Damaru yaa, leda, ledi, kuusi yaate. Damaru soorrote malaateeti. Jaddaasinu sutantanno Masqali baatooshshu malaati widira soorramino; Damaru, haammata manna gamba asse keeshshiishannoho; Damaru ajinowa ledate; Damaru billaallinoha gamba assate. Base basente xeerti’re nooha gamba assannohonna ledannoho.
Haaru diri chibbo haaru garinni xawino diri hanafannoho. Mannootunniti haaro hexxo haaro gede hanaffannote. Masqalu ceicho usurantanno yannaati. Tini yanna Baattote hayisso mudhannote.
Damaru Masqalu ayyaani feeffatora haqqe lendanniho. Haqqe gamba assine chibbo; chibbo gamba assine Damara assinannite. Haqqete xigirra ayii geeshsha billaalituro gamba yaa hoogguro chibbo ikka didandiittanno. Haqqe gamba asse xaadisannohu usuraanchu no. Chibbo gamba yite irkisante uurra hoogguro, Damara dikkitanno. Chibbo mittowa uurrisannohu mereeri haqqichooti. Kuni haqqichi, jawaatahonna gaangawasi noo haqqe duqqa dandaannoho. Tini heelliicho Itophiya riqibbanno.
Chibbote haqqe baalanti mitto dana dikkitino. Mittu baychinnino dixinqinanni. Mittu mittunku haqqi umisinni uurranno. Kayinnilla, jawaante, kaajjille, dhukanna wolqa heedhannonsa gede chibbo ikkite ledantanno. Haqqe xaadissanno xushsho gede, Itophiyu daga xaadissannoti babbaxxitinoti ayiimma no. Damara gamba assatenni gobbanke gottima adda assate gamaba yineemmo lawishshaati.
Itophiyu chibbote haqqe gede, budu, amma`no, jiro, hornyu, laooshshu, dhagge noosete. Baalunku gadadame mittu garinni heda dinosi. Mittu budinni fula dinosi. Mittu Afoo coyira dihasiissannosi; mitte ayiimma gadadunni hee`ra dihasiissannonke. Ikkollana, tenne baala elto gamba assine lendiro, umo ikkine chibbote gede mittu qarqarira dhuka ikkannonke. Sufe qole, Damaru gede xaadinse mittu gafinni uurrinummoro jawa gobba ijaarreemmo.
Tenne chibbo mitto asse uurrisannohu mereeri haqqichooti. Kuni chibbo mittowa qole xaadise uurrisannohu mitte miinju polotiki dagooma kalanqeemmo Federaalete amanyoote leellishanno. Badooshinke mittimmankeeti; Itophiya leellishanno. Kuni Itophiyu dagoomi mittimmankenni ledamme, gaacheenunni waajjinannire, jiraameette, jawaata, bayira gutu gobba ijaara dandiineemmo. Kuni ikkannohu, Damaru gede mittimmatenni xaande ledammummorooti.
Chibbo hallanyunni qooxeessinkera loosa dandiineemmo; Damara kayinni, gutunni ikkine leda hoongummoro diledamanno. Dangoommo doogo babbaxxitinota
ikkitara dandiitanno. Amma`nonke, doorshinke, yortonkeno uminke chibbo ikkitara dandiitanno. Gobbanke kayinni gutunni ledamino Damaraho yaate. Ninke hoongummoro gobbanke diheedhanno. Ayii geeshsha quqquxammummoro Damara callootinke diqanseemmo. Woluno daara agarreemmo. Gobbate gede ikkinninna, mittu ollii gede aneho diyineemmo. Damaru baalunkuho; baalunku amuraatinni gumulamannonna gobbanke hincilaallooti.
Damara ane chibbo widoonni balanxe qanso diyineemmo. Damara qansanni yannara, “Ane chibbo giirrantannokka yine diyaandeemmo. Giira qasate amuraate hiikkannino qasa hananfo qarranke dikkino. Qansoonni giira baalankawa iillishshanno. Itophiyaho kaayyote giira ikkitinoti Itophiyu lopho hiikkono giirama hanaffuro yannate giddo baalankawa iillitanno. Mittu haqqichi woleho, mitte chibbo woleho caabbicho ikkatanno gede iillishanno daafira gatannosiri dino. Ikkollana, ledanno dhuki no. Baalanka qansanni ha`nanni kiiro, caabbichu dhuki lexxanni ha`ranno.
Ninkeno wolu fiixinkera beenkummo kiironni, xeannonkeri dino. Itophiyu dhuki lexxanni ha`ranno; Illacha tungeemmohu chibbote aana ikkikkinni, jawu Damari aanaati. Ayyaanu umi konneeti.
Chibbo hidhinammoranna hirrammora dandiineemmo. Damaru kayinni Itophiyu gedeeti. Dihirranni; disoorrinanni. Baalunku umisinni haa`re hareemmo diyaanno. Gutunni lende gutu wodaninni amande ha`neemmo ha`nura halaaleeti; Ninke su`maati.
Damaru halalaanyu Masqali afaminowa kulanno kulaanchooti. Gobbanke lophoranna Jireenyaho mittimmatenni uurrineemmo lawishshaati. Damaru raga kulanno. Halalaancho Masqala badinoho. Itophiyu oosono uurritannonna hadhanno halalaancho ragaati; hexxosira caabbichoho. Jawaantesera lawishsha ikkanno. Masqala hanse afate yanna adhinonte gede, Jireenya abbate hattonni jawa gede daafurranni wo`naalsha hasi`ranno. Masqala hase afate gedeeha haammata mannu wo`naalshanna mittimma hattono amaalamishsha hasi`ra wodaninni ikka noosi.
Tayxeha Damaru ayyaana togoota jajjabba hedo wodanchinanni ayirrinseemmo gede hexxo asseemmo.
Dancha Damarunna Masqalu ayyaana baalunkura ikkonke!
Itophiyu Oososi Wo`naalshinni ayirrenna waajjineenna hegerera hee`ro!
Kaaliiqi Itophiyanna dagase maassi`ro!
Wocawaaro 16, 2016M.D
Bakkalcho Wocawaaro 17, 2016 M.D
