19ki Kalqete Atileetiksete Shaampiyoonira beeqqaano ikkitino gobbuwa giddo medaaliyu shae giddora ea dandiitino gobbuwa 46 callate. Heewote biinfillenna ikkatinni medaaliya adhate sharro assitinoti Itophiyu gobba borreessiissino 9 medaaliyinni albisaano gobbuwa ledo dirama dandiitino. 5-ale ikkanno medaaliya borreesiisa dandiitino 6 gobbuwa mereero mitto ikkinohu Itophiyu, culqu medaaliyinni balaxame kalqetenni 6kiha afirikunni 2kiha ikke jeefisa dandiino.
Honsu barrira harinsoonnihu Kalqete Atileetiksete Shaampiyooni aganu callu gatinohura Paarsi Olompikera mini looso uynohonna gaamote noose qarra reqecci asse caakkeessinoha ikke goofino. Diilallote gadi soorramanna qarru giddo sa`e konni gumira iillitinori Itophiyu gaamo, Sa`u Maakisanyote soodo guurate Itophiya e`ino. Gobbbansara daggu woyte iibbino garinni haa`rate amuraate assinoonninsa. Mereerimunninna seedu xeertinyinni 34 atileetooti beeqqaano ikkitino liuuke, Boole Horophilu hoowera jajjabba mootimmate biiltonni daraaro uynoonninsa.
Iibbado haa`rate pirogiraamera, gaamote keeshshonna dayno gumi aana hasaawa assinoonni. Gaamo massaganni Budapeste eessinohu Atileetiksete Federeshiine Laayinki Pirezidaantichi Gezahanyi Aberrihu, gobboomu gaamora assinoonni haa`rate amuraate lainohunni galata shiqishino. Mitto agana wo`ma qixxaawo assite heewote e`inoti gaamo; borreessiissino gumi daga hexxo assitinowiinni ajino. Niri gumi ledo la`nummorono hakkira dimarinoho yiinohu Atileetichu Gezahanyi, wole gobbuwa ledo keenniro kayinni dancha guma ikkinota buuxisino.
34-35 digire seentigreede ikkanno iibbilli giddo jawa sharro assine guma abba dandiinirono; daga agadhitino 5 kumi meetire xeertinyinni guma abba hooga koffi assitannota kule, atileetootu jawa sharro assitinota qaagiissino. Konninnino, daga kassi yaa hoogguroo; dagganno olompikenni daga kassi assate qaale e`inota buuxisino.
Federeshiinete Pirezidaantitte Kaa`laancho Komishiinercho Deraartu Tullu, gaamo heewo danchu garinni jeefissinota qummeessitino. Daraartu xawishshi garinni, balanxe mixo amandoonnihu niri guminni xeinokkiha abbateeti. Atileetootu sharronni medaaliyu dayno. Anfinte gede, Itophiyu, Gobboomu Gaamo atiletooti dinose. Ikkollana, atileetootu uminsanni assitanno sharronni, heewote yanna dagganno woyte gobboomu gaamo deerrinni gamba assineenna assitanno millimmonniti gobbansa riqibbannohu. Kuni umisi xiiwo kalaqirono, danchu akatinninna ispoorte xa`mitanno wodhonni assitino sharrora atiletootu galatama hasiissannonsa. Paarisete Olompikera konni roorino gumi daanno gede baalunku halamme loosa hasiissanno yite sokkase saayissino.
Baalunku qeelleemmo yite heewisantanno battalara, Itophiyu atileetooti gummaamma ikkitinohura hawalle tashshi yiino`ne yiinohu Itophiyu Olompikete Komite Pirezidaantichi Dr Ashshebbiri Woldegiyorgisiho. Atileetootu Budapestete nooha jawa iibbille dandiite konni gumira iillansanni ayirrinyu hasiisannonsa yiino. Dagganno Olompikeno heewo ikkitino daafira, Itophiyu su`ma kalqete leellishshanno atileetiksete heewora beeqqaano ikkate jawaante loosa xa`mannota buuxisino. Komite assitanno qixxaawonni sae, mootimmano atileetoota irkissanno doogonna qalaqa hattono ispoortete baychi qarra tirate loosa hasiissannota qummeessino. Ledoteno, Olompikete aana Aropu gobbara noo kumunni kiirranni qansoota gaamo irkissanno gede assate paarise dagganno doogo loonsanni hee`noonnihura mootimmano irkisa noo yiino.
IFDR Budunna Ispoortete Ministeere Ministerchi Qajeeli Merdaasihuno hawalle tashshi yiino`ne yitanno sokka saaysino. “Atileetootu assitino sharro dhaggennite; konninni, gobbansa su`ma gotti assitinohura galata shiqisha hasiisanno. Dayno gumi ajinoha dikkino. Baxxinohunni, seennu atileetooti assitino sharro jawate” yee seennu jawa qeecha fula dandaannota leellishinota xawisino. Gaamote muli yanna kawa afamishshu pirogiraame qixxeessinannita Ministerchu qaale eino.
Abrahaam Saamueel
Bakkalcho Woxawaajje 25, 2015 M.D
