Dagitte ayyaanna mittimmanke xawishshubbaati! Dagittenna amma`nonniti xawu budubbanke ayimmanke xawishsha kalqete dagoomi giddono egensiissannonke badooshshuwankeeti. Techo ayirrinseemmohu Masqalu Demeru ayyaaninna barrubbate gedensaanni ayirrinsannihu Irreechu ayyaanino gobbankera iibbino garinni ayirrinsanni amma`notenna budillitte ayyaanna mereerinni qaruuddeho.
Masqalu ayyaani budillichonna ayyaanaame amado noosiho. Masqalu ayyaani mimmito kaa`late, mittimmate, baxillunna keeru xawishsha ikkanna; loosunnino ikko wole hedeweelchonni xeerti`re keeshshinohu baalu xaadanno. Fiixu fiixunniwa xa`mamanno. Kaa`lamanno. Hattono haaro mine sheekki`nanni yanna ikkasi baxxino bayicho aannosi.
Lawino garinni Irreechu ayyaanino mittimmate daafira dudumbanniha, mittimma hasaawunni roore assootunni leellinshanniha, araarunna keeru duduwamanno mittimmanke gurdaasinchooti.
Itophiyu daga hagiirrenna qarrubba mittimmatenni sayinsoommorenna sayinseemmo dagaati. Dhaggetenni xaadatenni gobbaanni gutu balchoomma, budunna heeshshote hayyo noonke daga ikkanke xawinseemmohu tenne ayyaannanniiti.
Tini balchoomma Itophiyu daga balchoommaati. Itophiyu daga xawishsha ikkinoha mittimmate balchooma kaajjishatenni dagate mittimma sufisa dandiitinote. Ninkennino sae kalqete dagara egensiissinote. Lamenti ayyaanna kaajjadu hawadinni fulle haaro hexxora sa`neemmo Wocawaaro aganinni ayirrisamansa aye woyteno baxxitinotanna haaru wodaninni mittimmanke kaajjinshe sufate kaayyo uytannonke.
Lamenti ayyaanna xawu ayyaanna ikkansa aleenni Masqalu ayyaani UNESCOte amammandannikki Donna mereero borreessaminoho. Irreechu ayyaanino aantetenni kalqete Dona ikke borreessamanno gede loonsanni hee’noonni. Ikkinohura, baxxinohunni Itophiyu qara quchuma Addis Ababa kalqete kifillanni dagganno daa“ataanonna qoqqowubbatenni tenne ayyaanna ayirrisate daanno manna baxillunni adhine baxillunni geegiissa agartanno.
Itophiyu haammata budillittenna dhaggete jiro ayidde ikkiturono kuusaminoha dhukase gari doogonni latisanna egensiisa hoogasenni handaarunni afi`neemmoti eo lophitinokkiti anfoonnite. Mittimmanke kaajjinshe tenne jirubbanke latisa, agaranna awuuta noonke. Kuni qole daa’’attote handaari baqqi yaanno gede assanno. Ledoteno haammatu qansootira loosu kaayyo kalaqa dandiinanni.
Tini gurre gundannikkiti ha`nura budubbanke miinju bue assine aantanno ilamara tareessinanni gede budillitte balchoommanke danchu garinni latinse mitto daa’’attote eote bue gede assatenni gobboomu Jireenyinkera safo tungeemmore ikka hasiissannonsa.
Konnirano Masqalu Demeranna Irreecha labbino ha`nura budubbanke ayirrisantanno amanyooti hoshooshamikkinni ilamate sayisate gibbonna obbooshshe hunatenni gobbanke Jireenya buuxisate baalunku qansichi qeechasi fula hasiissanno.
Lamenti ayyaanna xawu ayyaanna ikkansanninna haammata dagoomu kifilla beeqqitannota ikkansa aleenni gobbate su`ma gotti assitannota ikkansanni keerehonna ga`labbote baalunku yawo noosi. Masqalu Demerinna Irreechu ayyaanna amma`notenna budillittete balchoommansa shaangissukkinni ilamatenni ilama tareessitanno gedenna keerunni ayirrisantanno gede baxxinohunnino wedellu jawa yawo agartannonsa.
Ikkinohurano baalanti Itophiyu daga Masqalu Demeranna Irreechu ayyaanna iibbino garinni ayirrisantanno woyte amma`notenna budillitte balchoommansa agarte ilamate tareessitanno gedenna keerunni hanafante jeeffanno gede yawose garunni fula hasiissannose.
Keereho balaxo aatenni ayyaanna iibbadu garinni ayirrisantanno gede wedellu qooxeessinsara keerehonna ga`labbote hasiissanno halamme assa noonsa. Konnirano ga`labbote bissanna hajo la`annonsa bissa ledo qinaawatenni loosa hasiissanno.
Kuri ayyaanna daganke mereero sannate kaajje sufinoha mittimmate balchooma sufisiisatenna ilamate tareessate ragaanni noonsa horo luphi yitinote.
Haaru diri kawa tenne ayyaanna ayirrinseemmo woyte mittimmate illacha aatenni mimmito kaa`latenna mittimma kaajjishate wodaninni ikkara hasiisanno. Kunino keerunninna baxillunni xaadannoha kaajjado dagooma kalaqate widoonni qeechisi luphi yinoha ikkasino mittimma kaajjishanna balchoomano ilamate huwachishatenni hananfoonnita gobboomunna duuchu handaarita Jireenyu harinsho ollaha hasiissanno!
Bakkalcho Wocawaaro 17, 2016 M.D
