Addis Ababa:- Konni albaanni loosu giddora e`ino lame Terbayinubba ledotenni 2016M.D Abbay kofattonni onte Terbayinubba elekitiriikete wolqa burqissanno gede loonsanni hee`noonnita Injiiner Habtaamu Ittefa (D/r) xawisi.
Wayinna Wolqate ministirchi Injiiner Habtaamu Ittefa (D/r) Itophiyu pireesete uurrinshara coyi`rino garinni; xaa yanna Abbay kofatto lame Terbayinubba elekitiriikete wolqa burqissanni no.
2016M.D ledote onte Terbayinubba elekitiriikete wolqa burqissanno gede assinanni; Terbayinubbate loosi goofanno woyte mitteenni lamala Terbayinubba elekitiriikete wolqa burqissanno.
Abbay kofatto ijaarshi goofikkinni lamala Terbayinybba wolqa burqissanno gede loonsanni hee`noonnita kulinohu Injiiner Habtaamu (D/r); kuni adda ikkanno woyte kofatto lamala Terbayinubbanni buriqissanno wolqa Gilgel Gibe-3 burqissannohunni aleenni ikkanno. Kunino kofatto gooffukkinni Itophiyaho jawa elekitiriikete wolqa burqisannoha ikkanno gede assannosi yiino.
2014M.D loosu giddora e`ino lame Terbayinubba kaiminni tayxe loosu giddora e`annori onte Terbayinubba wolqate bikka Belesihu, Gilgel Gibe-1na 2 hattono Tekeze wolqate burqisaano mereershuwa uyitanno kiirotenni 1 kume 180 Meegga Waattenni taalo woy roortanno wolqa burqissanno yiino Ministirchu.
Ikkollana, ofollosinna way du`namme kaiminni ontunkunniti wolqate burqisaano Terbayinubba wolqa burqisate dhuki xaa yanna kageeshshaati yine coyi`ra dandiinannikkita xawisinohu Ministirchu; kofattote ijaarshi goofanno woyte 13 Terbayinubbanni 150 Meegga Waatte elekitiriikete wolqa Beeraawe wolqate mereersha karsantannota xawisino.
Ministirchu xawishshi garinni; kofattote qansanni Terbayinubba kiirotenni 375 ale Meegga Waatte wolqa burqissanno yine agarranni. Aantanno lee dirrara miinju hasatto wonsha dandiitanno wolqa wayinni, diilallotenni, Arrishshotenninna baattote giddonni fulanno fooraro burqisate mixi`noonni. Xaa yanna gobboomu deerrinni elekitiriike burqisate dhuki 5 kume 420 Meegga Waatte iillino.
Abbay kofatto kayinni tenne kiiro ero assitanno. Konni aana Koyishunna woloota wolqate buichubba ledantannosi woyte aantanno lee dirrara Itophiyunniti wolqa burqisate dhuki 17 Giiga Waatte iillanno yiino.
Abbebech Maatewoos
Bakkalcho Wocawaaro 10, 2016 M.D
