Hosaana፦ Hosaanu koridere latishshi dagannita latate hasattonna halimma buuxisinoha ikkasi quchumu kantiibi kalaa Daawit Xumdedo xawisi. Daga quchumu latishshira mitte biliyoone ali birra irko assitinotano xawisino.
Kalaa Daawiti Xumdedo Itophiyu Pireesete uurrinshara xawisino garinni; Hosaanu quchumira koriderete latishsha hananfoonnihu 2 bixxille 6 km ikkanna; daga latate noonsa hasatto quchumu gashshooti huwati gedensaanni 35 km widoogge lossinoonni.
Konni mereerinni 24.5 km ikkanno koriderete latishshi loossa hananfoonnita xawise; 75 anga jeefinsoonnita hattono koriderete latishshi loossa Wocawaaro agani 2018 MD wo’munni wo’ma xaphi assinannita egensiisino.
Xaa yannara Hosaanu quchumira 7 biliyoonenni hendanni latishshu loossa loonsanni hee’noonni yiinohu kantiibu; 3.6 biliyoone birra koriderete latishshira hosiinsanni hee’noonni yiino. Konni garinni Hosaanu quchumi teesaano 1 biliyoone ali birra irko assitino yiino.
Hosaanu quchumira koriderete latishsha hananfara albaanni quchumu pilaane qixxeessate loosonna Addis Ababu quchuminni wo’naalsha adhinoonnita xawisinohu kalaa Daawiti; koriderete latishshi lekkaasinu doogga, haanja qooxeessa, kaameela uurrinsanninna ispoortetenni boohaarranni qooxeessa lendanna wayi fooncho, elekitirikete kaameella chaarje assi’nanninna addi addi dagitte bare harinsanni qacha xaphi asse amadinoha ikkasi buuxisino.
Kuri safote latishshuwa hegeraammanna ilamate maareekkantanno deerrinni loosantanni noota xawinsinohu kantiibu; konni kaiminni loosu harinsho giddo safote latishshuwa mule heedhanno uurrinshubba halammetenni loonsanni hee’noonnita coyi’re; koriderete loosi 1 kuminna 600 ale ikkanno qansootira loosu kaayyo kalaqinota xawisino.
Wolu koriderete latishshi kaameelu dano ajishatenna quchumu turizimete lophora noosi qeechi luphiima ikkasi coyi’re; koriderete latishshi quchumu akata soorranni daasinni; kunino quchumu ikonoomera millimmo ledannoho yiino.
Yaareed Geetaachew
Bakkalcho Ella 5, 2017 M.D
