Addis Ababa፡- Masqalu ayyaani Kiristinnu amma`no harunsaanonni gobba baalate babbaxxino amma`note amuraatinni ayirrinsoonni.
Ayyaanu Addis Ababaho Masaqal Addewaawayete amma`note annuwi, ammanaanonna woshshatto assinoonni wosini noowa babbaxxino amma`note amuraatinni ayirrinsoonni.
Mittimmatenna hexxote lawishsha ikkinohu ayyaanu, hawadi gomichinni guggushante keeshshitinoti Arrishsho, baattote shaqqillinni ledo karsante biifino caabbicho uytanno; uulla winxoonni wixa mursiisse shoyee iillishshanno; daga tunsichunni fultanno; haammata hexxo assidhanno yanna ikkasenni baxxino tironna biinfillu no.
Itophiyu Ortodoksete amma’no massagaanchi Bitsui Abune Maatiyaasi tenne yannara riqiwamaanchisi widoonni saysino sokkanni; Masqalunnire lallambeemmohu keereho, baxilleho, mittimmatenna umonke sayinse aate ikkinnina wolootta xiiwatenna giwate ikka dinosi yiino.
‘’Masqalu ayyaana ayirrinseemmo woyte meessaneete heeshshi assine woloottaho luphi yiino ayirrinye aatenni baxille leellishate amanyoote woxenke assi’no’’ yaanniiti lede huiwachishinohu
‘’Araaramme yinanninke woyte giwa, Maganu widira shiqqe yinanninke woyte hirrenkenni addaxxineemmore ikka dinonke’’ yiinohu Bitsui Abune Maatiyaasi; konne adhineemmokkiri Masqala ayirrisa waagu nookki daafurooti yiino.
Ayyaan amuraati aana leellinohu Budunna Ispoortete ministirchi Qejela Merdaasa saysino sokkanni; Kiristinnu amma’nonni jawa ayirrinye uynannihu Masqalu ayyaani baca ikkitino ayyaanaamenna budu hornyubba giddosiinni amadinoho yiino.
Konni kaiminni, tayxe tonnu diri albaanni gobbanke Dona calla ikkikkinni Halantino Mootimmuwa Rosu, Sayinsetenna Budu Uurrinsha (UNESCO) kalqete Dona ikke maareekkamasi qaagiisse; ayyaanu roorenkanni bowirannonna daa’’ataanote timo ikkanno gede Ministere illacha tugge loossannota xawisino.
Ministirchu amadisiiseno, Masqalu Damari ayyaani Kiristoosi umosi sayse ee manchi oosora leellishino baxillinna ayirrinyi kaiminni ninkeno mimmitu ledo baxama, ayirrisamanna hattono mimmitu ledo huluullammanni gede assitanno hunote assootubbanni fulle baxillenna mittimmanke kaajjishi’ra noonke yiino.
2016 Masqalu Damari ayyaana ayirrisate amuraati aana amma`note annuwi, aliidiri mootimmate sooreeyyenna woshshatto assinoonniri, dipiloomaate, hattono babbaxxitino kalqete gobbuwanni ayyaana ayirrisate daggino turistooti afantino.
Abrahaam Saamuel
Bakkalcho Wocawaaro 17, 2016 M.D
