni keeshshitinoti anfoonnite.
Konninni, daga baala hanqaffino beeqqonna irkonni sa’u dirrara dagoomu beeqqo kaajjishatenni jawa irko gamba assa dandiinoonni.
Abbay kofatto xa noo deerrira deerrira deerra iillitinohu dagatenna mootimmate murci’raanchimmanna kaajjado sharronniiti.
Itophiyu qansooti, ilamanna, baxillaano gobbate giddo ikko Baarawido heedhannori assitino baala hanqaffino sharronniiti.
Xaa yannara pirojekitete ijaarshi gumulshu loosi jeefote gafira afamanno. Kofatto xaa yannara caabbichu wolqa burqissanni afantanno.
Kofatto gobboomu sumiimme kalaqqinote; baalante daga irkonni woratenni ijaarantanni noote. Itophiyu daga kofatto iillitino seyoote deerra roore qeellera kakka’’a hasiissanno.
Boondete hidhatenni, harancho sokkate kiiro horoonsi’ratenni hattono addi addi doogganni assinanni irko xaa suffe hadhanno gede deerru deerrunkunni dagooma kakkayisa agarranni.
Qansootu xaa geeshsha pirojekitete kaajjado irko assitanni daggino harinshora jawu galatinna afanshu hasiisannonsa. Kofatto muli yanna giddo faajjetenni maassantanno yine agarranni. Konninni, daga beeqqo assatenni kofatto gumulate gattino boode yanna giddo hala’lado irko assitanno gede
Bayiriidi Haaroo’mate kofatto qineesso pirojekite borro mini sa’u muli barrubba giddo uyno xawishshinni xaa yannara kofattote ijaarshi loosi gumulamino yaannohunni irkote assitanno qansooti lawashshi yitanni dagginota kulloonni.
“Gutunni dandiineemmo’’ yaanno adawarshinni ijaarshu loosira jiro gamba assate loossa sa’u seeda dirrara kaajjite suffanni dagginoti loosu mare gafa fulikkinni mommodda dihasiissanno. Konni baajeettete dirinnino dandaami garinni kofattote ijaarshi loosira assinanni irko jeefote geeshsha suffanno garinni loosa agarranni.
Eo gamba assinanni hee’noonnihu gobbate giddo Boonde hiratenni, Diyaasporuwinni, 8100 harancho borrote sokkanni, Itophiyu caabbichu wolqa owaantennni hattono wolootta bu’anniiti. Ikkeennano, ijaarshu loosi goofanni noota hedote giddo woratenni hananfoonni garinni jeefisa qansootuwiinni agarantanno yawooti.
Abbayi kofatto wo’munku Itophiyu qansootinna ilama dhukinni calla ijaarantanni noota ikkasenni wolootta bissanna uurrinshubba angansa wortinokkita ikkase addinta naaxxissannote.
Anfinte gede Gibtsenna wolootta gobbuwano kofattote ijaarshi loosi gufi’ranno gede hattono insa irko nookkiha loosa dandiinannikkita kultanni sharrantanni daggino harinsho ajjanni daggurono gobba konni deerrinni pirojekte ijaadhate dandiitannokki gede assate wo’naaltanno bissa dihooggino.
Jawa gobboomu pirojekite ikkasenni albillichono ijaarshu loosi gumulama geeshsha wo’manti Itophiyu ilama irkonsa kaajjishshe sufisiisa hasiissanno.
Ikkinohura, wo’munku Itophiyu qansooti Boonde hidhatenni ijaarshu loosi goofara iillinohu Abbayi kofattora xaano agarranninsaha qansichimmate qeechansa fultara agarranni.
Bakkalcho Onkoleessa 28, 2017 M.D