Qajeelshaanchu Siyyumi Kebbedehunni massagantanni nooti Sidaamu Buni Lekkate Kowaase Kilawe 2016M.D jawaata heewisamaancho ikkite shiqate dandisiissannose qixxaawo assitanni no.
Kilawe sai lamu dirira albaanni jawaata heewisamaancho ikkite boowe adhate deerrira shiqqinota ikkiturono; 2014M.Dna 15M.D jawaantese garunni leellishshukkinni sa`inoti qaangannite.
Kilawe jawaata ikkasenni haammata irkisaano nooseha ikkanna; boowe kayisse dagate wodana kassi assitanno gede baalunkura hexxo no.
Ikkinohura, tini jawaata kilawe niri yannara leellishshinoha laafa heewote diro woyyeessate 2016M.D may garinni jawaata heewisamaancho ikkite shiqate qixxaawo assitanni noo yaannoha Kilawete Loosu Harisaancho ikkinohu Abbushi Aseffihu ledo keeshsho assinoommo.
Kilawete Qaru Loosu Harisaanchi Kalaa Abbushi Aseffihu xawisino garinni; Sidaamu Buni Lekkate Kowaase kilawe 2016 heewote dirira jawata heewisamaancho ikkite shiqqanno gede haammata looso loonsanni hee`noonni. Konni garinni ikkadda godo`laano wole kilawenni abbatenna giddo noo godo`laano wirro haaroonsine malaatisiisate looso loonsanni hee`noonnita coyi’rino.
Kilawe niri godo`lete yannara assinoonni heewonni haammata foonqe noota keeno assine bandoonnita qummeessinohu Qaru Loosu Harisaanchi Kalaa Abbushi; tenne foonqe wonshate babbaxxitino kilabbanni ikkadda godo`laano soorrotenni kilawete giddora abbinoonnita buuxisino.
Tayxe 2016M.D kilawete giddora soorrotenni abbinoonni godo`laano onte ikkitinota kulinohu Kalaa Abbushi; mereereho, eo eessinanniwanna gargarooshshu baycho noo foonqe beeshshate looso loonsoonni yiino.
Sidaamu Buni Lekkate Kowaase Kilawe godo`laanote soorrishsha keeshshite hanaffurono, tenne yannara ikkadda heewisamaano soorrate dandiitinota xawisinohu Qaru Loosu Harisaanchi; albaanni Kilawete godo`litanni no onte godo`laano sheemaatano haaroonsa dandiinoonnita egensiisino.
Konne diro tini kilawe kaajjado ikkite suffanno gede assitanno godo`laano kilawete giddora soorrishshunni abbinoonnite. Desta Yohaannisi, Adaamunni; Birhaanu Baqqalihunna Fiqireyesuus Teweldebirhaaniha Hadiyyu Hosaanunni; Abdurahmaani Mubaarekiha Elektiriketenninna Yooseef Yohaannisiha Dirre Daawunni soorrine abba dandiinoonni.
Kilawe lende kaajjishate Baara widinnino eote agaraanchonna eo ugaaxannoha Gaanu kilawenni soorrine kilawete giddora abbate harinshote aana hee`noonnita Kalaa Abbushi xawisino. Wolu kayinni, Kilawete hundaanni 20 diri woriri lophitanni noo godo`laano kaajjadda noota xawisinohu Qaru Loosu Harisaanchi; Kilawete giddo haammata yannara owaante uytanno yine hendannire jawaata godo`laano fille qara kilawe widria lossate hende loonsanni hee`noonni yiino.
Qajeelshaano 20 diri wori godo`laano filte abbituro dhukansa keenate looso loonsi gedensaanni kilawete giddora e’e owaante uytanno gede assinannita coyi’rino.
Sidaamu Buni Lekkate Kowaase Kilawe dagate kilaweeti; Sidaamu ayimma xawissannotenna dagate jirooti yiinohu kalaa Abbushi; mootimma tenne kilawera baajeette gaante umiseha qeechase fultanni nooha ikkirono; lende womaashshunni kaajjishate dureeyye hasaawisatenni ikko addi addi eote bue kalaqate looso loonsanni hee`noonita kulino.
2016 Heewote dirono hitti kilaweno boowe kayinseemmo yite mixo amaddannota xawisinohu Loosu Harisaanchi; boowe hoogguro layinki deerra amadde fulate mixidhe loosu giddora e’anno. Tini kilaweno wolootu gede boowe kayisse Ispoortete maate hagiirsiisate mixidhinoha ikkanna; boowe kayisa hoogguro jawaata heewisamaancho ikkite deerru giddora e’e heewo jeefisate qixxaabbanni noota qummeessino.
Hawaasi quchuminna Sidaamu Buni Lekkate Kowaase kilawe roduuwu darbe ikkitinota egensiissinohu kalaa Abbushi; sae sae irkisaanote akati ledo amadisiisame gaancete widira massaganno laooshshe badatenni mitiimma kalaqantannokki gede assate looso loonsoonni yiino.
Kalqete deerrinni la`niro hiitti dagano hasidhanno kilawe irkisa umise kowaasete biinfille ikkinohura lamente kilawe irkisaano mereero qarru dikalaqamanno yaanni lede coyi’rino.
Wole widoonni, Itophiyu Lekkate Kowaase Federeeshiine dagate su`minni woshshantanno kilawete su`ma soorra noonsa yite biddissa sayissinoti qangannita ikkitanna; dagate ledo amadisiisamino su`ma dagatenna hajo la`annonsa bissa ledo sumimme kalanqikkinni soorra dandiinannikkitanna albillicho hasaambe Federeeshiinete ledo sumuu yaate faasho worroonnita qummeessino.
Abrahaam Saamueel
Bakkalcho Fooqa 2, 2015 M.D
