Addis Ababa:- Tayxeti gobboomu amaalamme yekkeersiissanno hajubba aana sumimme abbate assinanni gutu wo`naalshira qara gafa ikkitanno yee Xaphoomu ministirchi Abiy Ahimed (D/r). coyi’ri.
Xaphoomu ministirchi Abiy Ahimed (D/r) Itophiyu gobboomu amaalammete komishiine massagaano ledo komishiinete loosi gumulsha lainohunni hasaawa assinoha ikkanna; komishiinete qaru komishiinerchi Mesfin Ara’’ayya (P/r) xaa geeshsha gumulantino loossa lainohunni xawishsha assino.
Xaphoomu ministirchi tuqu xaadi qoolisira sayisino sokkannino oyimbarra Itophiyu gobboomu amaalammete komishiine bissa xaade loossansa noo deerra hasaawasi qummeessino.
Ikkinohurano tayxeti gobboomu amaalamme yekkeersiissanno hajubba aana sumuumme kalaqate assineemmo gutu wo`naalshira qara gafa ikkitannota ammaneemmo yee xawisino.
Jireenyu paarte laynki pirezidaatichinna qaru borrote mini sooreessi Adem Farah isi widoonni; paarte gobboomu amaalamme gummaame ikkitanno gede assitanno irko suffannotanna amaalammetennino beeqqaano ikkate qixxaawo assitinota xawisino. Komishiine gummaame goboomittete amaalamme harisate xaa geeshsha gumultino loossa jawaachinshannita ikkase kayse; baxxinohunnino amaalamme hanqafaanchonna beeqqissannota assate baalante bissa beeqqo buuxisate ha`noonni xeertinyinna xaphooma wo`naalshubba dhaggeeffantannita ikkase buuxisino.
Aateteno “aywiinni may agaramanno” yitannota badatenninna gattino loossa danchu garinni gumulate komishiine hajo la`anno bissa ledo hasaabbanni noota xawishshu aaninni huwatate dandiinota coyi`rino.
Gobboomittete amaalamme qara qara gobboomu hajubba aana gutu sumuumme kalaqate dandiissanno; kunino Itophiyaho sufote keere dirrisatenni jireenyunnita harinshose ollahisate dadiissannota buuxise; konni kaiminni jireenyu paarte bissa ledo harinsoonni hala`ladu hasaawinni gutu sumuumme aana iillinoonni yiino.
Goboomittete amaallamme komishiine qaru komishiinerchi pirofeeset Mesfin Ara’’aya isi widoonni; komishiine xaa geeshsha noo harinshonni beeqqisaancho gobboomitte amaalamme harisate dandiissannota qixxaawote loossa gumultanni keeshshase xawisino.
Konninnino komishiine babbaxxitino dagoomu kifilla ledo hawaasa assase xawise; mootimmate luphiima loosu sooreeyye ledo assinoonni hasaawi illachi mootimma komishiine xaa geeshsha gumultino loossa huwatte aantete loossara agaramannose qeecha fultanno gede dandiisate ikkinota huwachishino.
Ba`rete aana xaphoomu ministircha lede dagate riqiwamaano amaale mini songaafichi Taaggese Caafo, layinki xaphoomu ministirchinna gobbayidi hajo ministirchi Demmeqe Mekkonnin, ministirootu amaale mini bissa hattono woloota luphiima.
Abbebech Maatewoos
Bakkalcho Wocawaaro 24, 2016 M.D
