10 kumi meetirenni kalqete shaampiyoona ikkitinoti Atileeticho Gudaafi Tseggay; agannate Itophiyu anganni fulte keeshshitino 5 kumi kalqete rikoorde Itophiyaho wirro qoltino. Saiha Ellu aganira Keeniyu Atileeticho Feyize Kiipygooni anga ei`inota xeertinyu wiinamu saate 5 lipheessinni woyyeessa dandiitino. Bareeda atileeticho Gudaafi. Konne diro jawaata ikkkite dancha yanna saayissanni afantannoha ikkanna; lamalate albaanni iillitonose gawajjonni woyyaabbe haaru dirinni haaro riikoorde hiiqqatenni gobbasera baraassino.
5 kumi meetire xeertinyi seennu dodanshonni 17 diro Itophiyu atileetooti mittu yekkeeraminsakkinni mimmitu ledo ku`u ko`onni ledo woyyeessitanni keeshshitino. Konne diro 5 kumi meetire wiinamu xeertinye rahe gudatenni wole gobba atileetichonni hiiqqante adhante keeshshitinohu sase agana callaati. Awuropu kiironni 2006 Atileeticho Mesret Deffaariti Turkaawitte Atileeticho Elvan Abiy Leggesetenni lame diro adhineennase keeshshitinota maakirote lipheessinni woyyeessite xeertinyu ranke hiiqqite umi yannara Itophiya qoltino. Bareeda Atileeticho qolte hakkonne diro Osilo 08 maakiro lipheessinni woyyeessite umise saate assidhino. Meseretino, dhggetenni hoodisse kibirewosene hiiqqitino atileeticho ikkitino.
Sufino diro xaano hakko Osilote wole bareeda Atileeticho Xiruneshi Dibaabiti, Meseretinni amadantino wiinamu saate woyyeessite xeertinyu ranke wirro hiiqqatenni qeeltino. 14 xiqqeessinni, 11 lipheessinni, 15 maakiro lipheessinni hiiqqinoonni ranke, 12 diri geeshsha ayinnino diwoyyeessinoonni. Dirrate gedensaanni xeertinyu aana saate woyyeessa dandiitinoti bareeda atileeticho Letesenbeti Gidayita ikkitanna; kibire wosene hiiqqa dandiitinohu Awuropu kiironni 2020 M.D Vaalenshiyaho harinsoonni heewora 14 xiqqeessa, 06 lipheessinni, 62 maakiro lipheessa ikkitino saate dodde saayikkita ikkite woyyeessa dandiitino.
Tini saate aggannate albaanni Keeniyu Atileeeticho Feeyize Kiipyeegoninni mittu lipheessinni woyyeessite Itophiyu atileetooti anga keeshshitino kibirewosene hiiqqa danditino. Ikkollana, xeertinyu aana mootoo’mite keeshshitinohu shoole agana callaho. Kuni ayirrinyi hasiisannohu Itophiyu bareeddara ikkinota kalqe seekkite buuxxino. Konnira, albano tenne xeertinyu ranke gobbasera qolate wo`naaltanni nooti Gudaafi, hakkawoyte nafa dandaa hooggurono laayinkita ikkite riikoorde hiiqqa dandiitino. Umita ikkite hiiqqate noose hixamanyonni bareeda Atileeticho Gudaafi, wirro 5 kumi xeertinyi wiinamu saate xeertinyu ranke hiiqqa dandiitino. Hasiissanno ayirrinye Itophiyaho wirro qoltino. Alba Budapestete noo 5 kumi heewonnino kibirewosene hiiqqate wo`naalte lekkase aana iilliti gawajjonni qeeltukki sa`ino. Keenkiyaawittete ledo jawaata heewo agartanno yine agarrirono, hakkawoyte Kiipyegon adhitno.
Lamalate gedenoonni Diyaamendete liige jeefora Origenete Ameerikaho ikkadimmase leellisha dandiitino. Gobbase beetto Birqe Hayyeloomi ledo ikkatenni doddinoti Gudaafi, jeefote dooycho doddu yannara dhaggetenni daa’’ataano dhaggeeffatanna qeela dandiitino. Jeefote xuruura taayisse sa`u yannara 14:00:21 ikkitino kalqete winamu saatenni umita fultino. Gudaafira guficho ikkitanno yine agarroonniti Batriise Chibeeti 5 lipheessa gede`nite heewo layinkita ikkite qeela dandiitino. Heewote gedensaanni Gudaafi uytino hedonni, “Kalqete Shaampiyoonira lame medaaliya qeela hooga`ya gaabbissinoe; qixxaawomma garinni haaro ikkinoricho borreesiiseemma yee agaroomma” yitinota Kalqete Atileetikse odeessitino.
Wole widoonni, Origenira jeefote heewo aana beeqqaano ikkitinori haammata Itophiyu atileetooti giddo Atileeti Yoomifi Qajeelchihu, Itophiyu saate woyyeessa dandiino. Woluno, addintanni dhaggete heewo noowa tenne sa`u Budapestete 5 kumi meetirera Culqanna 1500 meetirera Birrete meedaaliya goowaho wodha dandiinohu wolu Nooriwete Atileetichi Jaakoobi Inbirigisenihu, Origooni Diyaamendete heewora qeele wole dhagge borreessiissara wo`naalino. Ikkollana, fototenni bada dandiinoonnite gede, Itophiyu atileetichi mitte maakiro lipheessinni 7:23:63 ikkitanno saatenni balaxe qeelinota buuxa dandiinoonni. Konnirano, xeertinyunni Itophiyu kibirewosene umisita assi`re adhasi buuxino.
Abrahaam Saamueel
Bakkalcho Wocawaaro 10, 2016 M.D
