Itophiyu Atileeticho Tigist Aseffiti Maratoone Kalqete kibirewesone Jarmane Berliinete harinsoonniwa hiiqqitu. Sai diro Jarmane Berliinete Maratoone baychu saate woyyeessatenni qeeltinoti Tigist, tayxeno layinki yannara hoodisse albase Berliine higginoti Kalqete riikoorde hiiqqitanno yine dihendoonni. Ikkollana, dhaggete Atieeticho hendoonnikki yannara kalqete kibirewosene dhaggetenni umi yannara Itophiyu angara eessitino.
Dhaggete Atileeticho Tigist, jawa gede ayirrinoha Maratoonete kibirewosene 2:11:53 ikkitino haaro saate ammanate nafa huluullammanni saate borreessiisse qeela dandiitino. Kunino, 2019 aana Keenyu Atileeticho Biriigiidi Kosigee Chikaagote Maratoone alba borreessiissino 2:14:04 saatenni 2 xiqqeessi ale woyyeessite qeela dandiitino.
Atileeticho Tigist Maratoonete heewora beeqqaancho ikka dandiitinohu jawa illacha tungisekkinniiti. Tenne heewora albaanni, Maratoonete dodansho handaarinni heewisantinohu lame higge callaati. Sai diro Berliinete heewonni balaxxe beeqqaancho ikkitinohu Saudi Arabiyaho qixxeessinoonni Riyaadi Maratoone aana ikkanna, 2:34:00 ikkitino yannanni jeefissino.
Sa`u barrubbara Berliinete harinsoonni Maratoone heewo aana umise saate sasu xiqqeesinni woyyeessa dandiitino. Seeda yannara 800 meetirenni doddinoti Tigist; muli yanna kawa xawu heewora albase qoltino. 2016 Olopmiikete heewora Itophiya riqibbe beeqqaancho ikka dandiitino. Ikkollana, bocu heewote gumulora sa’’a hoogatenni beeqqaancho ikkitukkinni gattino. Tigist 800 meetirennino ikko 400 meetirenni heewisantanni keeshshitinoti qaangannite.
Atileeticho balaxxe bocu maratoone heewonni qeelate dandiitino. Tigist sai diro qeeltu yannara borreessiissino saate 2:15:37 ikkitanno yanna giddo eatenni qeela dandiitino. Tigisti saate hattenne yannara Itophiyu seennu maratoone kibirewosene ikkite no. Xa kayinni ledose millimmo loossannoti kalqete shaampiyoona Amaane Beriisoti 2:14:58 saate dodatenni qeeltino. Tini saate ise anga no. Tigist Aseffiti sa`u yannara gawajjo iillitinose daafira konni ka`a heewo ikkitinohe yinoonnisenka. Heewisama agurranna mininni milli yaa nafa hoogge sa`ino. Ikkollana, Atileeticho Tigist hexxo mudhitukkinni kalqete kibirewosene ama ikkitino.
Kalqete Atileetikse heewo giddo luphiima ikkinohu Pilatineemete deerrinni noohu Berliinete Maratoone hanaffinoti Awuropu kiironni 1974 Jarmanete qaru quchumira Berliinete harinsanni heewo wiinamu saate borreessiinsanni Maratoone giddo mitikkiho. Itophiyu Atileetooti tenne heewora babbaxxitino yannara qeeltinoha ikkanna; Hayile Geberesillaassenna Qeneniisi Baqqalihu albisaanote.
Seennu widoonni, Geexe Waami tenne Berliinete heewo qeela dandiitino mitticho Itophiyu beettooti. Geexe Awuropu kiironni 2006na 2007 heewo hoodisse qeela dandiitino.
Berliinete Maratoone 12 hinge kalqete kibirewosene woyyeessinoonni. 9 hinge labballunni, sase hinge seennunniiti. Hayile Gebiresillaassenna Iliidi Kipchoge lame lame higge kalqete rikoorde woyyeessa dandiitinohu Berliinete Maratooneraati.
17 higge Itophiyu Atileetooti Berliinete qeeltino. Hayile Gebiresillasehu (4 hige) hoodise qeelino. Qananiisi Baqqallihu 2 hige hattono Guyye Adoola labballunni qeeltino Atileetootaati. Keeniyichu xeertinyeho albisaancho ikkinohu Kipichoge Berliinete Maratoone xaano marro ontikki doychora qeele dhagge loosino. Maratoonete heewora umi yannara beeqqaancho ikkinohu Marki Koriiri, Kipichoge hoode ikkatenni qeela dandiino. Itophiyu Atileetichi Taaddese Taakkele 3ki deerra amade guda dandiino.
Geexe Waamiti 2 higge, Aberru Kebbaditi 3 higge, Atsede Habtaamuti, Ashitte Bekiriti, Tirfe Tseggayeti Goytetoomi Gebresillaassetinna Tigist Asseffiti seennu Itophiyu Atileetooti Berliine maratoone heewora konni albaanni qeele sainoreeti.
Abrahaam Saamueel
Bakkalcho Wocawaaro 17, 2016 M.D
