Addis Ababa:- Shekkeerete biinne abbitanno haaruuddu dhibbi Afirikahonna Itophiyaho bidhatto ikkinohura gargarate loonsanni hee`noonnita Paan Afiriku Shekkeerete Biinne Gargarooshshi Maamari Itophiyu Murrichi Pirofeseeri Dilinessaw Yehualawu egensiisino.
Shekkeerenna wolootta Biinnetenni daanno dhibba hiitto assine gargara hasiisanno yitanno hajonni harinsoonni songo aana Pirofeseerichu Dilinessaw xawisanni; Afirikaho Shekkeerete taraawo sa`u dirrara noo gargarooshshinni woyyaawinoho. Muli yanna kawa kayinni Itophiya lendeenna haammata Afiriku gobbuwara taraawo lexxitanni daggino.
Itophiyu giddo nookkihu Biinnetenni taraawannohu mitu mitu dhibbi muli yanna kawa Itophiyaho kalaqamanni dayno yiinohu Sooreessu, Denge yinanni Eezhiyaho calla noo dhibbi Awuropu kiironni 2013 kawa Soojjaati Itophiyira kalaqame Itophiyu baalaho taraawanni afamanno yiino. Poirofeserichu xawishshi garinni, haaruuddu Shekkeerete Biinne wolootta gobbuwanni taraabbanni Afirikahonna Itophiyaho hala`litanni no.
Shekkeerenna Biinne qaltanno dhibba gargarate dhuka ijaarsatenna gutunni loosate Afirikahonna Itophiyaho danqara ikkitino dano gargarate amaalammanni hee`noonni.
Hattono, jawa bidhatto ikkinohura Afirikunna Itophiyu gedee gobbuwara jawa looso loosa agartannota huwachishino.
Haaruuddu Shekkeerete Biinne taraabbannonna qalantanno baatto woy qarqari maa lawanno yaannoha xiinxallotenni bande gargarate akatasi anfoonnkki daafo, hiitto ikke sa’’annoro akatisi maa ikkinoro afa hooga jawa bidhatto ikkitino; konne qarra anfe gargarate jawa wo`naalsha assa hasiissanno yaanni huwachshino.
Sooreessu xawishshi garinni, bisu kifilenna mogolete giddo e’e bodidhannori baqqala Shekkeere Biinnicho dhibbi dirrate gama Itophiyu kifilera callaho afamannoha ikkanna; dhibbunni daafamino manni kiirono boodeholla.
Kayinnilla, muli yanna kawa rahotenni hala`lanni noo daafira, dhibbunni amadantanno manni kiiro lexxitanni no. Eezhiyahonna Gelfete qarqarira afamannohu “Anafileesi Istefensii” yinanni Shekkeere tareessitanno Biinnicho Awuropu kiironni 2012 hanaffe Jibuutira kalaqantino. Suffe, 2016M.D Itophiyaho 51 qarqarira taraabbino. Hattono, Soojjaati Afirikinni sa`e Galchimi Afirikirano taraabbino.
Alba Shekkeere sayissanno Biinnewiinni kuni baxxannohu, haammate quchumu giddo qalamannoha ikkanna; qalamate horoonsi`rannohu mini giddonna mini gobbaanni noo uduunni aana ikkinohura jawa bidhatto ikkinota xawisino.
Konne qarra tirate xiinxallo harinsanni hee`noonni yiinohu Pirofeserichu; babbaxxitino Afiriku gobbuwanna Itophiyaho xiinxallonna buuxo assatenni xiinxallotenna buuxote poolisera ikkitanno amaalete hedo shiqishate loonsanni hee`noonni. Paan Afiriku Shekkeerete Dhibbi Gargarooshshi Maamari, Itophiyaho ontu diri istiraatejikete mixo mixi`re loosanni no. Fayyimmate Ministeere ledo halamatenni loosanni Shekkeerenna Biinnicho qaltanno dhibba gargaratenna hunate gutunni loosatenna mixo faajje assate harinsho aana noota hasaawino.
Abrahaam Saamueel
Bakkalcho Wocawaaro 10, 2016 M.D
