Qullaawu maxaafi Efessooni sokka foliishsho 2, kiiro 14 te aana “isi keerenkeetina mereeronke noo gibbote huxxa maalisinni diigino” yaanno wote kiristoosi sae aamaminonke fojo kulannonke.
Kaote ayyaani Mootichinkenna xagichinke Yesuusi kiristoosi mannu oosora hunonsaranna cubbinsara sayinse uynoonsa reyo hegere heeshshora soorratenni qarra adhinohu, xiiwaminohu,mishaminohu, sutaminohu,madi’rinohunna masiqalu aana sutame reyoo reyootenni qeele kainota qaangeemmo amma’note ayyaanaati.
Mootichinkenna xagichinke Yesuusi Kiristoosi uullate aana keeshshi dirrara rosaanosira duucha lawishsha agure harinonsa. Gatona yaa,baxille,shooshanqenna umisinni roorse wole baxinotanna heeshshi yee woleho soqqaminota ku’u ku’uyiwa baxamatenni roduuwimmatenni konni kaote ayyaani giddo ronseemmohu qaalunnino hee’neemmo heeshshonni wolootaho lawishsha ikkatenni hee’neemmo qarqari wo’munkuwa adhamooshshu heeranno ikkitooti.
Mootichinkenna Xagichinke Yesuusi Kiristoosi ninke ayirrisara yee shollaataamo bayicho saadate hoowe giddo ilami. Umisi wodhino rosaanosi giddonni mittu kaadisi, hirami;saeno aamami,kakkachuullu ledora kiirami.
Yihudu woxe baxannoho. Yesuusino sayise aannosita balaxe afino. Yesuusa sayise uyino yuhuda qaageemmo woyte mule noohu, giddohu, ledo itanninna aganni noohu woxu baxillira sayise aannota huwateemmo. Xa Itophiyaho giddooyidi baanda yinannirinna macca qantanni allaggaho sayisse aate dodantanni Itophiya fooliishsho hooltannori Yihudu lawishshaati. Kayinnilla Yihudu umosi hunono. Itophiya miiccannorino hattolla ikkitanno.
Tini lamala Yesuusi ninkera yee qarra qaraaro gubbanno lamalaati. Kayinnilla shettote yanna haranchote. Kao hegerete. Itophiyuno konni lawishshaati. Techo giddo heedhe diinaho sayisse aate hecheemmo kaddannori ga’a higguwa hoongeemmo. Techoo qarri ga’a higiwa hoongeemmo. Kayinnilla cinca xa’manno. Cinca calla ikkikkinni loosanna hexxo mura hooga! Yesuusi kao konne lawishshaati.
Yesuusa mittimmatenni ikkite hakka gambonsawa haadhe hadhusi, hune leellino yite philaaxoosi angara sayisse uyitusi, philaaxoosino hakka Heeroddisiwa soyisi; Heeroddiisino olantosi ledo mishisi, qacifatisi, biifado uddano uddisiise Philaaxosiwa qole wirro soyisi, konne hunne sutte sutte yitanni ledde cancitu, cancinsa batinyinni yoo yinisi. Busha assituri ledo suntisi, uddanosino beeqqite hixa tuqqitu,qaraarono hayikkissusi. Konne duucha Yesuusi Manchu beettira baatino kakkalamooshsheeti. Itophiyu daga angansa iimira kayissanno. Roorima daga ammanaanote. Techo Yesuusi sutamanna ka’’o qaagganni Itophiyu baqqeenyiranna jireenyira lawishsha ikkka hasiissanno. Isi ninkera yee mundeesi dunino. Ninke kayinni togoo kakkalama di agartannonke. Isi rosiisinonke shooshanqenna heeshshi yaa calla techo Itophiyanna Itophiyu daga woxxitanno.
Mootichinkenna Xagichinke Yesuusi Kiristoosi ninke cubbiranna hunora qarra adhe, konne wo’manka ikke hee’renni maarosinna gatona yaasi xaano taxi di assinonke. Soodo soodo maarosi haaroteyya! Ninkeno dirrankera maaronna gatona yaa batinse rodiimmatenni ninke ninkewa baxamatenni keerenke agadhatenni barri baali jireenyanke buuxi’rate kaayyo anganke no.
Ayyaana ayirrinseemmo woyte wolqanke uytu bikkinni noonkere wolqa hoogginorira kaa’lo assinammoranna huninonkehu hee’riro huno kiidhinummokkinni gatona yinammoro, maganu elto ninkenni ledo ikkitanno.
Gametenna xissiisi’rate gedensoonni hegere kao no. Itophiyu kao Itophiyu gamera haranchonna kaajjodo woy hekki yitinota ikkiturono; xissote giddonni fushshitannoti wolqa noose. Harancho xisso gedensoonni seeda Itophiyaho kao daggannoha ikkanno.
Yesuusi Kiristoosi qarranna rewo, hunonna gubbo, xi’monna waamma qeele kaino kaote ayyaana diru dirunku ayirrinseemmo.
Lamalate gametenna xissiisi’rate jifo, qarra, moroma, sayise aanna bushuullu gambooshshe kaajjillunni sa’nanni kao la”ate qixxaambo.
Itophiyu gamenna xissiisi’rate shotanna hekkiima ikkiturono qarru giddoonni sa”ate dandiissanno wolqa no. Shota gametenna xissiisi’rate gedensaanni seeda Itophiyu kao daggannoha ikkanno. Quchumu raarenna kaphu duduwinni nafa fafowa noore mule noori qeeltinonsata, Hosa’’aana barra ayirrisse fultinori sasu barri gedensaanni sumuu yaa hoogatenni fultino. Irkonsanna sumuu yaa hoogansa horoteeti ikkinnina somu dinoote.
Tennerano, wole yannara reyoote hasidhanno bissa halaale suttara yite sumuu yite uurritino. Xissotenni sao kao seeddanno. Gamenna xissiisi’ra onte barra ikkituro, kao kayinni tonne ero ikkitanno. Ontu barri jifo ontawu barrira ikkitanno. Gametenna xissiisi’rate fooggalonna raare,qarranna tootayyo lainohura kao nooha nafa dilawawosi. Kao kayinni ammanantinotenna buuxantinote.
Yaareed Geetaachew
Bakkalcho Dotteessa 9, 2017 M.D Hamuse
