Bi’re waro mittu 17 Gaalanna sase ooso afi’rinohu dureesu manchi no yinanni. Kuni manchi xissame mannu aalo ikkanno. Mannu aalo ikki woyteno noosi Gaala sasente oososira beehe “Gaalla’yata boco anga bayiru beetti’yara, sayikki anga layinki beetti’yara, hattono mitte honsikki anga sayikki beetti’yara oommo” yee fooliishshi’ranno.
Oosote coyi gurcho ikkinsa. Maa assa hasiissannonsa? 17ti boco Gaalla bayiru beettira uyinona yinoonni. Mitto Gaala lamewa murte beqqitannonso?!! Gurcho ikkino coyeeti.
Togo assa didandiinanni. Korkaatuno, Gaallanniha mitto sayikki anga layinki beettira uyinona yee reyino anninsa. Togo assano qarra ditirtanno. Gaalla’yanni mitto honsikki anga sayikki beetti’yara uyinona yiino. Konni garinni Gaalla murmurante gooffaraati yaate.
Konninni, mitii’mitino ooso hajonsara tiro afi’rate qooxeessinsara no yinoonni egennaamiwa martanno. Egennaamuno hajote aana yanna adhe hedirono malu furcho afi’rara didandiino.
“Ani heeshsho’ya dirinni kiiro ikkinnina Gaala beehe diegennoommo; kuni mulla balalsinara kalanqoonni coye lawannoe”, anni’ne qaale garunni gumula hasiissuro kayinni Gaalla murre beehalla hasiissanno” yaanno.
Oosono hakko egennaami amaalenni sumuu diyitino. Gaalla murmurtine beeqqe yitannota egennaamu amaale diadhitino; mayi woyyiyya…?
Tenne yannara mittu manchi kae daye; “Kiirontenni roore Gaalu daafira afino manchira amaa’litiniro woyyanno’ne” yaannonsa. Oosono maahoyye yite manna xa’misiisse mitto geedhimma amaddinosiha, rosinokkiha kayinnilla heeshsho rosiissinosi hayyichu geerchiwa hadhe qarransa ku’litanno. Hakko geerchino macciishshe oso’le; “Yaaddinoonte, coyi shotahona” yaannonsa.
Hakkiinnino, geerchu umisiha mitto Gaala liqiissannonsa; Gaallate kiirono 18 ikkitanno; wodhote garinni umi beettira Gaallatenni boco anga uyinisi; lowo geeshsha hagiidhi. 18 Gaallanni sayikki anga yaa Lee ikkitanno; layinki beettira lee Gaalla iillitusi. Isino hattonni hagiidhi. 18 Gaallanni mitto honsikki anga lame ikkinohura sayikki beettira lame Gaalla uyinisi; isino hagiidhi.
Mittu gaali gatanno; geerchu umo mitto Gaala liqiissinonsaha qole adhe “Xa ha’ra dandiitinanni” yiinsa. Oosono hagiidhitanni, geerchu hayyonni xaggeeffattanni Gaallansa adhite qaensa higgino.
Egennote shota dino. Rosichunni afi’noonni egenno kayinni loosunnite, illete leeltinote. Busulle woy hayyo uullara dirrite illete leeltanno; egenno qaalu godo’leeti. Busullenna hayyo kayinni heeshshote rosichinni afi’nannireeti.
Qiddist Gezaheny
Bakkalcho Woxawaajje 25, 2015 M.D
