Barrunni mitto barra Manchu, Hamashshu, Yemakkonna Galashshu doogo hadhanno. Heddinowa iillitukkinni doogo hashsheennansa mittu Manchi mine shiqqi yite aante aantetenni gashshannonsa gede xa’midhannosi.
Balaxe Manchu shiqqi yee, doogo hashshinoehona gashshie yaanno woyte minu anni ka’’annoti mayi qarri no mannu mannaho yee hanqafe sunqe minira eesse goxannowa aannosi. Aanteteno Galashshu manchunniwa shiqe Manchu gashshannosi gede xa’manno; minu annino Galashshu gide kisannokki gede qorophisiise galannowa aannosi. Sayikkimeeshsho Yemakko aantesenni iseno gashshannose gede xa’midhanno woyte iserano shiimicco base waalchu hunda oyeese hakkiichinni milli yitannokki gede qorophisiise kulise.
Goofimarchoho Hamashshu wolootu gede isirano galannowa aannosi gede xa’mi’ranno woyte minu anni kayinni hanqunni ‘’Koo busha, xa ate mi’neya eesse gashshirammohera xa’midhanni noottoe?’’ yee xonisi. Hamashshu qolannoti “Mageeshshi geeshsha bushe mannunni dirooreemmo” yee galate fajjinosikki daafira dadillanni gobba waalchoho qiidi’ranni gali. Soodi woyte baalunku goxxinowiinni ka’e doogonsa hadhu.
Mitto barra kuri baala minesi haa’re gashshi manchi jirosi baala gooffeenna buxe itannore hooge qarrame doogo ha’ranni hee’re taaga minesi gashshi Yemakko doogote xaade togo yaannose; “Yemakko keere nootta, qaagittae? Yaannose woyte yemakkono qolte; “Eewa qaagoommahe, mancho keere nootto? Maaho dikeereho?’ yite xa’mitannosi.
Manchuno iillinosire baalankare kulisehu gedensaanni macciishshitinorichinni lowo geeshsha dadillite kaa’late hasidhanno. “Kowiicho agarie’’ yite hadhe manni mine e’e Culka moorte gamba assite abbite “Konne hirte manna ikki” yite uyitesi hadhu.
Yemakko wulatase konni garinni qo’lite hadhanni heedheennanni taaga minesi haa’re gashshisi mancho afi’ranno. Isino hakko mancho “Qaagittoe?” yee xa’mannosi. Hakku minesi gali manchino diqaaginosi; Lowo hasaawi gedensaanni qaagannosi. Kuni manchino iillinosi qarra baala kulannosi. Manchuno, “Anera mitturi dinoe; kaa’lammoherano didandeemmo; kaa’lammohera dandeemmohu amadootto Culka hiratto bayicho leellishohe? Yee Manchu anganni Culka haa’reennasi mitteenni hadhanno.
Seeda doogo hodhituhu gedensaanni hakkonne minesi gashshisihanna techo qarramino mancho boono qole xiiwe tuge Culkasi adhe ba’’anno. Hakku qarramino manchino gongo’me boonu giddo uwanno. Hedeweelcho boonu giddo uwe hee’re taaga minesi haa’re gashshisi Galashsho afanno; Galashshohono Manchu assinosita kulannosi; Galashshuno macciishshinorichinni lowo geeshsha dadille mitturichinni kaa’lasira dandiinokkihura ikkita ikke boonu giddonni fushshesi dadillunni geegiissannosi. Galashshuno dandaamisirinni wulatasi qo’li.
Lowo doogo daafuri gedensaanni Manchu hamashsho xaadanno; xaadeno togo yaannosi; ‘’Hamashsho keere nootto? Qaagittoe? Yaanno woyte Hamashshuno rahe qolannoti “Ee qaagoommohe, ati yaa ditaaga ‘busha’ yite gobba gashshittoe manchooti?’’ yee xa’mannosi.
Manchuno, eewa yee qolannoti Manchu assinosirenna wolootu loossinosi danchumma kulanno woyte Hamashshuno qolannoti dadillanni; ‘’Hakka woyte mageeshsha bushe mannunni dirooreemmo diyoommohe” yee, Ani xa wolere asse kaa’lammohera didandeemmo; kayinni mittu coyinni kaa’lammohera dandemmo; ko’o wido mittu dureessu manchi no; isino lowo geeshsha baxanno qaaqqosi ga’a aanno. Ani atera hadho’ya eehe hatte qaaqqo mare qaseemmo. Atino hadho haadhe dagge ise gatisattose; anniseno lowo geeshsha hagiidhanno” yee; soodimaroho hadhosi manchoho eesi ha’re qaaqqo qasanno.
Qaaqqote annino qaaqqo’ya reyitaraati yee masillaawanni noo yannara hakko manchi qaaqqosi gatisanno. Tenne yannara qaaqqote anni hagiirrunni jirosinni taaloote hamashshu korkaatinni manchoho aannosi. Busha yinoonnihunna minshoonni Hamashshi loonsoonnisikki danchummara jawa wulata loosi. Ayirradu Manchi beetti kayinni loonsoonnisi danchumma bunshetenni soorre umosi shollishi.
Qiddist Gezaheny
Bakkalcho Woxawaajje 11, 2015 M.D
