Addis Ababa:- Arbagoonu woradi giddo afamannoha Garambi Ilaala daa’’attote iillo ikkanno garinni latinsanni hee’noonnita Woradunnihu Qaru Gashshaanchi Kalaa Bukkuula Woncaano coyi’ri.
Gashshaanchu Itophiyu Pireesete Uurrinshara xawisino garinni; Garambi Ilaali Sidaami qoqqowi giddo afantanno Ilaalla mereerinni jawiidi ikkasi kule; qooxeessu daga ledo halamatenni agarame keeshshasi xawisino.
Ilaalu gottinyesi 3 kume 368 meetire ale ikkannota kule; daa”attote iillo ikkanno garinni loonsanni hee’noonnita xawisino.
Ilaalu daa”atate ikkanno gede qoqqowu mootimmanna qooxeesu daga ledo halamme loonsanni afamannita xawisinohu Gashshaanchu; baxxinohunni, qooxeessaho heedhanno daga annimatenni agartanno Ilaala ikkasi egensiisino.
Ilaala daa”attote iillo ikkanno gede qoqqowu mootimma irkonni babbaxxitino ijaarshubbanna latishshu loossa harinsanni hee’noonnita qummeesse; hanafantino loossa yinoonni yanna giddo gumulantanno garinni loonsanni hee’noonni yiino.
Garambi Ilaala garunni latisatenni gobbate giddonninna Baara-widinni daa”atate daanno mannira maala’lisannoha assate ragaanni qooxeessu daga halammenna qeechino luphiima ikkasi coyi’rino.
Garambi ilaali qooxeessira afantanno dubbu saadaranna kalaqamu agarooshshira mootimma baxxino illacha tugge la’anni afantannota xawisino.
Arbagoonu woradi giddo daa”attote ikkitanno base haaammata noota qummeesse; kuri kalaqamu jiro qorombe amande hasiissanotanna qooxeessaho afantanno dagara kalaqamu jiro amado lainohunni hedo cu’mishiishatenni woradu qeechasi fulanni afamannota coyi’rino.
Kuri haammata kalaqamu jiro daa”atote sa”e eote bue ikkitanno assate mixi’noonnitano hattonni.
Daa”atote base hala’litanni hadhu kiironni wedellaho loosu kaayyo lexxitanni hadhannota gashshaanchu buuxisiisino.
Wedellu qajeeltino ogimmanni loosoho bobbakkanno gede assate mixi’ransa qummeessino. Garambi Ilaali ledo amadisiisame lamu maamarinni tantaname 50 ikkanno wedellira loosu kaayyo kalanqoonnita egensiisino. Albilicho loosu giddora e’niro haammatu wedelli horaameeyye ikkitanno yiino.
Qooxeessu dagano daanno wosincho adhate leellishanno akati daa”ataano goshoshannoha ikkasi egensiise; qooxeessaho heedhanno dagara galatasi shiqishino.
Bizuneh Birhaanu
Bakkalcho Ella 5, 2017 M.D
