Addis Ababa:- 1498ki Masaalaanchu Mehammedi ilamishsha (Mewlidi) ayyaani bero barinni babbaxxitino qooxeessubbara amma`note harunsaanonni iibbadu garinni ayirrisamino.
Ayyaanu qarunnino Addis Ababaho bayiriidi Anwaari Masjiidira ayirrisami yannara basete leelle hawalle iillishshi`ne sokka sayisinohu IFDR Budunna Ispoortete ministirchi kalaa Qejela Merdaasihu; ayyaannatenni keerenna baxille duduwa hasiissanno yiino.
Addis Ababu keerunna ga`labbote gashshooti biiro sooreette dukko Liidiya Girma ise widoonni; gatona yaa Masaalaanchu Muhammedi xawishshaati yitinoha ikkanna; baca maaro bacu araari xeerto hodhisannonke yitino.
Itophiyu Isliminnu hajubba xaphoomu amaale mini layinki pirezidaantichi Sheeh Abdulkeriim Sheeh Bedrediin; mimmitoho hedanna kaa`lama rosiissinonkehunnita Masaalaanchu ilamishsha ayirrinseemmo woyte isi haruma harunsine ikka noosi yee; gobbanke mittimma gutunni agara hasiissannotano huwachishino.
Ilamishshu ayyaani Masaalaanchu Mehammedita dancha loossa heeshshote hajajo assate hedatenni ayirrinsanni ayyaana ikkasino xawinsoonni.
Itophiyu amma`note uurrinshuwa gambooshshi qaru borreessaanchi Liqe Tiguhaan Qesiis Taagay Taaddele isi widoonni; Kaa`lama ayirrisamanna baxama Itophiyu loosantino mittimmate balchoommaati yiino.
Qaru borreessaanchi togo yiinohu bero barinni 1498ki Masaalaanchu Mehammedi ilamishshu ayyaani bayriidi Anwaari Masjiidira ayirrisamanna amanyootu aana afameeti.
Masaalaanchu Mehammedi manchi oosora mararannonna baxannoha ikkasi xawisinohu Qesiis Taagay; Itophiyu dagano naaxxineemmoti manna baxatenna ayirrisate balchoomi noonke yiino.
Konne kaajjado balchooma seekkite affino bissa kayinni babbaddankera babbaxxitino wo`naalshubba assitanna wodanchinannitano qaagiissino.
Itophiyu daga Musliimenna Kiristinnu amma`no harunsaano mittimmatenninna baxillunni ikkinnina babbadamatenni diegennammeemmo yiinohu qaru borreessaanchi; Musliimootunnihu Masaalaanchu Mehammedi ilamishshu ayyaaninna Ortodokisete amma`no harunsaano Demeru ayyaani mittu barrinni hosasi lowo geeshsha baxille leellishanno barraati yiino.
Abbebech Maatewoos
Bakkalcho Wocawaaro 17, 2016 M.D
