Itophiyu 2029 Afriku boowe qixxeessate dhuki nooseta IFDR xaphoomu ministirchi Abiy Ahimed (D/r) coyi’rino. Xaphoomu ministirchi sanyote hashsha “(CAF)” na “FIFA” pirezidantootiranna (CAF) loosu guuulsiisaano komite luphiima massagaanora bayiriidi mootimate mine hurbaatu koyishsha assi yannara Itophiyu 2029 Afriku boowe qixxeessitanno gede faajjetenni xa’mino.
Konnirano Itophiyu jawiidita ahigurete lekkate kuwaase bare qixxeessate dhuki noose yiino.
Xaphoomu ministirchi Itophiyu qixxeessitanni afantanno 46ki Afriku lekkate kuwaase konfedereeshiine ((CAF)) uurrinshu songora albaanni (CAF) pirezidaanticha Patriis Motisepeninna ((CAF)) loosu guutisaano komite luphiima massagaano borrote mine haa’re hasaawisinoha ikkanna; jeefamate aana afamannoha biheerawe xawu ijaarshano gutunni towaatansa xawisino. Itophiyu tini horo noose songo seekkanno gede kaa’late garunni qixxaabbinotano coyi’rino.
((CAF)) pirezidaantichi Paatriis Mutiseepe (D/r) isi widoonni; Itophiyaho assinoonnisi koyishshira galata shiqishe; Itophiyu bude, balchoomanna wosinna adhate amanyooti “Itophiyu minenke ikkino gede macciishshamannonke gede assinonke” yaatenni coyi’rino. Pirezidaantichu ledeno Itophiyu 2029 Afriku boowe qixxeesate shiqishshino xa’mo aana (CAF) komitete ledo malannota xawisino.
((CAF)) pirezidaantichi Jiyaani Infantinoom “Manchi beetti afamiinoti Itophiyu ninkerano gobbankeeti” yee coyi’rino. Amuraatu aana xaphoomu ministirchi Abiy Ahimed (D/r) lamunku pirezidaantootira Itophiyu lekkate kuwaase biheeraawete gaamo uddano baraarsino. Lawino garinni FIFA pirezidaantichi Jiyaani Infaantino 2029 yaanno malaatesi malaatisino kuwaase xaphoomu ministirchi Abiyira (D/r) baraarssino.
Barraho Addis Ababu xawira harinsoonni baxillaanchimmate godo’le amuraatinni xaphoomu ministirchi Abiy Ahimedi lede Saalaadiin Seiid, Adaane Girmanna woloottano albi waaliyu beeddahe gaamo albi babbaxxitino gobbuwa beeddahe ledo baxillaanchimmate godo’le assitino. Kaameeroonennihu beeddakku godo’laanchi Saamueel Itto, (CAF) pirezidaantichi Paatri Motiseepe, albihu Kaameeroonete beeddakkinna xaa yannara gobbasi lekkate kuwaase federeeshiine pirezidaantichi Saamueel Itto, Nayijeeriyunnihu albi beeddakki Jeyjey Okkachanna woloottano baxillaanchimmate godo’le beeqqaano ikkitino.
Konne lainohunni budunna ispoortete ministircho Shewwiit Shanka 46ki (CAF) xaphooma songo hattono songo lainohunni lainohunni harinsoonniti baxillaanchimmate godo’le lekkate kuwaase maate baqqi assitinotanna Itophiyu ayimma kaajjishshanni noota coyidhino.
Ministircho amadisiisseno; 46ki (CAF)iha xaphooma songote qixxaawo hattono Itophiyu 2029 Afriku boowe qixxeessate hasatto nooseta xawisse; mootimmano gobbate afantannore ijaarshinsa hanafamino xawubba jeefisate looso loonsannita coyidhino.
“Hafantino pirojekitubba harancho yanna giddo jeefisate gade noonkere ikkankenni ijaarshu aana noo xawubba jeefisate ikkadimmano kakkaooshshuno noonke” yitinoti ministircho; batinye xawubba danchu gari aana afantannore ikkansa qaagiissite; Afriku lekkate kuwaase aliidi bisi ((CAF)) sumuu yaannoha ikkiro 5 diri kawa xawubba jeefisate looso loonsannita egensiissino. Loossateno luphiima ikkino kakkaooshshinna ikkadimmano noota huwachishshino.
Xawubbate gobbaannino ispoortetenni riqibbanno heewisamaano fultannore shiimmaadda xawubba (Mini stadium) hedote giddo worrannitanna heewubba qixxeessate hasiissannore ledote safote latishshubba loossa aana illacha assinannitano xawishsha uytino.
IFDR pirezidaantichi Taayye Atsiqesillaaseno (CAF) maakisanyote barra xaphooma songo hanaffu yannara barete afame (CAF) Itophiyunnita Afriku boowe dukkisate xa`mo adhite kaajjishshanno gede woshshatto shiqishino. Itophiyu Afriku lekkate kuwaasenni jawu harumi noosetanna A.K 1957 (CAF) safantu yannarano safaano ikkitino gobbuwa mereero mitto ikkase qaagiissatenni; (CAF) albi pirezidaante ikkinohu Yidineqaachew Tesemma Afriku lekkate kuwaase kalqete barera hasiisannose darga afidhanno gede isi widoonni luphiima qeecha fulinota coyi`rino.
“Itophiyu miliyoonetenni kiirranni lekkate kuwaase baxillaano noose gobbaati” yiinohu pirezidaantichu Taayye; Itophiyu Afriku boowe horoonsidhe Afrikunnita lekkate kuwaase lossatenna ispoortetenni gobba kaajjishate loossannotano huwachishino.
Itophiyu Afriku boowe dukkisate xawubba ijaartanninna nooreno woyyeessitanni afantannota buuxisino.
Abbebech Maatewoos
Bakkalcho Birra 14, 2017 M.D
