Sutammete ayyaana kaaliiqi Maganu mitto beettosi aatenni mannu ooso cubbunni maarote reekkate waaga baatino.
Kaote ayyaani, manchu beetti haaroo’matenn guuta mancho ikkanno maarote doogonni beettisi heeshsho kakkalotenni dukisantino barra hagiirunni ayirrinsanni jawa ayyaanati.
Ayyaanu maganunnita qulaawa maaro dudunbannita,baalunkunni aleenni keerancho manna qullaawa magano ikkinohu beettisi kiristoosi Yesuusi mannu ooso cubbunni maarote widira reekkate kakkalame,umo uyino. Anninketi gatisate hedo leellitinonna halaalancho ikkitino ayyaanamenna dhaggete ikkito gumulantino.
Mootichu baxillunninna baxilleho baantanni waaga shaqqilunninna gato yaa lendanna masqalu aana sutame leellino. Duuchu cubbo mittu magani fajje cubbu waagi reyo ikkitinota adhinnoha ; konninni duuchu cubbu yoo baatooshshinni mulla fullanni mootichinke shaqqilli gumulaminowaati. “Suttusire dagate kulanni loosannore diafinona gato yiiyyensa’’ yaatenni gotti yiino maarote wodaninna ayyaaninni kassasaannonna shitusiri huntino hunora gatona yaatenni ; baxillu cubbonna huno gatona yaannota faajjetenni leellishe masqalu aani reyoosi dukkote giddoonni leellitino. Konninni duchu wodanunninna baxillunni gatona yaa ronsoommo barrati.
Ninke kiristoosi masqalu aana waaga baatinota ammanaano konne barra ayirrinseemmo woyte ; konne wodana ayyaanu beeqqaancho ikkatenni ; mootichinke masqalu aani reeyo qeelinohu haaro mannimma lawisiisatenni, baantooninke waagi bikkinni mama hee’noommoro rodiinkera noonke baxilli mageeshshiha ikkinoro afa hasiisanonke. Ayyaana hatto ayyaanu garinni hurbaatunninna, hagiirrunni godo’letenni sayiisa hasiisanno.
Barru baruunkunni heeshshonke akkala ayimmanni mageeshsha fulle ha’nanni hee’noommoro kiristoosi yesuusinni afi’noommo haaro heeshsho ayimma mageeshshi geeshsha heeshshonke massanganni hee’noommo yitanno xa’mubba xa’minanniha ikkanno. Rodiinkera reyoote geeshsha iillishanno baxilli nafa hee’ra hooginkero; hunitinore gatona yaatenni noonketi wodanu qixxaawo mageeshshaati? Barra baalanka heeshshonke uminkenni sa’ne wolootaho ikkanno baxille,gatona yaanna shaqqillu heeshshonke giddo mageeshshiho yine umonke la’a hasiisanno. Kiristoosi Yesuusi masqalaho baatino waagi ninkenni ikko roduuwinke heeshshonni mageeshshi yawo maccishantannonke.
‘’Rodoosi giwannohu lubbo shiinoho’’ yaanno qullaawu maxaafi rosiishsha yannate kiironni macciishshinanni; xa kayinni giddonke kalaqantino rodoonke giwate geeshsha lubbo shaannohu gedeehu ayeeti?
Qaaqqimmatenni wedellichimmate geeshsha ; wedellichimmatenni geedhimmate diri geeshsha, cubbonke / hajajama hoogate geeshsha kiristoosi baatino waaga kullanni mayra kullooninke bikkinni giddonke soorrama hooggu? soorrantino heeshshonni roddonke baxa, rodiinke heeshsho daafira yawo adha hooganteennanke yitanno xiinxallo hakka halaalancho doogowa higa agaratannonke. Uyinoonninke haaro / soorrantino kalaqo ayimmanni beronni soorrantino gobbanna daga ikkate mayra anjummo? Yitanno xa’mo hedessi yaa di hasiissanno.
Kaote ayyaani Yesuusi biilinke gede wodanunninna baxillunni gatona yaa ronsoommo barra ikka hasiissanno. Ninkera yee baatino waaga techo hee’nenna danchumma loosatenni hegere mooticha hagiirsiinso. Hawalle Yesuusi biilinke kaote ayyaanira keere iillitini; iillishinke!
Bakkalcho Dotteessa 9, 2017 M.D Hamuse
