13ki Itophiyu 20 diri woriidinna 4ki 18 diri woriidi Atileetiksete shaampiyoona tenne lamala giddo Diredaawu xawira hananfoonni. Tenne lamala giddo hananfoonni shaampiyooni addi addi xeertinyinni harinsoonni filote goofimarchu heeewubbanni iibbinoho.
Quqquxotenni agarroonnitinna kaajjado heewo assinoonniti 20 diri woriidi labballu 3 kume meetire gufichu goofimarchu heewo daa’’ataano darginni kayissinote. Batinyu Atileetooti taalo assitino heewo aana lame Atileetooti Culku meedaaliya adhate goofimarchu 100 meetire gattanna xaggeeffachishshanno sharro assitino.
2024 nni Peeru Liimaho harinsoonni kalqoomu 20 diri woriidi Atileetiksete shaampiyoonninni xeertinyunni Birru meedaaliya adha dandiinohu Itophiyu ispoortete akadaame Atileetichi Atileet Hayile Ayyaalewuhu barraho harinsoonni goofimarchu heewora qeelanno yine hendoonninkanni. Wedellichu Atileetichi agarroonni garinni heewote lowo xeertinye massagatenni xaggeefachishshanno ikkadimma leellishinoha ikkirono goofimarchu lipheessinni balaxame qeelikkinni gatino. Heewo 8:51:82 ikkitino yannanni layinkiha ikke jeefisino. Wolu Itophiyu Atileetichi Dinqi Fiqaaduhu cinca gudisiissanno qolchansho 8:51:76 ikkitino yannanni heewo umikkiha ikke jeefisino. Jemaal Juhaari Oromiyu konistiraakshiinenni 8:53:23 ikkitino yannanni heewo sayikki deerra amade gudino.
Qiiddino heewo la’noonniti seennu 20 diri woriidi 3 kume meetire gufichu goofimrchu heewo Amaaru polisete Atileetitte Alemnaat Waalete qeelaanchimmanni jeefantino. Alemnaati heewo qeelaanchimmatenni jeefissu woyte borreessiissino yanna 9:47:06 ikkitino. Settu xu’eessinni gede’nite 9:47:13 jeefissinoti Itophiyu Atileetitte Atileet Keefa Tufa layinki deerra amadde jeefissanna Sheggeri quchuminni Zeritu Daaba heewo 9:51:61 jeefisatenni sayikkita ikkitino.
Shaampiyoonaho umikkita xawu ikkito goofimarchu heewo labballu 20 diri woriidi kubbate heewo hananfoonni. Dancha heewo la’noonni tenne heewonni Itophiyu daddalu baanke Atileetichi Daal Maachi 2:00 meetire alillitte kubbatenni qeelaancho ikkino. 2:03 meetire kubbinohu Mechaali Atileetichi Oslo Ujulu layinkiha ikke jeefisino heewonni; Poolippa Umaani Sidaamu buninni 2:00 meetire gottinye kubbatenni Camote meedaaliyi deerra amadino.
Diredaawu xawi gobbaanni harinsoonni 20 diri woriidi seennu urde olate goofimarchu heewonni Ruut Areero Adaamu quchuminni 45.65 meetire olatenni qeelaancho ikkitino. Sheggeri quchuminni Dukku Nenqoti kayinni 44.92 meetire olatenni layinkita ikkite jeefissanna ; Itophiyu daddalu baanketi Atileet Yeshiworq Animawuti 44.116 meetire olatenni aanino deerra amaddino.
Aanino barri heewonni lamenti xawu ikkitubba heewubba jeefo afidhino. Umiti 18 diri woriidi seennu Diskese olate heewo ikkitanna 30.63 meetire ola dandiitino Itophiyu ispoortete akadaame Atileetitte Raaheel Tolosa qeelaanchimmanni jeefantino. 28.50 meetire oltinoti Oromiyu qoqqowi Atileetitte Digaafe Shule Shuur layinkita ikkite jeefissanna; Atileet Abirihaat Hayiluti 21.88 meetire olatenni Tigrayete qoqqowinni sayikkita ikkite heewo jeefissino.
Wole 18 diri woriidi labballu alillitte kubbate heewo gumulo afidhanna Xirunesh Dibaaba Atileetiksete qajeelshi Atileetitte Diyeen Yeni 1.92 meetire kubbatenni qeelaancho ikkino. 1.89 meetire alillitte kubbinohu Oromiyu qoqqowi heewisamaanchi Atileet Biruk Iyyaasuhu layinkiha ikkanna Ogil Ujuluhu Itiyo Elektiriketenni 1.70 meetire kubbatenni Camote deerra amadino.
Diredaawaho noo iibbilli ledo amadaminohunni batinye heewo soodimarinni ledote hashshano harisa diilallaame ayyere shaampiyoonaho baxxino akata kalaqqino. Sa’u Sanyonni hananfe aantino lamala barrubbara harinsannihunna wedella Atileetoota beeqqisiisino shaampiyooninni addi addi ispoortete daninni filotenna goofimarchu heewo assinanni hee’noonni.
Qiddist Gezzaheny
Bakkalcho Onkoleessa 21, 2017 M.D
