Addis Ababa:- Goyrete Irshira 7 kume 222 hektaare hektaare ali baatto loonse wixunni diwate qixxeessinoonnita Malga Woradi Irshunna Kalaqamu Jiro Latishshi Borro Mini egensiisi.
Borrote mini Soreessu kalaa Bizuneh Bashiiro Itophiyu Pireesete Uurrinshahara xawisino garinni; woradaho tayxe hawadi yanna goyrete Irshi lloosinni qixxaawonni 7 kume 222 hektaare ali baatto qixxaabbino.
Konninni, 489 kume 143 kuntaala laalcho gamba assate mixi’ne loosu giddora e’noonnita xawisino.
Qarunni dikkote xaadooshshe kalaqatenna halashshate aana illachishinoha Biiru Hayxe albisa assine Qamade, Baaqeelanna Atara labbinore gidu danuwa aana illacha tunge loonsanni hee’noonniha ikkanna; 5 kume hektaare Biiru Hayxira ikkitannota Irshu baattonna wolootu gidira 2 kume 22 hektaare, xaphoomunni 7 kume 222 hektaare ikkitanno baatto mixote amande loosu giddora e’noonnita buuxisino.
Woradu garinni tayxeti hawadi yanna goyrete Irshi baatto qixxaawonni 54 qasiisotenni Biiru Hayxi laalchi aana illacha assite tantanantinota buuxisiise; tenne timote iillishate babbaxxitino loossa gumullanni hee’noonni yiino.
Konni loosira 2 kume 730 kuntaala Yuuriya bushshu madaabbaranna hasiissanno waaco loosidhe galtinorira tuqinsoonnita qummeessino.
Kalaa Bizuneh qummeessanni; xaa yannara waacote ledo amadisiisantinoti waagu lexxo loosidhe galtinori aana hekko wortukkinni digattino yee; tenne suffino yannara tirate hajo la’annonsa bissa xiinxallotenni safantino tiro aana illacha assite la’anno gede sokkasi sayisino.
Demmellaash Demmeqe
Bakkalcho Ella 5, 2017 M.D
