Tayxe harinsanni hee`noonni 19ki Kalqete Atileetiksete Shaampiyoonirano Itophiyu beeqqancho ikkinoha ikkanna; hanafotenni kayise meedaliyu giddora easinni jawaata gobba ikkasi leellishino. Itophiyu beeqqaancho ikke nooti tayxeti 19ki kalqete Atileetiksete Shaampiyoone jawaata heewisamaanonni dukkisante sufanni no.
Kalqete deerrinni tenne dodanshote heewo aana maccari bareedda atileetooti wiinamu saate borreesiissinori baalunna wedellu atileetooti beeqqitanni afantanno. Gobbansa baandeerano gotti assate heewote battalara qeelate heewisantanno. 35 kumi daga haara dandiitannotinna tenne shampiyoonera yine ijaarroonni atileetiksete mereershira Hangaari Budaapest 2100 ikkitanno atiletooti heewisntanni no.
Basete saate woyyeessitino atileetootira deerrunni fulteenna uynanninsa woxenna dipolooma agurranna, 100-kumi dolaare baraadhanno. Konnira, tayxe atileetiksete shaampiyoone heewora Itophiyu 35 atileetota beeqqaano assino.
Konne ikkeenna, 19kihu Kalqete Atileetiksete Shaampiyooni Woxawaajje 13/15 M.D heewo faajjetenni hanaffinoha ikkanna; Itophiyu atileetootino 10 kumi meetirenni heewisamatenni 1-3 geeshsh fultino “Haanja Lolaho” yaanno su’ma wirro qoltino. Tini bareedda seennu atileetooti tenne heewonni haanju lolahi dhagge wirro leda dandiitino. Itophiyu konni shaampiyoonira addintanni maalalsitanno gumma borreessiissanno afantanno.
2015 M.D 19ki kalqete Atileetikse Shaampiyonerano haanju lolahi dhagge Itophiyu seenni 10 kumi meetirenni leda dandiino. Hangaari Budapestete harinsanni hee`noonni shaampiyoonira Itophiyu atileetooti 1 kayisse 3 geehsha fulatenni Culka, Birrenna Camote meedaaliya qeela dandiitino. Umi barra 10 kumi meetirenni seennunnita gumulote heewo harinsoonni.
Heewote aana Gudaafi Tseggaye 1kita, Letesenbeti Gideyiti 2kitanna Ijjigaayyo Tayyeti 3kita ikkite haanju lolahi dhagge gobbansara maareekkisiisatenni Culka, Birrenna Camo adhitino. Ilamase Itophiya ikkitinoti Nezerlaandete doddannoti Siifani Haseniti jawaata heewisamaancho ikkiturono; dodanshote aana heedhe uwatenni qeelamate gadadantino.
Gudaafi Tseggayet, Culku medaaliya Atileeticho Sifani anganni butte haarate jawaata heewo assite, 31:27:18 ikkkitanno yannanni fulatenni 1kita ikkite qeeltino. Sai dirira Culka qeeltinoti Letesenbeti Gideyiti 31: 28: 16 ikkitanno saatenni layinkita fulatenni Birrete Medaaliya adhitino. Sayikita ikkite fultinoti Ijjigaayyo Taayyeti 31: 28 31 saatenni fulte Camote medaaliya goowaho wodhate dandiitino. Tini umi barra Budapesetete 10 kumi meetirenni mitte heewo aana sase meedaaliya gamba assatenni Itophiyu baandeeri gotti yee leellanno gede assitino dhaggeeti.
19kiti Hangaari Budapestete Kalqete Atileetiksete Shaampiyooni heewo suffanni nooha ikkanna; 10 kumi meetire heewonni labballuno sa`u Sanyote hashsha heewo assitinoha ikkanna, Salamooni Baareggihunni Camote medaaliya Itophiyu afi`ra dandiino. Culkunna Birrete meedaaliya Ugaandunna Keeniyu adhara dandiino. Berihu Aregaawiti Shoolki deerra amade fulino. Itophiyu xaano oyimbarra Maaksanyote hashsha assino 1500 nna 3000 meetire dodanshote heewonni bareedda atileetootinke seennunna labballu Itophiyaho lame Birrete meedaaliya abbitino.
Itophiyu atileetooti lamunku ko/teenni assitino heewonni wedellite Atileeticho Diriibe Wolteji 1500 meetire heewonni basete kibirewosene noota Keeniyaawitte Feyizi KipYoogo hoode layinkita ikkite fulate dandiitino. Tenne heewonni afi`noonni birrete meedaaliyi Culqunni ajinshe la`nannikkiha gobbasera leddino. Labballu heewonni 3 kumi meetire kibirewosene anna ikkinohu Atileetichu Lammeechi Girmihu niri yannara shaampiyoona ikkinoha Morokote qansicha Sofoniyaani Elbaakilihu hoode dodatenni isinni balaxame layinkiha ikke heewo qeelino.
Lammeechi Culka abbanno yine agarrirono, abba didandiino. Kunino alba saiha onte diro Culka abbate assino wo`naalsha la`niro lowontanni gaabbisanno. Ikkollana, wedellichu Atileetichi Lameechira albaanni daanno barrino isira woleho; xaano gobabsira Culka abbate jawaate loosira dandaanno. 19kihu Kalqete Atileetikse Shaampiyooni xaano sufanni nooha ikkanna, 9 barri geeshsha keeshshanno.
Abrahaam Saamueel
Bakkalcho Woxawaajje 18, 2015 M.D
