Soojjaatinna mereerimu Afriki lekkate kuwaase konfedereshiine (Seekaafa) aantino heewote amuraatubbasi tenne lamalara faajje assino. Konni kaiminnino Itophiyu 17 diri wori Afriku boowe Seekaafu zoone filate heewo harissanno gede dooramase anfoonni. Itophiyu daanno diro Bocaasu aganira gumulamannoha 17 diri wori zoonete shampiyoona harissanno gede dooramase seekaafu dagoomittete qoolisira faajje assino.
Ledotennino seekaafu 2025 heewote amuraatesi faajje assino. Konni kaiminni seekaafu seennu shampiyoona Taanzaaniyaho harinsannita egensiisino. Qixxeessaancho Taanzaaniyu, Birundi, Yugaandunna Wodiidi Suudaane tenne heewora beeqqitannota buuxxino. Ella 5-15/2017 M.D geeshsha harinsanniha ikkanno.
Soojjaatinna Mereerimu Afriki Lekkate Kuwaase Maamari Amaale Mini (Seekaafa) heewote dayrekterchi Yusuuf Moosi heewo aanino agana Tootaal Inergiisi Kaafi seennu Afriku boowera (wafkon) albaanni harisantanno gede kaajjishinota coyi’rino.
‘’Ninketa riqiwaanonke kaa’latenni Wafkoni Taanzaaniyu woyyaabbino qixxaawonna woloota gaamuwa kayinni konni dirinni Birru aganira suffannoti seennu Afriku boowe 2026 filate qixxaabbanno’’ yaanni Moosi coyi’rino.
Balaxxe harissannori Taanzaaniyu, Yugaandu, Birundinna Wodiidi Suudaane beeqqaano ikkansa buuxisatenni, aantino shiima barrubba giddo Itophiyunna wolootu ledote gaamuwa buuxxannota agarrirono Itophiyu heewote beeqqitannokkita buuxase gede’nite fultino mashalaqquwa leellishshanno.
Wole ragaanni Afriku seennu shampiyoons liigi seekaafu zoone filate heewono Taanzaaniyaho assinannita seekaafu egensiisino. Heewo Woxawaajje 28 kayinse Wocawaaro 09/2018 M.D geeshsha Daareselaamira gumullanni.
Sai diro Itophiyu harisaanchimmanni harisantino heewo seennu shampiyoons liigi seekaafu zoone buuxishshi Itophiyu Daddalu Baanke qeellenni jeefisamasi qaangannite. Itophiyunnita seennu pirimeeri liige onte aantaancho yannara kayisa dandiitinoti Itophiyu Daddalu Baankeeti seennu gaamo tayxeno Itophiya riqqibbe zoonete shampiyonsi liigi heewo beeqqitannoha ikkanno.
Itophiyu seennu gobboomu gaamo Luusiuu 12 diri gedensoonni Afriku boowewa higate mitte godo’le iille higate hettisamme calla gattannoseti anfoonnite. Luusiuu lamu aganira albaanni Yugaandu ledo assitino buuxishshu godo’lera Kaampaalaho xaaddinonsata 2 nna 0 qeelamme xawinsara galchite badooshshu ganonni qeelatenniitinkanni goofimarchu buuxishshira iillitinohu. Goofimarchu buuxishshira xaaddannohuno Taanzaaniya ikkanno.
Ikkollana kayinni aantete Taanzaaniyu qixxeesitanno shampiyona beeqqa hoogansa ispoortete maate huluullissanni leeltanno. Luusiuu miteekkeno zoonete shampiyonira beeqqituro Afriku boowe buuxishshira Taanzaaniyu ledo assitanno jeefote godo’le uurrinshu bikkaanchimmanna qixxaawote gede ikkite kaa’litansara dandiitanno yitanno hedubba ispoortete maatewiinni aamantino.
Hakkiini sainohunni seekaafu faajje assino amuraati kaiminni seekaafu kilawubbate shampiyonsi liigi filate heewonna Itophiyunniti seennu pirimeeri liigi hanaffanno barri sasunni calla baxxasi xa’mo kalaqqino.
Kunino Luusiuu gambishshi giddo haammata godo’laano amaddinoti daddalu baanke seennu gaamo pirimeeri liige hanaffu woyte shoole lamalanni ajjinokki yannara heewote afantara dandaa hoogaseeti. Daddalu Baanke seekaafu boowe qeelturonna Afriku shampiyonsi liigi heewowa ea dandiiturono ledote mittu aganinna hakkuyi ale adhitanno yannara gobbase liigenni sette godo’lenni ajjinokkiti ba’annose. Tenne baalantenni taashshiishshu godo’le mamoote assinaraati yitannoti haammatootu xa’mooti.
Tennenni ledotenni Luusiuu Afriku boowewa sa’uronna Arfaasaho Afriku boowe harisantannota ikkasenni Itophiyu seenni pirimeeriliige marro mittu aganira murantanno. Konni daafira daddalu baanke Afriku boowe gedensoonni liigenniha taalo amuraate ikkikkinni taashshiishshu godo’le assate calla seeda yanna hasiissannonsa yaate.
Demmellaash Demmeqe
Bakkalcho Onkoleessa 28, 2017 M.D
