Addis ababa:- Haanju haruminni kaansoonni chigginyubba duucha horo afidhinore ikkasenni miinju handaarinni noonsa horono luphiima ikkitinota Sidaamu qoqqowi pirezidaantichi kalaa Desta Ledamo coyi’ri.
Oromiyu qoqqowi Soojjaati Shewa zoone Lume woradi Joogo laayyora harinsoonni layinki gafi umikki diri haanju harumi xaphishshu qixxaawo aana Xaphoomu ministircha Abiy Ahimed (Dr.) lede baalante qoqqowubba pirezidaantootinna Gibrinnu Biiro sooreeyye leeltino.
Xaphi assate amuraati aana leellinohu Sidaamu qoqqowi pirezidaantichi kalaa Desta Ledamo; xaa geeshsha loonsoonni loossanni illete leellanno guma maareekkisiisa dandiinoonni yiinohu pirezidaantichu; haanju harumi loossa afidhino horo huwantoommo daafira kaansoonni chigginyubba garunni awuuta, agarooshshe assanna latisa hasiissanno yaannino qummeessino.
Pirezidaantichu kalaa Desta lede coyi’ranni; gobbanke hala’lado ikkasenni albillichono baca qooxeessubbara chigginyubba kaasa agarranninke yee; babbaxxitino basera kaansanni chigginye xaanni hananfe qixxeessate looso loonsannita egensiisino.
Hattonni addi addi qoqqowubba sokkansa sayissinoha ikkanna; haanju harumi qooxeessu agarooshshinni sae sagalete wowe buuxisiisatenna loosu kaayyo kalaqate ragaanni noosi qeechi luphiima ikkasi qoqqowubbate pirezidaantooti xawissino.
Qixxaawote aana leellinohu Somaalete qoqqowi pirezidaantichi Musxefe Mehaammed; Xaphoomu ministirchi Abiy Ahimed kakkayishshinni hanafamino haanju harumi loosinni Somaalete qoqqowino horaameessa ikkinota buunxoommo yiino.
Qoqqowoho miliyoonetenni kiirranni chigginyubba kaansoonnita qaagiissinohu pirezidaantichu; garunni awuuta dandiinoonnihura agarroonni garinni lattanni noota coyi’rino.
Wodiidi Itophiyu qoqqowi pirezidaantichi kalaa Xilahun Kebbede isi widoonni; layinki gafi haanju harumi loosi hanafonni ha’nura ikkitino haqqete sirchonna gummate ikkitanno chigginyubba halashshate illachinshe kaansoonni yiino.
Haanju harumi loosi qooxeessu agarooshshinni sae kiironsa haammata qansootira loosu kaayyo kalaqatenna sagalete wowe buuxisiisateno kaayyo haare daynoha ikkasi kulino.
Affaarete qoqqowi pirezidaantichi Awwol Arba coyi’ranni; qoqqowoho tayxe haanju harumi loosinni 1.4 miliyoone ale chigginye kaansoonni yiino.
Kaansoonni chigginyuwa qooxeessu agarooshshinni sa’e Industirete hasiisannorira hossannotano xawisino.
Layinki gafi haanju harumi loosi; ‘’Ga’ara techo kaanso’’ yitanno massagote hedonni Ella 1/2015M.D Xaphoomu ministirchi Abiy Ahimed (Dr.) Affaarete qoqqowira leelle hanafisiisinoti qaangannite.
Layinki gafi haanju harumi loossanni tayxe lede shoole dirrara 25 biliyoone chigginubba kaasate mixo amandoonni.
Mixote garinni kaansanni chigginyubba xibbuunni 60% waaxamino dubbi Irshira, 35% dubboho hattono 5%quchumu biinfillira ikkitanno chigginyuwaati yinoonni.
Gaazeexu Odeessaanchinni
Bakkalcho Wocawaaro 10, 2016 M.D
